ಲಿಸ್ಬನ್ (ಪೋರ್ಚುಗಲ್): ವಿಶ್ವದ ಪ್ರತಿಷ್ಠಿತ ಮೋಟಾರ್ ಸೈಕಲ್ ರೇಸ್ ಆಗಿರುವ ಮೋಟೋ ಜಿಪಿಯ ಮೊದಲ ಸುತ್ತಿನ ರೇಸ್ ಭಾನುವಾರ (ಮಾರ್ಚ್26ರಂದು) ಪೋರ್ಚುಗಲ್ನಲ್ಲಿ ನಡೆಯಿತು. ಫೈನಲ್ ಹಣಾಹಣಿಯಲ್ಲಿ 41 ನಿಮಿಷ, 25 ಸೆಕೆಂಡ್ ಹಾಗೂ 401 ಮಿಲಿ ಸೆಕೆಂಡ್ಗಳಲ್ಲಿ ಗುರಿ ಮುಟ್ಟಿದ ಡುಕಾಟಿ ರೇಸಿಂಗ್ ಸಂಸ್ಥೆಯ ಫ್ರಾನ್ಸೆಸ್ಕೊ ಬ್ಯಾಗ್ನಿಯಾ ಚಾಂಪಿಯನ್ ಪಟ್ಟ ಅಲಂಕರಿಸಿದರು. ಇಟಲಿಯ ಸವಾರರಾಗಿರುವ ಅವರು ಸರಾಸರಿ ಗಂಟೆಗೆ 166.2 ಕಿಲೋ ಮೀಟರ್ ವೇಗದಲ್ಲಿ ಬೈಕ್ ಓಡಿಸಿ ವಿಜೇತರಾದರು. ಈ ಮೂಲಕ 21 ರೇಸ್ಗಳ ಹಾಲಿ ಋತುವಿನ ಮೊದಲ ಟ್ರೋಫಿ ಅವರ ಪಾಲಾಯಿತು. ಫ್ರಾನ್ಸೆಸ್ಕೊ ಕಳೆದ ಆವೃತ್ತಿಯ ಮೊಟೊ ಜಿಪಿ ರೇಸ್ನ ಚಾಂಪಿಯನ್. ಹೀಗಾಗಿ ಮತ್ತೆ ಗೆಲುವಿನ ಓಟವನ್ನು ಅವರು ಮುಂದುವರಿಸಿದರು.
ಒಟ್ಟು 25 ಲ್ಯಾಪ್ಗಳ ರೇಸನ್ನ 3ನೇ ಲ್ಯಾಪ್ನಲ್ಲಿ ಪೋಲ್ನಲ್ಲಿ ಮೊದಲ ಸ್ಥಾನ ಪಡೆದುಕೊಂಡಿದ್ದ ಹೋಂಡಾ ರೇಸಿಂಗ್ ಕಂಪನಿಯ ಮಾರ್ಕ್ ಮಾರ್ಕ್ವೆಜ್ ಅಪಘಾತಕ್ಕೆ ಒಳಗಾದರು. ರೇಸ್ನ ಆರಂಭಿಕ ಗೆರೆಯಲ್ಲಿ ಅವಕಾಶ ಪಡೆಯುವ ಪೋಲ್ ಸಿಟ್ಟರ್ಗಳಿಗೆ ಗೆಲುವಿನ ಅವಕಾಶ ಹೆಚ್ಚಿರುತ್ತದೆ. ಆದರೆ, ಮಾರ್ಕ್ವೆಜ್ ಸ್ವಯಂಕೃತ ಪ್ರಮಾದದಿಂದಾಗಿ ಟ್ರೋಫಿ ಗೆಲ್ಲುವ ಅವಕಾಶ ಕಳೆದುಕೊಂಡರು. ಇದೇ ವೇಳೆ ಅವರು ಸ್ಥಳೀಯ ಪ್ರತಿಭೆ ಮಿಗುಯೆಲ್ ಒಲಿವರ್ ಅವರನ್ನು ಬೈಕ್ಗೆ ಗುದ್ದಿದರು. ಎಪ್ರಿಲಾ ಮೋಟರ್ ರೇಸಿಂಗ್ ಸವಾರರಾಗಿರುವ ಅವರಿಗೂ ಪೋಡಿಯಂ ಫಿನಿಶ್ ಮಾಡುವ ಅವಕಾಶ ತಪ್ಪಿತು.
ಇದನ್ನೂ ಓದಿ : Moto GP : ಜಿಯೊ ಹವಾ; ಜಗತ್ತಿನ ಅತಿ ದೊಡ್ಡ ಮೋಟಾರ್ಸೈಕಲ್ ರೇಸ್ ಉಚಿತ ಪ್ರಸಾರ
ಎಪ್ರಿಲಾ ರೇಸಿಂಗ್ ಕಂಪನಿಯ ಮೇವರಿಕ್ ವಿನಲೆಸ್ 41’26.088 ನಿಮಿಷಗಳಲ್ಲಿ ರೇಸ್ ಮುಗಿಸುವ ಮೂಲಕ ಎರಡನೇ ಸ್ಥಾನ ಪಡೆದುಕೊಂಡರು. ಡುಕಾಟಿ ಸವಾರ ಮಾರ್ಕೊ ಬೆಸೆಚ್ಚಿ 41’28.127 ನಿಮಿಷಗಳಲ್ಲಿ ರೇಸ್ ಮುಗಿಸಿ ಮೂರನೇ ಸ್ಥಾನ ತಮ್ಮದಾಗಿಸಿಕೊಂಡರು. ಡುಕಾಟಿ ಸವಾರರೇ ಆದ ಜಾನ್ ಜಾರ್ಕೊ (41’33.461) ನಾಲ್ಕನೇ ಸ್ಥಾನ ತಮ್ಮದಾಗಿಸಿಕೊಂಡರು. ಮಾರ್ಕ್ ಸಹೋದರ ಅಲೆಕ್ಸ್ ಮಾರ್ಕ್ವೆಜ್ ಡುಕಾಟಿ ರೇಸ್ ಮೂಲಕ (41’33.526) ಐದನೇ ಸ್ಥಾನ ಪಡೆದರು. ಈ ಮೂಲಕ ಪೋರ್ಚುಗಲ್ ಜಿಪಿಯಲ್ಲಿ ಮೊದಲ ಐದು ಸ್ಥಾನಗಳಲ್ಲಿ ಡುಕಾಟಿ ರೇಸಿಂಗ್ ಕಂಪನಿ ನಾಲ್ಕು ಸ್ಥಾನಗಳನ್ನು ತನ್ನದಾಗಿಸಿಕೊಂಡಿತು.
ಮೊಟೊ ಜಿಪಿ ಟ್ವೀಟ್ ಇಲ್ಲಿದೆ
ರೇಸ್ ಬಳಿಕ ಟ್ವೀಟ್ ಮಾಡಿದ ಮಾರ್ಕ್ ಮಾರ್ಕ್ವೆಜ್ ಪೋರ್ಚುಗಲ್ ರೇಸ್ ಅಭಿಮಾನಿಗಳ ಕ್ಷಮೆ ಕೋರಿದ್ದಾರೆ. ಈ ರೇಸ್ನಲ್ಲಿ ಒಲಿವರ್ ಗೆಲ್ಲಬೇಕಾಗಿತ್ತು. ಆದರೆ, ನನ್ನ ತಪ್ಪಿನಿಂದಾಗಿ ಅವರಿಗೆ ಟ್ರೋಫಿ ತಪ್ಪಿತು. ಖಂಡಿತವಾಗಿಯೂ ಅದು ನನ್ನ ತಪ್ಪು. ನನಗೆ ಮಾರ್ಟಿನ್ ಅವರನ್ನು ಓವರ್ಟೇಕ್ ಮಾಡುವ ಉದ್ದೇಶ ಇರಲಿಲ್ಲ. ಎಂದು ಬರೆದುಕೊಂಡಿದ್ದಾರೆ.