ನವದೆಹಲಿ: ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿ(ICC World Cup 2023) ಆರಂಭಕ್ಕೆ ಇನ್ನು ಕೇವಲ 48 ದಿನಗಳು ಮಾತ್ರ ಬಾಕಿ ಉಳಿದಿವೆ. ಈಗಾಗಲೇ ಆಸ್ಟ್ರೇಲಿಯಾ ಮತ್ತು ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಸಂಭಾವ್ಯ ತಂಡಗಳನ್ನು ಪ್ರಕಟಿಸಿದೆ. ಇದೀಗ ಪಂದ್ಯಗಳ ಟಿಕೆಟ್ ಬುಕಿಂಗ್ (Tickets For ODI World Cup 2023) ಇನ್ನೇನು ಕೆಲವೇ ದಿನಗಳಲ್ಲಿ ಆರಂಭವಾಗಲಿದೆ. ಅಭ್ಯಾಸ ಪಂದ್ಯಗಳ ಟಿಕೆಟ್(world cup tickets) ಕೂಡ ಸಿಗಲಿದೆ. ಸೆಪ್ಟೆಂಬರ್ 15ರಂದು ಸೆಮಿಫೈನಲ್ ಮತ್ತು ಫೈನಲ್ ಪಂದ್ಯಗಳ ಟಿಕೆಟ್ ಲಭ್ಯವಾಗಲಿದೆ. ಉಳಿದಂತೆ ಎಲ್ಲ ಪಂದ್ಯಗಳ ಟಿಕೆಟ್ ಯಾವ ದಿನಾಂಕದಂದು ಲಭ್ಯವಾಗಲಿದೆ, ಎಲ್ಲಿ ಟಿಕೆಟ್ ಬುಕಿಂಗ್(icc world cup 2023 tickets booking) ಮಾಡಬಹುದು ಎಂಬ ಎಲ್ಲ ಮಾಹಿತಿ ಇಂತಿದೆ.
ಆಗಸ್ಟ್ 25ಕ್ಕೆ ಮೊದಲ ಹಂತ
ಆಗಸ್ಟ್ 25ರಿಂದ ಟಿಕೆಟ್ ಬುಕ್ಕಿಂಗ್ ಕಾರ್ಯ ಆರಂಭವಾಗಲಿದೆ. ಆದರೆ ಇಲ್ಲಿ ಭಾರತವನ್ನು ಹೊರತುಪಡಿಸಿ ಉಳಿದ ತಂಡಗಳ ನಡುವಿನ ಅಭ್ಯಾಸ ಮತ್ತು ಪ್ರಧಾನ ಪಂದ್ಯಗಳ ಟಿಕೆಟ್ಗಳನ್ನು ಮಾತ್ರ ಬುಕಿಂಗ್ ಮಾಡಬಹುದಾಗಿದೆ. ಇಂಗ್ಲೆಂಡ್, ಆಸ್ಟ್ರೇಲಿಯಾ, ಪಾಕಿಸ್ತಾನ, ನ್ಯೂಜಿಲ್ಯಾಂಡ್, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ, ಬಾಂಗ್ಲಾದೇಶ, ಅಫಘಾನಿಸ್ತಾನ ಮತ್ತು ನೆದರ್ಲ್ಯಾಂಡ್ಸ್ ನಡುವಿನ ಪಂದ್ಯಗಳ ಟಿಕೆಟ್ ಲಭ್ಯವಾಗಲಿದೆ.
ಇದನ್ನೂ ಓದಿ ICC World Cup Trophy: ಪ್ರೀತಿಯ ಸಂಕೇತ ತಾಜ್ ಮಹಲ್ ಎದುರು ಕಂಗೊಳಿಸಿದ ವಿಶ್ವಕಪ್ ಟ್ರೋಫಿ
ಭಾರತ ಪಂದ್ಯಗಳ ಟಿಕೆಟ್
ದ್ವಿತೀಯ ಹಂತದಲ್ಲಿ ಭಾರತ ತಂಡದ ಅಭ್ಯಾಸ ಮತ್ತು ಲೀಗ್ ಪಂದ್ಯಗಳ ಟಿಕೆಟ್ ಮಾರಾಟವಾಗಲಿದೆ. ಅಭ್ಯಾಸ ಪಂದ್ಯಗಳ ಟಿಕೆಟ್ಗಳು ಆಗಸ್ಟ್ 30 ರಂದು ಪ್ರಾರಂಭವಾದರೆ, ಲೀಗ್ ಹಂತದ ಪಂದ್ಯಗಳು ಆಗಸ್ಟ್ 31 ರಿಂದ ಲಭ್ಯವಿರುತ್ತವೆ. ಕ್ರಿಕೆಟ್ ಅಭಿಮಾನಿಗಳು ಕಾತರದಿಂದ ಕಾದು ಕುಳಿತಿರುವ ಅಕ್ಟೋಬರ್ 14 ರಂದು ನಡೆಯಲಿರುವ ಭಾರತ ಮತ್ತು ಪಾಕಿಸ್ತಾನ(ickets For world cup india vs pak) ಪಂದ್ಯದ ಟಿಕೆಟ್ಗಳನ್ನು ಸೆಪ್ಟೆಂಬರ್ 3 ರಂದು ಬುಕ್ ಮಾಡಬಹುದು.
ಇಲ್ಲಿ ನೋಂದಣಿ ಮಾಡಿಸಿ
“ವಿಶ್ವಕಪ್ ಟೂರ್ನಿಯ ಅಧಿಕೃತ ಟಿಕೆಟ್ಗಳ ಮಾಹಿತಿ ಮತ್ತು ಅಪ್ಡೇಟ್ಸ್ ಸ್ವೀಕರಿಸಲು ಅಭಿಮಾನಿಗಳು ಐಸಿಸಿ ವೆಬ್ಸೈಟ್ https://www.cricketworldcup.com/register ಲಿಂಕ್ ಮೂಲಕ ನೋಂದಾಯಿಸಿಕೊಳ್ಳಬಹುದು ಎಂದು ಬಿಸಿಸಿಐ ಸಿಇಒ ಹೇಮಾಂಗ್ ಅಮೀನ್ ಹೇಳಿದ್ದಾರೆ. ಆಗಸ್ಟ್ 15ರಿಂದ ನೋಂದಾಯಿಸಲು ಅವಕಾಶ ಸಿಗಲಿದೆ. ಇದೇ ವಿಚಾರವಾಗಿ ಪ್ರತಿಕ್ರಿಯೆ ನೀಡಿದ ಹೇಮಾಂಗ್ ಅಮೀನ್, ‘ಟಿಕೆಟ್ ಮಾರಾಟದ ದಿನಾಂಕವನ್ನು ಘೋಷಿಸಲು ನಾವು ಸಂತೋಷಪಡುತ್ತೇವೆ. ಕೆಲವು ತಿದ್ದುಪಡಿಗಳ ನಂತರ ವೇಳಾಪಟ್ಟಿಯನ್ನು ಈಗ ಅಂತಿಮಗೊಳಿಸಲಾಗಿದೆ. ಕಾತರದಿಂದ ಕಾಯುತ್ತಿದ್ದ ಅಭಿಮಾನಿಗಳು ಈಗ ಟಿಕೆಟ್ ಖರೀದಿಸುವುದಕ್ಕೆ ದಿನಾಂಕ ನಿಗದಿಯಾಗಿದೆ. ಇದರಿಂದ ಅವರ ಕುತೂಹಲ ಇನ್ನಷ್ಟು ಅಧಿಕವಾಗಿರಬಹುದು’ ಹೇಳಿದರು.
ಟಿಕೆಟ್ ಎಲ್ಲಿ ಲಭ್ಯ
ಎಲ್ಲ ಟಿಕೆಟ್ಗಳನ್ನು ಐಸಿಸಿಯ ಅಧಿಕೃತ ವೆಬ್ಸೈಟ್ಗಳಲ್ಲಿ ಬುಕಿಂಗ್ ಮಾಡಬಹುದು. ಇದರ ಜತೆಗೆ ಬುಕ್ ಮೈ ಶೋ ಹಾಗೂ ಪೇಟಿಯಂನಲ್ಲಿಯೂ ಟಿಕೆಟ್ ಲಭ್ಯವಿರಲಿದೆ.
ಭಾರತ ಪಂದ್ಯಗಳ ಟಿಕೆಟ್ ಮಾರಾಟದ ಮಾಹಿತಿ
ಆಗಸ್ಟ್ 30: ತಿರುವನಂತಪುರ ಮತ್ತು ಗುವಾಹಟಿ ನಡೆಯಲಿರುವ ಭಾರತದ ಅಭ್ಯಾಸ ಪಂದ್ಯಗಳ ಟಿಕೆಟ್ ಮಾರಾಟ ಈ ದಿನಾಂಕದಂದು ಲಭ್ಯವಾಗಲಿದೆ. ಈ ಎರಡೂ ಮೈದಾನಗಳಲ್ಲಿ ಲೀಗ್ ಪಂದ್ಯಗಳು ನಡೆಯುವುದಿಲ್ಲ.
ಆಗಸ್ಟ್ 31: ಆಸ್ಟ್ರೇಲಿಯಾ ವಿರುದ್ಧ ಚೆನ್ನೈಯಲ್ಲಿ ನಡೆಯುವ ಪಂದ್ಯ, ದೆಹಲಿಯಲ್ಲಿ ಅಫಘಾನಿಸ್ತಾನ ವಿರುದ್ಧ ಮತ್ತು ಪುಣೆಯಲ್ಲಿ ಬಾಂಗ್ಲಾದೇಶದ ವಿರುದ್ಧ ನಡೆಯಲಿರುವ ಪಂದ್ಯಗಳ ಟಿಕೆಟ್ ಮಾರಾಟವಾಗಲಿದೆ.
ಸೆಪ್ಟೆಂಬರ್ 1: ಧರ್ಮಶಾಲಾದಲ್ಲಿ ನ್ಯೂಜಿಲ್ಯಾಂಡ್ ವಿರುದ್ಧ, ಲಕ್ನೋದಲ್ಲಿ ಇಂಗ್ಲೆಂಡ್ ವಿರುದ್ಧ ಮುಂಬಯಿಯಲ್ಲಿ ಶ್ರೀಲಂಕಾ ವಿರುದ್ಧ ನಡೆಯಲಿರುವ ಪಂದ್ಯಗಳ ಟಿಕೆಟ್ ಮಾರಾಟವಾಗಲಿದೆ.
ಸೆಪ್ಟೆಂಬರ್ 2: ನೆದರ್ಲೆಂಡ್ಸ್ ವಿರುದ್ಧ ಬೆಂಗಳೂರಲ್ಲಿ ನಡೆಯುವ, ಕೋಲ್ಕತ್ತಾದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಏರ್ಪಡಲಿರುವ ಪಂದ್ಯಗಳ ಟಿಕೆಟ್ ಮಾರಾಟ ದೊರೆಯಲಿದೆ.
ಸೆಪ್ಟೆಂಬರ್ 3: ಹೈವೋಲ್ಟೇಜ್ ಪಂದ್ಯವಾದ ಭಾರತ ಮತ್ತು ಪಾಕಿಸ್ತಾನ ವಿರುದ್ಧದ ಅಹಮದಾಬಾದ್ನಲ್ಲಿ ನಡೆಯುವ ಪಂದ್ಯದ ಟಿಕೆಟ್ ಮಾರಾಟವಾಗಲಿದೆ.
ಟೂರ್ನಿ ಯಾವಾಗ ಆರಂಭ
ಸಂಪೂರ್ಣವಾಗಿ ಭಾರತ ಆತಿಥ್ಯದಲ್ಲಿ ಇದೇ ಮೊದಲ ಬಾರಿಗೆ ನಡೆಯುವ ಈ ಮಹತ್ವದ ವಿಶ್ವಕಪ್ ಟೂರ್ನಿ ಅಕ್ಟೋಬರ್ 5ರಿಂದ ನವೆಂಬರ್ 19ರ ವರೆಗೆ ನಡೆಯಲಿದೆ. ಟೂರ್ನಿಯ ಉದ್ಘಾಟನ ಪಂದ್ಯ ಮತ್ತು ಫೈನಲ್ ಪಂದ್ಯಗಳೆರಡು ಅಹಮದಾಬಾದ್ನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಮತ್ತು ನ್ಯೂಜಿಲ್ಯಾಂಡ್ ತಂಡಗಳು ಮುಖಾಮುಖಿಯಾಗುವ ಮೂಲಕ ಟೂರ್ನಿಗೆ ಚಾಲನೆ ಸಿಗಲಿದೆ.