ಕೋಲ್ಕತ್ತಾ: ಅತ್ಯಂತ ರೋಚಕವಾಗಿ, ಅಭಿಮಾನಿಗಳನ್ನು ತುದಿಗಾಲಲ್ಲಿ ನಿಲ್ಲುವಂತೆ ಮಾಡಿದ ಶನಿವಾರದ ದ್ವಿತೀಯ ಐಪಿಎಲ್ ಪಂದ್ಯದಲ್ಲಿ ಕೊನೆಗೂ ಕೋಲ್ಕತ್ತಾ ನೈಟ್ ರೈಡರ್ಸ್(KKR vs SRH) ತಂಡದ ಕೈ ಮೇಲಾಗಿದೆ. ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ 4 ರನ್ ಅಂತರದಿಂದ ಗೆದ್ದು ನಿಟ್ಟುಸಿರುಬಿಟ್ಟಿದೆ. ಕೆಕೆಆರ್ ಪರ ವಿಂಡೀಸ್ ದೈತ್ಯ ಆ್ಯಂಡ್ರೆ ರಸೆಲ್(64* ರನ್ ಹಾಗೂ 2 ವಿಕೆಟ್) ಅವರ ಆಲ್ರೌಂಡರ್ ಪ್ರದರ್ಶನ ಮತ್ತು ಹೈದರಾಬಾದ್ ಪರ ಹೆನ್ರಿಕ್‌ ಕ್ಲಾಸೆನ್(63) ಅಸಾಮಾನ್ಯ ಬ್ಯಾಟಿಂಗ್ ಪಂದ್ಯದ ಪ್ರಮುಖ ಹೈಲೆಟ್ಸ್ ಆಗಿತ್ತು.
ಐತಿಹಾಸಿಕ ಈಡನ್‌ ಗಾರ್ಡನ್ಸ್‌ ಸ್ಟೇಡಿಯಂನಲ್ಲಿ ನಡೆದ ಬೃಹತ್ ಮೊತ್ತದ ಪಂದ್ಯಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಕೆಕೆಆರ್(Kolkata Knight Riders) 7 ವಿಕೆಟ್ಗೆ 208 ರನ್ ಬಾರಿಸಿತು. ಬೃಹತ್ ಮೊತ್ತವನ್ನು ದಿಟ್ಟವಾಗಿ ಬೆನ್ನಟ್ಟಿಕೊಂಡು ಹೋದ ಹೈದರಾಬಾದ್(Sunrisers Hyderabad) ತನ್ನ ಪಾಲಿನ ಆಟದಲ್ಲಿ 7 ವಿಕೆಟ್ ಕಳೆದುಕೊಂಡು 204 ರನ್ ಗಳಿಸಿ ಕೇವಲ 4 ರನ್ ಅಂತರದಿಂದ ಸೋಲು ಕಂಡಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟಿಕೊಂಡು ಹೋದ ಹೈದರಾಬಾದ್ ಅಂತಿಮ ಮೂರು ಓವರ್ನಲ್ಲಿ ಗೆಲುವಿಗೆ 60 ರನ್ ಬೇಕಿದ್ದಾಗ ಶಕ್ತಿ ಮೀರಿ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದ ಹೆನ್ರಿಕ್‌ ಕ್ಲಾಸೆನ್ ಪಂದ್ಯವನ್ನು ರೋಚಕ ಹಂತಕ್ಕೆ ಕೊಂಡೊಯ್ದರು. ಅಂತಿಮ ಓವರ್ನಲ್ಲಿ ಗೆಲುವಿಗೆ 13 ರನ್ ಇದ್ದಾಗ ಸಿಕ್ಸರ್ ಬಾರಿಸಿದ ಕ್ಲಾಸೆನ್ ಮುಂದಿನ ಎಸೆತದಲ್ಲಿ ಒಂದು ರನ್ ತೆಗೆದರು. ಆದರೆ ಮುಂದಿನ ಎಸೆತದಲ್ಲಿ ಶಹಬಾಜ್ ಅಹ್ಮದ್ ವಿಕೆಟ್ ಕೈಚೆಲ್ಲಿದರು. ಬಳಿಕ ಬಂದ ಜಾನ್ಸೆನ್ ಒಂದು ರನ್ ತೆಗೆದು ಮತ್ತೆ ಕ್ಲಾಸೆನ್ಗೆ ಕ್ರೀಸ್ ನೀಡಿದರು. 2 ಎಸೆತಗಳ ಮುಂದೆ 5 ರನ್ ತೆಗೆಯುವ ಸವಾಲನ್ನು ಕ್ಲಾಸೆನ್ ಮೆಟ್ಟಿನಿಂತು ಹೈದರಾಬಾದ್ಗೆ ಸ್ಮರಣೀಯ ಗೆಲುವು ತಂದು ಕೊಡುತ್ತಾರೆ ಎಂದು ನಿರೀಕ್ಷೆ ಮಾಡಿದಾಗಲೇ ಅವರ ವಿಕೆಟ್ ಕೂಡ ಬಿತ್ತು. ಆದರೂ ಪಂದ್ಯ ಹೈದರಾಬಾದ್ ಕಡೆಯೇ ಇತ್ತು. ಏಕೆಂದರೆ ಬ್ಯಾಟಿಂಗ್ಗೆ ಬಂದದ್ದು ಪ್ಯಾಟ್ ಕಮಿನ್ಸ್. ಆದರೆ ಅಂತಿಮ ಎಸೆತವನ್ನು ಡಾಟ್ ಎಸೆದ ಹರ್ಷಿತ್ ರಾಣ ಕೆಕೆಆರ್ಗೆ ಸ್ಮರಣೀಯ ಗೆಲುವು ತಂದುಕೊಟ್ಟರು.
ಕನ್ನಡಿಗ ಮಯಾಂಕ್ ಅಗರ್ವಾಲ್ ಮತ್ತು ಅಭಿಷೇಕ್ ಶರ್ಮ ಉತ್ತಮ ಆರಂಭ ನೀಡಿದರು. ಈ ಜೋಡಿ ಬಿರುಸಿನ ಬ್ಯಾಟಿಂಗ್ ನಡೆಸಿ ಮೊದಲ ವಿಕೆಟ್ಗೆ 60 ರನ್ ಕಲೆಹಾಕಿತು. ಅಗರ್ವಾಲ್ 21 ಎಸೆತಗಳಿಂದ 32 ರನ್ ಬಾರಿಸಿದರೆ, ಅಭಿಷೇಕ್ ಕೂಡ 32 ರನ್ ಗಳಿಸಿದರು. ಉಭಯ ಆಟಗಾರರ ವಿಕೆಟ್ ಪತನದ ಬಳಿಕ ಯಾರು ಕೂಡ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸುವಲ್ಲಿ ಯಶಸ್ಸು ಕಾಣಲಿಲ್ಲ. ಇದು ತಂಡಕ್ಕೆ ಹಿನ್ನಡೆಯಾಯಿತು. ಕೆಕೆಆರ್ ಪರ ಬೌಲಿಂಗ್ನಲ್ಲಿಯೂ ಮಿಂಚಿದ ರೆಸಲ್(Andre Russell) 2 ಓವರ್ ಎಸೆದು 25 ರನ್ ವೆಚ್ಚದಲ್ಲಿ ಪ್ರಮುಖ 2 ವಿಕೆಟ್ ಕಿತ್ತರು.
Heinrich Klaasen with 2️⃣ maximums 💥
— IndianPremierLeague (@IPL) March 23, 2024
With 4️⃣ overs to go, #SRH need plenty of these
Watch the match LIVE on @JioCinema and @StarSportsIndia 💻📱
Follow the match ▶️ https://t.co/xjNjyPa8V4 #TATAIPL | #KKRvSRH pic.twitter.com/9shCsI1kTa
ಸಿಕ್ಸರ್ಗಳ ಸುರಿಮಳೆಗೈದ ರಸೆಲ್
ಮೊದಲು ಇನಿಂಗ್ಸ್ ಆರಂಭಿಸಿದ ಕೆಕೆಆರ್ ಕೇವಲ 51 ರನ್ಗೆ 4 ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತಕ್ಕೆ ಸಿಲುಕಿತು. ಸುನೀಲ್ ನರೈನ್(2), ನಾಯಕ ಶ್ರೇಯಸ್ ಅಯ್ಯರ್(0), ವೆಂಕಟೇಶ್ ಅಯ್ಯರ್(7), ನಿತೇಶ್ ರಾಣಾ(9) ಘೋರ ಬ್ಯಾಟಿಂಗ್ ವೈಫಲ್ಯ ಕಂಡು ಪೆವಿಲಿಯನ್ ಪರೇಡ್ ನಡೆಸಿದರು. ಒಂದೆಡೆ ವಿಕೆಟ್ ಬೀಳುತ್ತಿದ್ದರೂ ಆರಂಭಿಕ ಆಟಗಾರ ಫಿಲ್ ಸಾಲ್ಟ್ ದಿಟ್ಟ ರೀತಿಯಲ್ಲಿ ಬ್ಯಾಟಿಂಗ್ ನಡೆಸಿ ಅರ್ಧಧತಕ ಬಾರಿಸಿ ತಂಡದ ಮೊತ್ತವನ್ನು ಹಿಗ್ಗಿಸುತ್ತಿದ್ದರು. ಆದರೆ 54 ರನ್ ಗಳಿಸಿದ ವೇಳೆ ಇವರ ವಿಕೆಟ್ ಕೂಡ ಪತನಗೊಂಡಿತು.
119 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ ವೇಳೆ ಕ್ರೀಸ್ಗಿಳಿದ ಆ್ಯಂಡ್ರೆ ರಸೆಲ್ ಸನ್ರೈಸರ್ಸ್ ಹೈದರಾಬಾದ್ ಬೌಲರ್ಗಳನ್ನು ನಿರ್ದಾಕ್ಷಿಣ್ಯವಾಗಿ ಮನ ಬಂದಂತೆ ಕಾಡಿದರು. ಅದುವರೆಗೂ ಉತ್ತಮ ಸ್ಪೆಲ್ ನಡೆಸಿದ್ದ ಬೌಲರ್ಗಳು ರಸೆಲ್ ಬ್ಯಾಟಿಂಗ್ ಮುಂದೆ ಸರಿಯಾಗಿ ಚಚ್ಚಿಸಿಕೊಂಡರು. ಮೈದಾನದ ಮೂಲೆ ಮೂಲೆಗೂ ಸಿಕ್ಸರ್ ಬಾರಿಸಿದ ರಸೆಲ್ ನೆರೆದಿದ್ದ ಅಭಿಮಾನಿಗಳನ್ನು ಸಂಪೂರ್ಣವಾಗಿ ರಂಜಿಸಿದರು. ಕೇವಲ 20 ಎಸೆತಗಳಲ್ಲಿ ಅರ್ಧಶತಕ ಪೂರ್ತಿಗೊಳಿಸಿದರು.
ANDRE RUSSELL IS UNSTOPPABLE 🔥🤯pic.twitter.com/5VjFhHOKLY
— Johns. (@CricCrazyJohns) March 23, 2024
ಮಯಾಂಕ್ ಮಾರ್ಖಂಡೆ ಅವರ ಒಂದೇ ಓವರ್ನಲ್ಲಿ ಮೂರು ಸಿಕ್ಸರ್ ಬಾರಿಸಿ ಮಿಂಚಿದರು. ಒಟ್ಟಾರೆ ಪಂದ್ಯದಲ್ಲಿ ಬರೋಬ್ಬರಿ 7 ಸಿಕ್ಸರ್ ಸಿಡಿಸಿದರು. ಜತೆಗೆ ಮೂರು ಬೌಂಡರಿ ಕೂಡ ಬಾರಿಸಿ ಅಜೇಯ 64 ರನ್ ಗಳಿಸಿದರು. ಈ ಮೊತ್ತ 25 ಎಸೆತಗಳಲ್ಲಿ ದಾಖಲಾಯಿತು. ಇವರ ಪ್ರದರ್ಶನಕ್ಕೆ ಫ್ರಾಂಚೈಸಿಯ ಒಡೆಯ ಶಾರುಖ್ ಖಾನ್ ಕೂಡ ಗ್ಯಾಲರಿಂದ ತಲೆಬಾಗಿ ನಮಿಸಿದರು. ಇವರಿಗೆ ಸಿಕ್ಸರ್ ಕಿಂಗ್ ಖ್ಯಾತಿಯ ರಿಂಕು ಸಿಂಗ್ ಮತ್ತೊಂದು ತುದಿಯಲ್ಲಿ ಉತ್ತಮ ಸಾಥ್ ನೀಡಿ 15 ಎಸೆತಗಳಲ್ಲಿ 23 ರನ್ ಬಾರಿಸಿದರು.