ಬೆಂಗಳೂರು: ಆಲ್ರೌಂಡ್‌ ಪ್ರದರ್ಶನ ತೋರಿದ ಬೆಂಗಳೂರು ಬುಲ್ಸ್ ತಂಡ ಮನೆಯಂಗಣದಲ್ಲಿ ತಮಿಳ್ ತಲೈವಾಸ್‌ ವಿರುದ್ಧ 45-28 ಅಂತರದಲ್ಲಿ ಭರ್ಜರಿ ಗೆಲುವು ಸಾಧಿಸಿದೆ. ಭರತ್‌ ಅವರ ಸೂಪರ್ ಟೆನ್‌ (12) ಹಾಗೂ ವಿಕಾಶ್‌ ಕಂಡೋಲ (7) ಅವರ ಅದ್ಭುತ ರೇಡಿಂಗ್ ನೆರವಿನಿಂದ ಬೆಂಗಳೂರು ಬುಲ್ಸ್, ಪ್ರೊ ಕಬಡ್ಡಿ (Pro Kabaddi) ಪಂದ್ಯದಲ್ಲಿ ತಮಿಳ್ ತಲೈವಾಸ್‌ ವಿರುದ್ಧ ಜಯ ಗಳಿಸಿತು.
ತಮಿಳ್ ತಲೈವಾಸ್‌ ಪವನ್‌ ಸೆಹ್ರಾವತ್ ಇಲ್ಲದೆ ಮತ್ತೊಂದು ಪಂದ್ಯವನ್ನು ಸೋತಿತು. ತಂಡದ ಪರ ನರೇಂದರ್‌ ರೇಡಿಂಗ್‌ನಲ್ಲಿ ಸೂಪರ್ ಟೆನ್‌ ಸಾಧನೆ ಮಾಡಿದರೂ ತಂಡವನ್ನು ಸೋಲಿನಿಂದ ಪಾರು ಮಾಡು ಸಾಧ್ಯವಾಗಲಿಲ್ಲ. ಬುಲ್ಸ್ ನಾಯಕ ಮಹೇಂದರ್‌ ಸಿಂಗ್‌ ಮತ್ತು ಸೌರಭ್‌ ನಂದಾಲ್‌ ಟ್ಯಾಕಲ್‌ನಲ್ಲಿ ತಲಾ 3 ಅಂಕ ಗಳಿಸಿ ಜಯದಲ್ಲಿ ಪ್ರಮುಖ ಪಾತ್ರವಹಿಸಿದರು.
ಪ್ರಥಮಾರ್ಧದಲ್ಲಿ ಬುಲ್ಸ್ ಮುನ್ನಡೆ
ಆರಂಭದಿಂದಲೂ ಉತ್ತಮ ಪ್ರದರ್ಶನ ತೋರಿದ ಬೆಂಗಳೂರು ಬುಲ್ಸ್ ತಂಡ ತಮಿಳ್ ತಲೈವಾಸ್‌ ವಿರುದ್ಧ ಪ್ರಥಮಾರ್ಧದಲ್ಲಿ 18-12 ಅಂತರದಲ್ಲಿ ಮುನ್ನಡೆ ಕಾಯ್ದುಕೊಂಡಿತು. ತಮಿಳ್ ತಲೈವಾಸ್‌ ಆರಂಭದಲ್ಲಿ ಬೃಹತ್‌ ಅಂತರದಲ್ಲಿ ಹಿನ್ನಡೆ ಕಂಡಿತ್ತು, ಆದರೆ ದ್ವಿತೀಯಾರ್ಧದಲ್ಲಿ ಹಿಡಿತ ಸಾಧಿಸಿ ಅಂಕಗಳ ಅಂತರ ಕಡಿಮೆ ಮಾಡಿಕೊಂಡಿತು. ಬೆಂಗಳೂರು ಬುಲ್ಸ್ ಪರ ಭರತ್‌ ಹಾಗೂ ನೀರಜ್‌ ನರ್ವಾಲ್‌ ತಲಾ 5 ರೇಡಿಂಗ್ ಅಂಕ ಗಳಿಸಿ ಪ್ರಥಮಾರ್ಧದ ಮುನ್ನಡೆಗೆ ನೆರವಾದರು. ಸತತ ಎರಡು ಪಂದ್ಯದಲ್ಲಿ ಸೋಲು ಕಂಡಿದ್ದ ಬೆಂಗಳೂರು ಬುಲ್ಸ್ ಈ ಗೆಲುವಿನೊಂದಿಗೆ ಆತ್ಮವಿಶ್ವಾಸ ಹೆಚ್ಚಿಸಿದೆ. ಅದರಂತೆ ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಿಂದ 3ನೇ ಸ್ಥಾನಕೇರಿದೆ.
ಇದನ್ನೂ ಓದಿ | Pro Kabaddi | ಚಂದ್ರನ್ ರಂಜಿತ್ ಸೂಪರ್ ರೇಡಿಂಗ್ ಸಾಹಸಕ್ಕೆ ಮಣಿದ ಯುಪಿ ಯೋಧಾ