ಕತಾರ್: ಫಿಫಾ ವಿಶ್ವ ಕಪ್ ಫೈನಲ್ ಪಂದ್ಯದ ವಿಜಯೋತ್ಸವದ ಬಳಿಕ ಅರ್ಜೆಂಟೀನಾ ತಂಡದ ಗೋಲ್ ಕೀಪರ್ ಎಮಿಲಿಯಾನೊ ಮಾರ್ಟಿನೆಜ್(Emiliano Martinez) ತೋರಿದ ಅನುಚಿತ ವರ್ತನೆಗೆ ಫಿಫಾ ಶಿಸ್ತು ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ ಎಂದು ತಿಳಿದು ಬಂದಿದೆ.
ಕತಾರ್‌ನಲ್ಲಿ ಕಳೆದ ತಿಂಗಳು ಮುಕ್ತಾಯಕಂಡ ಫಿಫಾ ವಿಶ್ವ ಕಪ್ ಟೂರ್ನಿಯ ಫೈನಲ್ನಲ್ಲಿ ಫ್ರಾನ್ಸ್ ವಿರುದ್ಧ ಅರ್ಜೆಂಟೀನಾ ಪೆನಾಲ್ಟಿ ಶೂಟೌಟ್‌ನಲ್ಲಿ 4-2 ಗೋಲುಗಳ ಅಂತರದ ಗೆಲುವು ದಾಖಲಿಸಿ ಮೂರನೇ ಬಾರಿಗೆ ಪ್ರಶಸ್ತಿ ಜಯಿಸಿತ್ತು.
ಇದೇ ವೇಳೆ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ತೋರಿದ ಎಮಿಲಿಯಾನೊ ಮಾರ್ಟಿನೆಜ್ಗೆ ಗೋಲ್ಡನ್ ಗ್ಲವ್ ಪ್ರಶಸ್ತಿ ನೀಡಲಾಯಿತು. ಆದರೆ ಪ್ರಶಸ್ತಿ ಪಡೆದ ಬಳಿಕ ಅವರು ಟ್ರೋಫಿ ಹಿಡಿದುಕೊಂಡು ಅಶ್ಲೀಲ ಸನ್ನೆ ಮಾಡಿದ್ದರು. ಬಳಿಕ ಡ್ರೆಸ್ಸಿಂಗ್ ಕೊಠಡಿಯಲ್ಲಿ ಫ್ರಾನ್ಸ್‌ನ ತಾರೆ ಕಿಲಿಯಾನ್ ಎಂಬಾಪೆ ಅವರನ್ನು ಅಪಹಾಸ್ಯ ಮಾಡಿದ್ದರು. ಅವರ ಈ ವರ್ತನೆಗೆ ವರ್ತನೆ ಭಾರಿ ಆಕ್ರೋಶ ವ್ಯಕ್ತವಾಗಿತ್ತು. ಇಂತಹ ದುರ್ವರ್ತನೆ ತೋರಿದ ಈ ಆಟಗಾರನ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಲಾಗಿತ್ತು.
ಇದೀಗ ಈ ಪ್ರಕರಣಕ್ಕೆ ಸಂಬಂಧಿಸಿ ಆಟಗಾರನ ಈ ನಡವಳಿಕೆ ಬಗ್ಗೆ ತನಿಖೆ ಆರಂಭಿಸಿರುವುದಾಗಿ ಫಿಫಾ ಹೇಳಿದೆ. ಈ ಮೂಲಕ ಎಮಿಲಿಯಾನೊ ಮಾರ್ಟಿನೆಜ್ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ.
ಇದನ್ನೂ ಓದಿ | FIFA World Cup | ಅರ್ಜೆಂಟೀನಾ ಗೋಲ್ ಕೀಪರ್ ವರ್ತನೆಗೆ ಅಭಿಮಾನಿಗಳ ಬೇಸರ