ನವ ದೆಹಲಿ: ಭಾರತ ಹಾಗೂ ಆಸ್ಟ್ರೇಲಿಯಾ ತಂಡಗಳ ನಡುವಿನ ಟೆಸ್ಟ್ ಸರಣಿ (INDvsAUS) ಎರಡನೇ ಪಂದ್ಯದಲ್ಲಿ ವಿರಾಟ್ ಕೊಹ್ಲಿಗೆ (VIrat kohli) ಮೂರನೇ ಅಂಪೈರ್ ವಿವಾದಾತ್ಮಕ ಔಟ್ ನೀಡುತ್ತಾರೆ. ಇದರಿಂದ ಸಿಡಿಮಿಡಿಗೊಂಡ ಅವರು ಡಗ್ಔಟ್ನಲ್ಲಿ ಕುಳಿತು ಬಗೆಬಗೆಯಾಗಿ ತಮ್ಮ ಕೋಪ ವ್ಯಕ್ತಪಡಿಸಿದ್ದಾರೆ. ಅದೂ ಅಲ್ಲದೆ ಕೋಚ್ ರಾಹುಲ್ ದ್ರಾವಿಡ್ ಅವರ ಜತೆ ಗಂಭೀರ ಚರ್ಚೆ ಮಾಡುತ್ತಾರೆ. ಇಷ್ಟೆಲ್ಲ ಸಿಟ್ಟಲ್ಲಿರುವ ಅವರಿಗೆ ಸಹಾಯಕ ಸಿಬ್ಬಂದಿಯೊಬ್ಬರು ದೆಹಲಿಯ ಜನಪ್ರಿಯ ತಿನಿಸುವ ಚೋಲೇ, ಬಟೂರೆ ತಂದುಕೊಡುತ್ತಾರೆ. ಅದನ್ನು ನೋಡುತ್ತಿದ್ದಂತೆ ಕೊಹ್ಲಿ ನೀಡಿದ ಪ್ರತಿಕ್ರಿಯೆ ವೈರಲ್ ಆಗಿದೆ. ಸಂಜೆಯ ವೇಳೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚೋಲೆ ಬಟೂರೆ ಟ್ರೆಂಡ್ ಆಗಿತ್ತು.
ಡಗ್ಔಟ್ನಲ್ಲಿ ಕುಳಿತು ದ್ರಾವಿಡ್ ಜತೆ ಚರ್ಚೆ ಮಾಡುತ್ತಿದ್ದ ದ್ರಾವಿಡ್ ಬಳಿಗೆ ಚೋಲೆ ಹಾಗೂ ಬಟೋರೆಯ ಪ್ಯಾಕೆಟ್ ಅನ್ನು ಸಹಾಯಕ ಸಿಬ್ಬಂದಿ ತಂದುಕೊಡುತ್ತಾರೆ. ಅಷ್ಟು ಹೊತ್ತು ಗಂಭೀರ ಚರ್ಚೆ ನಡೆಸುತ್ತಿದ್ದ ಕೊಹ್ಲಿ ಪ್ಯಾಕೆಟ್ ನೋಡುತ್ತಿದ್ದಂತೆ ಚಪ್ಪಾಳೆ ತಟ್ಟಿ ಒಳಗೆ ತಂದು ಇಡುವಂತೆ ಸಹಾಯಕ ಸಿಬ್ಬಂದಿಗೆ ಸೂಚಿಸುತ್ತಾರೆ. ಈ ದೃಶ್ಯ ನೇರ ಪ್ರವಾಸದ ಕ್ಯಾಮೆರಾಗಳಲ್ಲಿ ಸರೆಯಾಗಿದೆ.
ವಿರಾಟ್ ಕೊಹ್ಲಿ ಚೋಲೆ, ಬಟೋರೆ ಪ್ರೇಮಿ. ಬಾಲ್ಯದಲ್ಲಿ ಅತಿ ಸಿಕ್ಕಾಪಟ್ಟೆ ಚೋಲೇ, ಬಟೂರೆ ತಿನ್ನುತ್ತಿದ್ದರು. ಅದರೆ, ವೃತ್ತಿಪರ ಕ್ರಿಕೆಟ್ಗೆ ಧುಮುಕಿದ ಬಳಿಕ ಫಿಟ್ನೆಸ್ಗಾಗಿ ಒಂದೊಂದೆ ಜಂಕ್ ಫುಡ್ಗಳನ್ನು ತ್ಯಜಿಸಿದ್ದರು. ಈ ವೇಳೆ ಚೋಲೆ ತಿನ್ನುವುದನ್ನೂ ನಿಲ್ಲಿಸಿದ್ದರು. ಡೈರಿ ಉತ್ಪನ್ನಗಳ ಸೇವನೆ ಸೇರಿದಂತೆ ಪೂರ್ಣ ಪ್ರಮಾಣದ ಸಸ್ಯಾಹಾರಿ ಎನಿಸಿಕೊಂಡಿದ್ದರು. ಆದರೂ, ದೆಹಲಿಗೆ ಹೋದ ಸಂದರ್ಭದಲ್ಲಿ ಚೋಲೇ, ಬಟೂರೆ ತಿನ್ನುತ್ತಾರೆ. ಅಂತೆಯೇ ಶನಿವಾರ ಸ್ಟೇಡಿಯಮ್ಗೇ ಪಾರ್ಸೆಲ್ ತರಿಸಿಕೊಂಡಿದ್ದರು.
ಏನಿದು ವಿವಾದಾತ್ಮಕ ತೀರ್ಪು?
ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡದ ಆಟಗಾರರು ಸಲ್ಲಿಸಿದ್ದ ಎಲ್ಬಿಡಬ್ಲ್ಯು ಮನವಿಯನ್ನು ಪುರಸ್ಕರಿಸಿದ್ದ ಫೀಲ್ಡ್ ಅಂಪೈರ್ ನಿತಿನ್ ಮೆನನ್ ವಿರಾಟ್ ಕೊಹ್ಲಿ ಔಟ್ ಎಂದು ಘೋಷಿಸಿದ್ದರು. ಚೆಂಡು ಬ್ಯಾಟಿಗೆ ತಗುಲಿದೆ ಎಂದು ಗೊತ್ತಾದ ವಿರಾಟ್ ಕೊಹ್ಲಿ ಡಿಆರ್ಎಸ್ ಮೊರೆ ಹೋದರು. ಅಲ್ಲೂ ಚೆಂಡು ಕಾಲಿಗೆ ಬಡಿಯುವ ಮೊದಲು ಬ್ಯಾಟ್ಗೆ ಬಡಿದಿರುವುದು ಗೊತ್ತಾಗಿತ್ತು. ಆದರೂ ಮೂರನೇ ಅಂಪೈರ್ ಔಟ್ ಎಂದು ಘೋಷಿಸಿದ್ದರು.