ಬೆಂಗಳೂರು: ವರ್ಷಾರಂಭದಲ್ಲಿ ಗ್ರೇಟರ್ ನೊಯ್ಡಾದಲ್ಲಿ ನಡೆದ ಆಟೊ ಎಕ್ಸ್ಪೋದಲ್ಲಿ ಟಾಟಾ ಮೋಟಾರ್ಸ್ ತನ್ನ ಪ್ರೀಮಿಯಮ್ ಹ್ಯಾಚ್ ಬ್ಯಾಕ್ಸ್ ಆಲ್ಟ್ರೋಜ್ನ (Tata Altroz CNG) ಸಿಎನ್ಜಿ ಆವೃತ್ತಿಯನ್ನು ಪ್ರದರ್ಶಿಸಿತ್ತು. ಆ ಕಾರನ್ನು ಇದೀಗ ಮಾರುಕಟ್ಟೆಗೆ ಇಳಿಸಿದ್ದು ಬುಕಿಂಗ್ ಆರಂಭಿಸಿದೆ. 2023ರ ಮೇ ತಿಂಗಳಲ್ಲಿ ಇದನ್ನು ಗ್ರಾಹಕರಿಗೆ ನೀಡಲಿದ್ದೇವೆ ಎಂದು ಕಂಪನಿಯು ಹೇಳಿದೆ. ಸದ್ಯಕ್ಕೆ ಕಂಪನಿಯು ಬೆಲೆಯನ್ನು ಹೇಳಿಲ್ಲ. ಆದರೆ, 21 ಸಾವಿರ ರೂಪಾಯಿ ಪಾವತಿ ಮಾಡಿ ಬುಕಿಂಗ್ ಮಾಡುವಂತೆ ಹೇಳಿದೆ.
ಸಿಎನ್ಜಿ ಮಾರುಕಟ್ಟೆಯನ್ನು ಕ್ರಾಂತಿಗೊಳಿಸುವ ಸಲುವಾಗಿ ಟಾಟಾ ಮೋಟರ್ಸ್ ಈ ಕಾರನ್ನು ಬಿಡುಗಡೆ ಮಾಡಿದೆ. ಇದು ಭಾರತದ ಪ್ರಪ್ರಥಮ ಅವಳಿ ಸಿಲಿಂಡರ್ ಸಿಎನ್ಜಿ ತಂತ್ರಜ್ಞಾನದ ಆಲ್ಟ್ರೋಜ್ iCNG ಕಾರು. ಇದರ ಮೂಲಕ ಬೂಟ್ ಸ್ಪೇಸ್ ಕಡಿಮೆಯಾಗದಂತೆ ನೋಡಿಕೊಳ್ಳಲಾಗಿದೆ. ಅಲ್ಲದೆ, ಭಾರತದ ಅತ್ಯಂತ ಸುರಕ್ಷಿತ ಪ್ರೀಮಿಯಮ್ ಹ್ಯಾಚ್‌ಬ್ಯಾಕ್ ಆಗಿರುವ ಟಾಟಾ ಆಲ್ಟ್ರೋಜ್ ಸಿಎನ್ಜಿ ಅವತಾರದಲ್ಲೂ ಲಭ್ಯವಾಗಿದೆ. ಉಳಿದಂತೆ ಪೆಟ್ರೋಲ್ ಹಾಗೂ ಡೀಸಲ್ ಕಾರುಗಳು ಕೂಡ ಮಾರುಕಟ್ಟೆಯಲ್ಲಿ ಮುಂದುವರಿಯಲಿದೆ.
ಟಾಟಾ ಸಿಎನ್ಜಿ ಕಾರು ಎಕ್ಸ್ಇ, ಎಕ್ಎಮ್ ಪ್ಲಸ್, ಹಾಗೂ ಎಕ್ಸ್ಜಡ್ ಪ್ಲಸ್ ವೇರಿಯೆಂಟ್ನಲ್ಲಿ ಲಭ್ಯವಿದ್ದು, ಒಪೇರಾ ಬ್ಲೂ, ಡೌನ್‌ಟೌನ್ ರೆಡ್, ಆರ್ಕೇಡ್ ಗ್ರೇ ಮತ್ತು ಅವೆನ್ಯೂ ವೈಟ್ ಸೇರಿದಂತೆ ನಾಲ್ಕು ಬಣ್ಣಗಳ ಆಯ್ಕೆ ನೀಡಲಾಗಿದೆ.
ಆಲ್ಟ್ರೋಜ್ ಕಾರಿನಲ್ಲಿ 1.2 ಲೀಟರ್ನ ಪೆಟ್ರೋಲ್, ಸಿಎನ್ಜಿ ಎಂಜಿನ್ ಇದೆ. ಇದು ಟಿಯಾಗೊ ಹಾಗೂ ಟಿಗೋರ್ ಸಿಎನ್ಜಿಗಿಂತ 4 ಪಿಎಸ್ ಹೆಚ್ಚುವರಿ ಪವರ್ ಹಾಗೂ 2 ಎನ್ಎಮ್ ಟಾರ್ಕ್ ಬಿಡುಗಡೆ ಮಾಡುತ್ತದೆ. ಇದು ಐದು ಸ್ಪೀಡ್ನ ಮ್ಯಾನುಯಲ್ ಗೇರ್ಬಾಕ್ಸ್ ಹೊಂದಿದ್ದು ಒಂದು ಕೆಜಿ ಸಿಎನ್ಜಿಗೆ 25 ಕಿಲೋ ಮೀಟರ್ ಮೈಲೇಜ್ ನೀಡುತ್ತದೆ. ಎಂಜಿನ್ ಸ್ಟಾರ್ಟ್ ಮಾಡುವುದಕ್ಕೆ ಸಿಎನ್ಜಿಯನ್ನೇ ಬಳಸಿಕೊಳ್ಳುವುದು ಟಾಟಾ ಕಂಪನಿಯ ಸಿಎನ್ಜಿ ಎಂಜಿನ್ಗಳ ವಿಶೇಷತೆಯಾಗಿದೆ. ಉಳಿದ ಕಂಪನಿಗಳ ಕಾರುಗಳ ಎಂಜಿನ್ ಪೆಟ್ರೋಲ್ ಮೂಲಕ ಸ್ಟಾರ್ಟ್ ಆಗಿ ಬಳಿಕ ಸಿಎನ್ಜಿಗೆ ಸ್ವಿಚ್ ಆಗುತ್ತದೆ.
ಎರಡು ಸಿಲಿಂಡರ್ ಯಾಕೆ
ಎಲ್ಲ ಸಿಎನ್ಜಿ ಕಾರುಗಳಲ್ಲಿ ಒಂದು ಸಿಎನ್ಜಿ ಸಿಲಿಂಡರ್ಗಳನ್ನು ಇಟ್ಟಿರುತ್ತಾರೆ. ಆದರೆ, ಆಲ್ಟ್ರೋಜ್ನಲ್ಲಿ ಎರಡು ಸಿಎನ್ಜಿ ಸಿಲಿಂಡರ್ಗಳನ್ನು ಇಡಲಾಗಿದೆ. ಇದರ ಮೂಲಕ ಬೂಟ್ ಸ್ಪೇಸ್ಗೆ ಹೆಚ್ಚಿರುವಂತೆ ನೋಡಿಕೊಳ್ಳಲಾಗಿದೆ. ಪೆಟ್ರೋಲ್ ಅಥವಾ ಡೀಸೆಲ್ ಆಲ್ಟ್ರೋಜ್ ಕಾರಿನಲ್ಲಿ 345 ಲೀಟರ್ ಬೂಟ್ ಸ್ಪೇಸ್ ನೀಡಲಾಗಿದೆ. ಸಿಎನ್ಜಿಯಲ್ಲಿ 200 ಲೀಟರ್ ಸ್ಪೇಸ್ ದೊರೆಯುವ ನಿರೀಕ್ಷೆಯಿದೆ. ಬೂಟ್ ಸ್ಪೇಸ್ ಸಿಎನ್ಜಿ ಕಾರು ಮಾಲೀಕರ ದೊಡ್ಡ ಚಿಂತೆಯಾಗಿತ್ತು. ಟಾಟಾ ಮೋಟಾರ್ಸ್ ಆ ಸಮಸ್ಯೆಗೆ ಪರಿಹಾರ ಕಂಡುಕೊಂಡಿದೆ.
ಇದನ್ನೂ ಓದಿ : Maruti Suzuki : 25.51 ಕಿಲೋ ಮೀಟರ್ ಮೈಲೇಜ್ ಕೊಡುವ ಮಾರುತಿ ಸುಜುಕಿ ಬ್ರೆಜಾ ಬಿಡುಗಡೆ
ಫೀಚರ್ಗಳೇನು?
ಸಿಎನ್ಜಿ ವೇರಿಯೆಂಟ್ನ ಆಲ್ಟ್ರೋಜ್ ಏಳು ಇಂಚಿನ ಟಚ್ ಸ್ಕ್ರೀನ್ ಸಿಸ್ಟಮ್ ಹೊಂದಿದೆ. ಕನೆಕ್ಟೆಡ್ ಕಾರ್ ಟೆಕ್ನಾಲಜಿ, ಕ್ರೂಸ್ ಕಂಟ್ರೋಲ್, ಪುಶ್ ಬಟನ್, ಸ್ಟಾರ್ಟ್ ಸ್ಟಾಪ್ ಪೆಸಿಲಿಟಿ, ಮೂಡ್ ಲೈಟಿಂಗ್, ರೈನ್ ಸೆನ್ಸಿಂಗ್ ವೈಪರ್, ಡ್ಯುಯಲ್ ಫ್ರಂಟ್ ಏರ್ಬ್ಯಾಗ್ಗಳು, ರಿಯರ್ ಪಾರ್ಕಿಂಗ್ ಕ್ಯಾಮೆರಾ ಈ ಕಾರಿನಲ್ಲಿದೆ.
ಬೆಲೆ ಎಷ್ಟಿರಬಹುದು?
ಟಾಟಾ ಆಲ್ಟ್ರೋಜ್ನ ಪ್ರತಿ ಸ್ಪರ್ಧಿಗಳಾದ ಮಾರುತಿ ಸುಜುಕಿ ಬಲೆನೊ ಹಾಗೂ ಟೊಯೊಟಾ ಗ್ಲಾಂಜಾ ಕಾರಿನ ಆರಂಭಿಕ ಬೆಲೆ 8.3 ಲಕ್ಷ ರೂಪಾಯಿಯಿಂದ ಆರಂಭಗೊಂಡು 9.5 ಲಕ್ಷ ರೂಪಾಯಿ ತನಕ ಇದೆ. (ಎಕ್ಸ್ ಶೋರೂಮ್) ಇದಕ್ಕೆ ಹತ್ತಿರದ ಬೆಲೆಯಲ್ಲಿ ಆಲ್ಟ್ರೋಜ್ ದೊರೆಯಲಿದೆ.