ಮುಂಬಯಿ : ದಬಾಂಗ್ ಡೆಲ್ಲಿ ತಂಡದ ವಿರುದ್ಧ 56-24 ಅಂಕಗಳ ಭಾರೀ ಅಂತರದ ವಿಜಯ ಸಾಧಿಸಿದ ಬೆಂಗಳೂರು ಬುಲ್ಸ್ ತಂಡ ಪ್ರೊ ಕಬಡ್ಡಿ ಲೀಗ್ನ 9ನೇ ಆವೃತ್ತಿಯಲ್ಲಿ (Pro Kabaddi League) ಸೆಮಿ ಫೈನಲ್ಸ್ಗೆ ಲಗ್ಗೆ ಇಟ್ಟಿದೆ. ಮಂಗಳವಾರ ಇಲ್ಲಿನ ಡೋಮ್ ಎನ್ಎಸ್ಸಿಐ ಎಸ್ವಿಪಿ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಆರಂಭದಿಂದಲೇ ಆಕ್ರಮಣಕಾರಿ ಆಟವಾಡಿದ ಬೆಂಗಳೂರು ಬಳಗ ಸುಲಭ ಜಯ ತನ್ನದಾಗಿಸಿಕೊಂಡಿತು.
ಪಂದ್ಯ ಆರಂಭಗೊಂಡ ಕ್ಷಣದಿಂದಲೇ ಮುನ್ನುಗ್ಗಲು ಆರಂಭಿಸಿದ ಬೆಂಗಳೂರು ಗೂಳಿ, ಕೊನೇ ತನಕವೂ ಅದೇ ಮಾದರಿಯ ಪ್ರದರ್ಶನ ನೀಡಿತು. ರೇಡಿಂಗ್ ಹಾಗೂ ಡಿಫೆನ್ಸ್ನಲ್ಲಿ ಹಿಡಿದ ಸಾಧಿಸಿದ ಬೆಂಗಳೂರು ಬಳಗದ ಆಟಗಾರರು ಎದುರಾಳಿ ತಂಡವನ್ನು ನಾಲ್ಕು ಬಾರಿ ಆಲ್ಔಟ್ ಮಾಡಿತು.
ಪ್ರಥಮಾರ್ಧ ಮುಕ್ತಾಯದ ವೇಳೆಗೆ ಬುಲ್ಸ್ ಬಳಗ 31-15 ಅಂಕಗಳ ಮುನ್ನಡೆ ಪಡೆದುಕೊಂಡಿತ್ತು. ಈ ಅವಧಿಯಲ್ಲಿ ಎರಡು ಬಾರಿ ಡೆಲ್ಲಿ ತಂಡದ ಕೋರ್ಟ್ ಖಾಲಿ ಮಾಡಿಸಿತು. ಅದೇ ಮಾದರಿಯ ಪ್ರದರ್ಶನ ಮುಂದುವರಿಸಿ ದ್ವಿತೀಯಾರ್ಧದಲ್ಲೂ ಎರಡು ಬಾರಿ ಆಲ್ಔಟ್ ಮಾಡಿ ಭರ್ಜರಿ ಗೆಲುವು ತನ್ನದಾಗಿಸಿಕೊಂಡಿತು.
ರೇಡಿಂಗ್ನಲ್ಲಿ ಭರತ್ 15 ಹಾಗೂ ವಿಕಾಸ್ ಕಂಡೋಲಾ 12 ಅಂಕಗಳನ್ನು ತಂದುಕೊಟ್ಟರು. ರಕ್ಷಣಾ ವಿಭಾಗದ ಕಲಿಗಳಾದ ಪಾರ್ಥಿಬನ್ ಏಳು ಅಂಕ ಹಾಗೂ ಸೌರಭ್ 05 ಅಂಕ ಸಂಪಾದಿಸಿದರು.
ಗುರುವಾರ ನಡೆಯಲಿರುವ ಸೆಮಿ ಫೈನಲ್ ಹಣಾಹಣಿಯಲ್ಲಿ ಬಲಿಷ್ಠ ಜೈಪುರ ಪಿಂಕ್ ಪ್ಯಾಂಥರ್ಸ್ ಬಳಗಕ್ಕೆ ಬೆಂಗಳೂರು ತಂಡ ಎದುರಾಗಲಿದೆ.