ಸಿಡ್ನಿ: ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದ ಮೊದಲ ದಿನ ಆಸ್ಟ್ರೇಲಿಯಾ(AUS VS SA) ತಂಡ ದಿನದಾಟದ ಅಂತ್ಯಕ್ಕೆ 2 ವಿಕೆಟ್ಗೆ 147 ರನ್ ಗಳಿಸಿದೆ. ಆದರೆ ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಆಟಗಾರ ಮಾರ್ನಸ್ ಲಬುಶೇನ್ ಮಾಡಿದ ಒಂದು ಸನ್ನೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಬುಧವಾರ ಸಿಡ್ನಿಯಲ್ಲಿ ಆರಂಭಗೊಂಡ ಈ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ಮೊದಲು ಬ್ಯಾಟಿಂಗ್ ನಡೆಸುವ ನಿರ್ಧಾರ ಮಾಡಿತು. ಅದರಂತೆ ಮೊದಲ ವಿಕೆಟ್ ಪತನದ ಬಳಿಕ ಬ್ಯಾಟಿಂಗ್ ಮಾಡಲು ಕ್ರೀಸ್ಗೆ ಬಂದ ಮಾರ್ನಸ್ ಲಬುಶೇನ್ ಪಂದ್ಯದ ಮಧ್ಯೆಯೇ ದಿಢೀರ್ ಸಿಗರೇಟ್ ಸೇದುವ ಲೈಟರ್ ಕೇಳಿ ಅಚ್ಚರಿ ಮೂಡಿಸಿದರು.
ಪಂದ್ಯ ನಡೆಯುತ್ತಿರುವಾಗಲೇ ದಿಢೀರ್ ಬ್ಯಾಟಿಂಗ್ ನಿಲ್ಲಿಸಿ ಮಾರ್ನಸ್ ಲಬುಶೇನ್ ತನ್ನ ಸಹ ಆಟಗಾರರಿಗೆ ಸಿಗರೇಟ್ ಲೈಟರ್ ತನ್ನಿ ಎಂದು ಕೈಸನ್ನೆ ಮಾಡಿದ್ದಾರೆ. ಇದನ್ನು ಕಂಡ ಪ್ರೇಕ್ಷಕರು ಮತ್ತು ಅಂಪಾಯರ್ಗಳು ಒಂದು ಕ್ಷಣ ಅಚ್ಚರಿಗೆ ಒಳಗಾದರು. ಪಂದ್ಯದ ಮಧ್ಯೆ ಯಾಕೆ ಸಿಗರೇಟ್ ಲೈಟರ್ ಕೇಳುತ್ತಿದ್ದಾರೆ? ಎಂದು ಎಲ್ಲರು ಕುತೂಹಲದಿಂದ ನೋಡುತ್ತಿದ್ದರು.
ಅಸಲಿಗೆ ಮಾರ್ನಸ್ ಲೈಟರ್ ಕೇಳಿದ್ದು, ಸಿಗರೇಟ್ ಸೇದಲು ಅಲ್ಲ. ಬದಲಿಗೆ ತನ್ನ ಹೆಲ್ಮೆಟ್ ಸರಿಪಡಿಸಲು. ಸಹ ಆಟಗಾರ ಲೈಟರ್ ತಂದ ಬಳಿಕ ಲಬುಶೇನ್ ಲೈಟರ್ ಹಚ್ಚಿ ಹೆಲ್ಮೆಟ್ನಲ್ಲಿ ಆದ ದೋಷ ಸರಿಪಡಿಸಿದರು. ಬಳಿಕ ಕ್ರೀಸ್ಗೆ ಬಂದು ಬ್ಯಾಟಿಂಗ್ ಮುಂದುವರಿಸಿದರು. ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಮೊದಲ ಇನಿಂಗ್ಸ್ನಲ್ಲಿ ಲಬುಶೇನ್ 79 ರನ್ ಗಳಿಸಿ ಅನ್ರಿಚ್ ನೋರ್ಜೆಗೆ ವಿಕೆಟ್ ಒಪ್ಪಿಸಿದರು.
ಇದನ್ನೂ ಓದಿ | AUS VS SA | ದಕ್ಷಿಣ ಆಫ್ರಿಕಾ ವಿರುದ್ಧ 16 ವರ್ಷಗಳ ಬಳಿಕ ಟೆಸ್ಟ್ ಸರಣಿ ಗೆದ್ದ ಆಸ್ಟ್ರೇಲಿಯಾ ತಂಡ!