ಲಂಡನ್: ಪ್ರವಾಸಿ ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್ ತಂಡಗಳ ನಡುವೆ ನಡೆಯುತ್ತಿರುವ ಆ್ಯಶಸ್ ಸರಣಿಯ (Ashes 2023) ಎರಡನೇ ಪಂದ್ಯದ ಮೂರನೇ ದಿನ ಮಳೆಯ ಅಡಚಣೆ ಉಂಟಾಯಿತು. ಹೀಗಾಗಿ ನಿಗದಿತ ಅವಧಿಗಿಂತ ಮೊದಲೇ ಪಂದ್ಯವನ್ನು ಸ್ಥಗಿತಗೊಳಿಸಲಾಯಿತು. ಅದಕ್ಕಿಂತ ಮೊದಲು ಎರಡನೇ ಇನಿಂಗ್ಸ್ ಬ್ಯಾಟಿಂಗ್ ಮುಂದುವರಿಸಿರುವ ಆಸೀಸ್ ಪಡೆ 2 ವಿಕೆಟ್ ನಷ್ಟಕ್ಕೆ 130 ರನ್ ಬಾರಿಸಿದ್ದು 221 ರನ್ಗಳ ಮುನ್ನಡೆ ಪಡೆದುಕೊಂಡಿದೆ.
A solid all-round showing on a rain-truncated Day 3 sees Australia wrest control of the second #Ashes Test 💪#WTC25 | #ENGvAUS 📝: https://t.co/liWqlPCKqn pic.twitter.com/J9bKNYLEaB
— ICC (@ICC) June 30, 2023
ಇಲ್ಲಿನ ಐತಿಹಾಸಿಕ ಲಾರ್ಡ್ಸ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡ ಮೇಲುಗೈ ಸಾಧಿಸುತ್ತಿದೆ. ಮೊದಲ ಇನಿಂಗ್ಸ್ನಲ್ಲಿ 416 ರನ್ ಬಾರಿಸಿದ್ದ ಆಸೀಸ್ ಬಳಗ, ಎದುರಾಳಿ ಇಂಗ್ಲೆಂಡ್ ತಂಡವನ್ನು 325 ರನ್ಗಳಿಗೆ ನಿಯಂತ್ರಿಸಿತು. ಬಳಿಕ ಬ್ಯಾಟ್ ಮಾಡುತ್ತಿದ್ದು ಆರಂಭಿಕ ಬ್ಯಾಟರ್ ಉಸ್ಮಾನ್ ಖವಾಜಾ (58) ಮತ್ತೊಂದು ಸೊಗಸಾದ ಅರ್ಧ ಶತಕ ಬಾರಿಸುವ ಮೂಲಕ ತಂಡಕ್ಕೆ ಮುನ್ನಡೆ ಕಲ್ಪಿಸಿದ್ದಾರೆ. ಡೇವಿಡ್ ವಾರ್ನರ್ 25 ರನ್ ಬಾರಿಸಿದ್ದರೆ ಮರ್ಸನ್ ಲಾಬುಶೇನ್ 30 ರನ್ ಬಾರಿಸಿ ಔಟಾಗಿದ್ದಾರೆ. ಮೊದಲ ಇನಿಂಗ್ಸ್ನಲ್ಲಿ ಶತಕ ಬಾರಿಸಿದ್ದ ಸ್ಟಾರ್ ಬ್ಯಾಟರ್ ಸ್ಟೀವ್ ಸ್ಮಿತ್ 6 ರನ್ ಬಾರಿಸಿ ನಾಲ್ಕನೇ ದಿನಕ್ಕೆ ಬ್ಯಾಟಿಂಗ್ ಮುಂದುವರಿಸಿದ್ದಾರೆ.
ಬೇಗನೆ ವಿಕೆಟ್ ಕಳೆದುಕೊಳ್ಳುವ ಮೂಲಕ ಹಿನ್ನಡೆಗೆ ಒಳಗಾಗಿರುವ ಇಂಗ್ಲೆಂಡ್ ತಂಡ ಪ್ರವಾಸಿ ತಂಡದ ಬ್ಯಾಟರ್ಗಳನ್ನು ಔಟ್ ಮಾಡುವುದಕ್ಕೆ ಪೇಚಾಡುತ್ತಿದ್ದಾರೆ. ಆದರೆ, ತಳವೂರಿ ಬ್ಯಾಟ್ ಮಾಡುತ್ತಿರುವ ಆಸ್ಟ್ರೇಲಿಯಾ ತಂಡದ ಆಟಗಾರರು ಆತಿಥೇಯ ತಂಡದ ತಂತ್ರಗಳನ್ನು ಉಲ್ಟಾ ಮಾಡುತ್ತಿದ್ದಾರೆ. ಮೊದಲ ಪಂದ್ಯದ ಸೋಲಿನ ಕಾರಣ 0-1 ಹಿನ್ನಡೆಯಲ್ಲಿರುವ ಇಂಗ್ಲೆಂಡ್ ತಂಡಕ್ಕೆ ಈ ಗೆಲುವು ಸರಣಿಯಲ್ಲಿ ಅಧಿಕಾರ ಸ್ಥಾಪಿಸಲು ಅಗತ್ಯವಾಗಿತ್ತು. ಆದರೆ, ತವರಿನ ನೆಲದಲ್ಲಿ ಗೆಲ್ಲಲು ಹಾಕಿಕೊಂಡ ಬಜ್ಬಾಲ್ ತಂತ್ರ ಕೈಕೊಟ್ಟಿದೆ.
ಬ್ಯಾಟಿಂಗ್ ವೈಫಲ್ಯ
ಆಸ್ಟ್ರೇಲಿಯಾ ತಂಡ ಮೊದಲ ಇನಿಂಗ್ಸ್ನಲ್ಲಿ ಪೇರಿಸಿದ್ದ 416 ರನ್ಗಳಿಗೆ ಪ್ರತಿಯಾಗಿ ಬ್ಯಾಟ್ ಮಾಡಿದ್ದ ಇಂಗ್ಲೆಂಡ್ ತಂಡ ಎರಡನೇ ದಿನದ ಅಂತ್ಯಕ್ಕೆ 4 ವಿಕೆಟ್ ನಷ್ಟ ಮಾಡಿಕೊಂಡು 278 ರನ್ ಬಾರಿಸಿ ಉತ್ತಮ ಸ್ಥಿತಿಯಲ್ಲಿತ್ತು. ಮೂರನೇ ದಿನ ಮತ್ತಷ್ಟು ರನ್ಗಳನ್ನು ಬಾರಿಸಿ ಮುನ್ನಡೆ ಕಾಪಾಡಿಕೊಳ್ಳುವ ಯೋಜನೆಯಲ್ಲಿತ್ತು. ಆದರೆ, ಮೂರನೇ ದಿನದ ಮೊದಲ ಸೆಷನ್ನಲ್ಲಿ ಕೇವಲ 47 ರನ್ಗಳಿಗೆ ಉಳಿದ ಆರು ವಿಕೆಟ್ಗಳನ್ನು ನಷ್ಟ ಮಾಡಿಕೊಂಡ ಇಂಗ್ಲೆಂಡ್ ತಂಡ ಹಿನ್ನಡೆಗೆ ಒಳಗಾಯಿತು. ಹ್ಯಾರಿ ಬ್ರೂಕ್ (50) ಅರ್ಧ ಶತಕ ಬಾರಿಸಿದ ಹೊರತಾಗಿಯೂ ಉಳಿದ ಆಟಗಾರರಿಂದ ನೆರವು ಸಿಗಲಿಲ್ಲ. ನಾಯಕ ಬೆನ್ ಸ್ಟೋಕ್ಸ್ ಮತ್ತೊಂದು ಬಾರಿ ಬ್ಯಾಟಿಂಗ್ ವೈಫಲ್ಯ ಎದುರಿಸಿದ್ದು 17 ರನ್ಗಳಿಗೆ ಸೀಮಿತಗೊಂಡರು. ಎರಡನೇ ದಿನದಲ್ಲಿ ಬಾರಿಸಿದ್ದ ರನ್ಗೆ ತೃಪ್ತಿ ಪಟ್ಟ ಅವರು ವಿಕೆಟ್ ಒಪ್ಪಿಸಿದರು.
ಇದನ್ನೂ ಓದಿ : Ashes 2023 : ಸುಸ್ಥಿತಿಯಲ್ಲಿ ಇಂಗ್ಲೆಂಡ್ ತಂಡ; ಆಸ್ಟ್ರೇಲಿಯಾ ತಂಡಕ್ಕೆ ಇನ್ನೂ 138 ರನ್ಗಳ ಮುನ್ನಡೆ
ವಿಕೆಟ್ ಕೀಪರ್ ಬ್ಯಾಟರ್ ಜಾನಿ ಬೇರ್ಸ್ಟೋವ್ ಫಾರ್ಮ್ ಕಳೆದುಕೊಂಡಿರುವುದು ಮತ್ತೊಂದು ಬಾರಿ ಸಾಬೀತಾಯಿತು. ಅವರು 16 ರನ್ಗಳಿಗೆ ವಿಕೆಟ್ ಒಪ್ಪಿಸಿದರು. ಸ್ಟುವರ್ಟ್ ಬ್ರಾಡ್ 12 ಬಾರಿಸಿದರು. ಒಲಿ ರಾಬಿನ್ಸನ್ 9 ರನ್ ಕೊಡುಗೆ ಕೊಟ್ಟರು.
ಆಸ್ಟ್ರೇಲಿಯಾ ತಂಡದ ಪರ ಬೌಲಿಂಗ್ನಲ್ಲಿ ಮಿಚೆಲ್ ಸ್ಟಾರ್ಕ್ 3 ವಿಕೆಟ್ ಉರುಳಿಸಿದರೆ ಹೇಜಲ್ವುಡ್ 2 ವಿಕೆಟ್ ಪಡೆದರು. ಟ್ರಾವಿಡ್ ಹೆಡ್ 2 ವಿಕೆಟ್ ತಮ್ಮದಾಗಿಸಿಕೊಂಡರು.