ಚೆನ್ನೈ: ಟೀಮ್ ಇಂಡಿಯಾದ ವೇಗದ ಬೌಲರ್ ದೀಪಕ್ ಚಾಹರ್ (Deepak Chahar) ಗಾಯದ ಸಮಸ್ಯೆಯಿಂದ ಸುಧಾರಿಸಿಕೊಂಡಿದ್ದು, ಮುಂಬರುವ ಐಪಿಎಲ್ ಟೂರ್ನಿಯಲ್ಲಿ ಆಡುವುದಾಗಿ ಹೇಳಿಕೊಂಡಿದ್ದಾರೆ. ಎರಡೆರಡು ಬಾರಿ ಗಾಯದ ಸಮಸ್ಯೆಗೆ ಒಳಗಾಗಿದ್ದ ಅವರು ಸಂಪೂರ್ಣ ಸುಧಾರಿಸಿಕೊಂಡಿರುವುದಾಗಿ ಅವರು ತಿಳಿಸಿದ್ದಾರೆ. ಇದೇ ವೇಳೆ ಅವರು ತಾವು ಒಂದು ವರ್ಷ ಅನುಭವಿಸಿದ ನೋವಿನ ಸಮಸ್ಯೆ ಬಗ್ಗೆಯೂ ಪಿಟಿಐ ಜತೆ ಮಾತನಾಡುತ್ತಾ ವಿವರಿಸಿದ್ದಾರೆ.
ದೀಪಕ್ ಚಾಹರ್ 2022ರ ಸಾಲಿನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪರವಾಗಿ ಆಡಬೇಕಾಗಿತ್ತು. ಆದರೆ ಅದಕ್ಕಿಂತ ಮೊದಲು ಒತ್ತಡ ಗಾಯಕ್ಕೆ ಒಳಗಾಗಿ ಪೂರ್ಣ ಟೂರ್ನಿಯಲ್ಲಿ ಆಡಲು ಸಾಧ್ಯವಾಗಿರಲಿಲ್ಲ. ಸುಧಾರಿಸಿಕೊಂಡ ಅವರು ಟಿ20 ವಿಶ್ವ ಕಪ್ನಲ್ಲಿ ಭಾರತ ತಂಡದ ಮೀಸಲು ಬೌಲರ್ ಆಗಿ ತಂಡ ಸೇರಿಕೊಂಡಿದ್ದರು. ಆದರೆ, ಮತ್ತೆ ಗ್ರೇಡ್ 3 ಟಿಯರ್ ಸಮಸ್ಯೆಗೆ ಒಳಗಾದ ಅವರು ಮತ್ತೆ ಕ್ರಿಕೆಟ್ನಿಂದ ದೂರ ಉಳಿಯುವಂತಾಗಿತ್ತು. ಇದೀಗ ಗಾಯದ ಸಮಸ್ಯೆಯಿಂದ ಗುಣಮುಖರಾಗಿದ್ದು ಐಪಿಎಲ್ಗೆ ಫಿಟ್ ಆಗಿದ್ದೇನೆ ಎಂದು ಹೇಳಿಕೊಂಡಿದ್ದಾರೆ.
ಫಿಟ್ನೆಸ್ಗಾಗಿ ನಾನು ಕಳೆದ ಮೂರು ತಿಂಗಳಿಂದ ಸತತವಾಗಿ ಪ್ರಯತ್ನ ಮಾಡುತ್ತಿದ್ದೇನೆ. ನಾನು ಈಗ ಫುಲ್ ಫಿಟ್ ಆಗಿದ್ದು ಮುಂದಿನ ಐಪಿಎಲ್ನಲ್ಲಿ ಆಡವುದೇ ನನ್ನ ಗುರಿ. ನನಗೆ ಕಳೆದ ವರ್ಷ ಆಗಿರುವುದು ದೊಡ್ಡ ಮಟ್ಟಿನ ಗಾಯವಾಗಿತ್ತು. ದೀರ್ಘ ಕಾಲ ತಂಡದಿಂದ ದೂರ ಇದ್ದ ನಾನು ಫಿಟ್ನೆಸ್ ಪಡೆದುಕೊಳ್ಳುವುದಕ್ಕೆ ಸಾಕಷ್ಟು ಒದ್ದಾಟ ನಡೆಸಿದ್ದೇನೆ ಎಂಬುದಾಗಿ ದೀಪಕ್ ಚಾಹರ್ ಪಿಟಿಐ ಜತೆ ಮಾತನಾಡುತ್ತಾ ಹೇಳಿದ್ದಾರೆ.
ಒತ್ತಡ ಗಾಯದ ಸಮಸ್ಯೆಗೆ ಒಳಗಾದರೆ ಮತ್ತೆ ಕ್ರಿಕೆಟ್ ಆಡುವಾಗ ಎಚ್ಚರ ವಹಿಸಬೇಕಾಗುತ್ತದೆ. ಸಾಕಷ್ಟು ಬೌಲರ್ಗಳು ಇದೇ ರೀತಿಯ ಒತ್ತಡ ಗಾಯಕ್ಕೆ ಒಳಗಾಗಿ ಪೇಚಾಡುತ್ತಿದ್ದಾರೆ ಎಂಬುದಾಗಿ ಚಾಹರ್ ಹೇಳಿದ್ದಾರೆ.