ಬೆಂಗಳೂರು: ಇಲ್ಲಿ ನಡೆಯುತ್ತಿರುವ ಬೆಂಗಳೂರು ಓಪನ್‌ ಟೆನಿಸ್ ಕೂಟದ(Bengaluru Open) ಪ್ರಿ-ಕ್ವಾರ್ಟರ್‌ಫೈನಲ್‌ನ ಹೋರಾಟದಲ್ಲಿ ಆಸ್ಟ್ರೇಲಿಯದ ಮ್ಯಾಕ್ಸ್‌ ಪುರ್ಸೆಲ್‌ ವಿರುದ್ಧ ಭಾರತದ ಸುಮಿತ್ ನಗಲ್ ಸೋಲು ಕಂಡಿದ್ದಾರೆ. ಆದರೆ ಡಬಲ್ಸ್‌ ವಿಭಾಗದಲ್ಲಿ ಅನಿರುದ್ಧ್ ಚಂದ್ರಶೇಖರ್‌ ಮತ್ತು ಎನ್‌. ಪ್ರಶಾಂತ್‌ ಜೋಡಿ ಗೆಲುವಿನೊಂದಿಗೆ ಸೆಮಿಫೈನಲ್ಗೆ ಲಗ್ಗೆ ಇರಿಸಿದ್ದಾರೆ.
ನಗಲ್ ಅವರ ಸೋಲಿನೊಂದಿಗೆ ಸಿಂಗಲ್ಸ್ ವಿಭಾಗದಲ್ಲಿ ಭಾರತದ ಅಭಿಯಾನ ಅಂತ್ಯಗೊಂಡಿದೆ. ಗುರುವಾರ ನಡೆದ ಈ ಪಂದ್ಯದಲ್ಲಿ ನಗಲ್ ಅವರು ವಿಂಬಲ್ಡನ್‌ ಡಬಲ್ಸ್‌ ಚಾಂಪಿಯನ್‌ ಮ್ಯಾಕ್ಸ್‌ ಪುರ್ಸೆಲ್‌ ವಿರುದ್ಧ 4-6, 6-3, 6-3 ಅಂತರದಿಂದ ಶರಣಾಗಿ ಹೊರಬಿದ್ದರು. ನಗಲ್ ಮೊದಲ ಸೆಟ್ ಗೆಲ್ಲುವ ಮೂಲಕ ಎದುರಾಳಿಗೆ ಪ್ರಬಲ ಹೊಡೆತ ನೀಡಿದ್ದರು. ಆದರೆ ಮುಂದಿನ ಸೆಟ್ನಲ್ಲಿ ಇದೇ ಆಟವನ್ನು ಮುಂದುವರಿಸುವಲ್ಲಿ ಎಡವಿದ ಅವರು ಅಂತಿಮವಾಗಿ ಸೋಲು ಕಾಣುವಂತಾಯಿತು.
ಡಬಲ್ಸ್‌ ವಿಭಾಗದಲ್ಲಿ ಭಾರತದ ಅನಿರುದ್ಧ್ ಮತ್ತು ಪ್ರಶಾಂತ್‌ ಅವರು ಜಿಂಬಾಬ್ವೆಯ ಬೆಂಜಮಿನ್‌ ಲಾಕ್‌ ಮತ್ತು ಆಸ್ಟ್ರೇ ಲಿಯದ ಅಕಿರ ಸ್ಯಾಂಟಿಲನ್‌ ಅವರನ್ನು 3-6, 6-4, 12-10 ಸೆಟ್‌ಗಳಿಂದ ಮಣಿಸಿ ಸೆಮಿಫೈನಲ್ ಹಂತಕ್ಕೇರಿದ್ದಾರೆ.