Babar Azam: ಶತಕದ ಮೂಲಕ ಹಲವು ದಾಖಲೆ ಬರೆದ ಬಾಬರ್​; ಕೊಹ್ಲಿಯ ಒಂದು ದಾಖಲೆ ಸೇಫ್

ಮುಲ್ತಾನ್​: ನೇಪಾಳ ವಿರುದ್ಧದ ಏಷ್ಯಾಕಪ್​ ಟೂರ್ನಿಯ(Asia Cup 2023) ಬುಧವಾರದ ಪಂದ್ಯದಲ್ಲಿ ಪಾಕಿಸ್ತಾನ(Pakistan vs Nepal, 1st Match) ತಂಡ 238 ರನ್​ಗಳ ಗೆಲುವು ಸಾಧಿಸಿ ಮೆರೆದಾಡಿದೆ. ಈ ಪಂದ್ಯದಲ್ಲಿ ಶತಕ ಬಾರಿಸಿದ ಪಾಕಿಸ್ತಾನ ತಂಡದ ನಾಯಕ ಬಾಬರ್​ ಅಜಂ(Babar Azam) ಈ ಕೂಟದಲಿದ್ದ ಹಲವು ದಾಖಲೆಯನ್ನು ಮುರಿದಿದ್ದಾರೆ. ಅದರಲ್ಲಿ ಒಂದು ದಾಖಲೆ ಕಿಂಗ್​ ಕೊಹ್ಲಿಯದ್ದಾಗಿದೆ. ಆದರೆ ಒಂದು ದಾಖಲೆ ಮಾತ್ರ ಇನ್ನೂ ಕೊಹ್ಲಿಯ(Virat Kohli) ಹೆಸರಿನಲ್ಲೇ ಮುಂದುವರಿದಿದೆ.

ಶತಕ ಬಾರಿಸಿದ ಮೂರನೇ ನಾಯಕ

ಏಷ್ಯಾಕಪ್​ ಕ್ರಿಕೆಟ್​ ಇತಿಹಾಸದಲ್ಲಿ(asia cup 2023 history) ಬಾಬರ್ ಅಜಂ​ ಬಾರಿಸಿದ ಮೊದಲ ಶತಕ ಇದಾಗಿದೆ. ಈ ಮೂಲಕ ಏಷ್ಯಾ ಕಪ್‌ ಟೂರ್ನಿಯಲ್ಲಿ ಶತಕ ಸಿಡಿಸಿದ ಪಾಕಿಸ್ತಾನದ ಮೂರನೇ ಬ್ಯಾಟ್ಸ್‌ಮನ್‌ ಎಂಬ ಖ್ಯಾತಿಗೆ ಬಾಬರ್‌ ಪಾತ್ರರಾದರು. ಇದಕ್ಕೂ ಮುನ್ನ ಪಾಕ್​ ಪರ ನಾಯಕನಾಗಿ ಶಾಹಿದ್‌ ಅಫ್ರಿದಿ 2 ಶತಕ ಹಾಗೂ ಸಾನಿಯಾ ಮಿರ್ಜಾ ಗಂಡ ಶೋಯೆಬ್‌ ಮಲಿಕ್‌ 1 ಶತಕ ಬಾರಿಸಿದ್ದರು.

ನಾಯಕನಾಗಿ ಕೊಹ್ಲಿ ದಾಖಲೆ ಮುರಿದ ಬಾಬರ್

ನಾಯಕನಾಗಿ ಏಷ್ಯಾಕಪ್​ನಲ್ಲಿ ವೈಯಕ್ತಿಕ ಗರಿಷ್ಠ ಮೊತ್ತ ದಾಖಲಿಸಿದ ಸಾಧಕರ ಪಟ್ಟಿಯಲ್ಲಿ ಬಾಬರ್​ ಟೀಮ್​ ಇಂಡಿಯಾದ ಆಟಗಾರ ವಿರಾಟ್​ ಕೊಹ್ಲಿ ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಧೋನಿ ಅನುಪಸ್ಥಿತಿಯಲ್ಲಿ 2014ರ ಏಷ್ಯಾ ಕಪ್​ನಲ್ಲಿ ಭಾರತ ತಂಡವನ್ನು ಮುನ್ನಡೆಸಿದ ಕೊಹ್ಲಿ, ಬಾಂಗ್ಲಾ ವಿರುದ್ಧ 136 ರನ್ ಬಾರಿಸಿದ್ದರು. ಇದು ಈ ವರೆಗಿನ ದಾಖಲೆಯಲಾಗಿತ್ತು. ಆದರೆ ಬಾಬರ್​ ನೇಪಾಳ ವಿರುದ್ಧ 151 ರನ್​ ಬಾರಿಸಿದ ವೇಳೆ ಕೊಹ್ಲಿ ದಾಖಲೆ ಪತನಗೊಂಡಿತು.

ಇದನ್ನೂ ಓದಿ Asia Cup 2023: ಲಂಕಾ-ಬಾಂಗ್ಲಾ ಮುಖಾಮುಖಿ; ಉಭಯ ತಂಡಗಳಿಗೂ ಗಾಯದ್ದೇ ಚಿಂತೆ

ಅತ್ಯಧಿಕ ವೈಯಕ್ತಿಕ ರನ್​ ದಾಖಲೆ ಕೊಹ್ಲಿ ಹೆಸರಿನಲ್ಲಿದೆ

ಏಷ್ಯಾಕಪ್​ ಟೂರ್ನಿಯಲ್ಲಿ ಪಂದ್ಯವೊಂದರಲ್ಲಿ ಅತ್ಯಧಿಕ ವೈಯಕ್ತಿಕ ರನ್​ ಗಳಿಸಿದ ದಾಖಲೆ ವಿರಾಟ್​ ಕೊಹ್ಲಿ ಹೆಸರಿನಲ್ಲಿದೆ. ಸಾರಸ್ಯವೆಂದರೆ ಕಿಂಗ್​ ಕೊಹ್ಲಿ 2012ರಲ್ಲಿ ಪಾಕಿಸ್ತಾನ ವಿರುದ್ಧವೇ 183ರನ್​ ಬಾರಿಸಿದ್ದರು. ಈ ಸಾಧನೆಯ ಪಟ್ಟಿಯಲ್ಲಿ ಬಾಬರ್​ಗೆ(151) ದ್ವಿತೀಯ ಸ್ಥಾನ. ಮೂರನೇ ಸ್ಥಾನ ಯೂನಿಸ್​ ಖಾನ್​(144), ನಾಲ್ಕನೇ ಸ್ಥಾನ ಬಾಂಗ್ಲಾದ ಮುಸ್ಫಿಕರ್​ ರಹಿಂ(144) ಪಡೆದಿದ್ದಾರೆ.

See more

Babar Azam made the second-highest score in Asia Cup history on Wednesday 👏#PAKvNEP pic.twitter.com/OQ6VoFoVfd

— ICC (@ICC) August 30, 2023

19ನೇ ಶತಕ ಪೂರೈಸಿದ ಬಾಬರ್​

ಗಾಯದ ಮಧ್ಯೆಯೂ ನೇಪಾಳ ವಿರುದ್ಧ 49 ಓವರ್​ ತನಕ ಬ್ಯಾಟಿಂಗ್​ ಕಾಯ್ದುಕೊಂಡ ಬಾಬರ್​ ಅಜಂ 130 ಎಸೆತ ಎದುರಿಸಿ 151 ರನ್​ ಗಳಿಸಿ ವಿಕೆಟ್​ ಒಪ್ಪಿಸಿದರು. ಅವರ ಈ ಸೊಗಸಾದ ಇನಿಂಗ್ಸ್​ನಲ್ಲಿ 14 ಬೌಂಡರಿ ಮತ್ತು 4 ಸಿಕ್ಸರ್​ ಸಿಡಿಯಿತು. ಬಾಬರ್​ ಮತ್ತು ಇಫ್ತಿಕರ್ ಸೇರಿಕೊಂಡು 214 ರನ್​ಗಳನ್ನು ರಾಶಿ ಹಾಕಿದರು. ಇದು ಏಕದಿನ ಕ್ರಿಕೆಟ್​ನಲ್ಲಿ ಬಾಬರ್​ ಬಾರಿಸಿದ 19ನೇ ಶತಕವಾಗಿದೆ.

ಪಂದ್ಯ ಗೆದ್ದ ಪಾಕ್​

ಮುಲ್ತಾನ್​ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ಬುಧವಾರ ನಡೆದ ಈ ಪಂದ್ಯದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದುಕೊಂಡ ಪಾಕಿಸ್ತಾನಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. 25 ರನ್​ ಆಗುವಷ್ಟರಲ್ಲಿ ಆರಂಭಿಕರಿಬ್ಬರ ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ವೇಳೆ ನಾಯಕ ನಾಯಕ ಬಾಬರ್​ ಅಜಂ(151) ಮತ್ತು ಇಫ್ತಿಕರ್​ ಅಹ್ಮದ್(109*) ಸೇರಿಕೊಂಡು​ ಶತಕ ಬಾರಿಸಿ ತಂಡಕ್ಕೆ ಆಸರೆಯಾದರು ಉಭಯ ಆಟಗಾರರ ಈ ಆಟದ ನೆರವಿನಿಂದ ಪಾಕ್​ ನಿಗದಿತ 50 ಓವರ್​ಗಳಲ್ಲಿ 6 ವಿಕೆಟ್​ ಕಳೆದುಕೊಂಡು 342 ರನ್​ ಗಳಿಸಿತು. ಬೃಹತ್​ ಮೊತ್ತವನ್ನು ಬೆನ್ನಟ್ಟಿದ ನೇಪಾಳ 23.4 ಓವರ್​ಗಳಲ್ಲಿ 204 ರನ್​ ಗಳಿಸಿ ಸೋಲು ಕಂಡಿತು.