ವಿಂಬಲ್ಡನ್​ ಇತಿಹಾಸದಲ್ಲೇ ಮೊದಲ ಬಾರಿ ಬಣ್ಣದ ಅಂಡರ್ ಶಾರ್ಟ್ಸ್ ಧರಿಸಿ ಆಡಲಿದ್ದಾರೆ ಟೆನಿಸ್​ ಆಟಗಾರ್ತಿಯರು

ಲಂಡನ್​: ಪ್ರತಿಷ್ಠಿತ ಮತ್ತು ಶಿಸ್ತು ಬದ್ಧ ವಿಂಬಲ್ಡನ್ (Wimbledon 2023)​ ಟೆನಿಸ್​ ಟೂರ್ನಿ ಇಂದಿನಿಂದ ಆರಂಭಗೊಳ್ಳಲಿದೆ. ಈ ಬಾರಿ ಮಹಿಳಾ ಆಟಗಾರ್ತಿಯರಿಗೆ ಬಿಗ್ ರಿಲೀಫ್ ಸಿಕ್ಕಿದೆ. ಎಲ್ಲ ಆಟಗಾರರು ಬಿಳಿ ಬಣ್ಣದ ಅಂಡರ್ ಶಾರ್ಟ್ಸ್ ಧರಿಸಬೇಕು ಎಂಬ ನಿಯಮವನ್ನು(wimbledon dress code 2023) ವಿಂಬಲ್ಡನ್ ಆಡಳಿತ ಮಂಡಳಿ ಕಳೆದ ವರ್ಷ ಸಡಿಲಗೊಳಿಸಿತ್ತು. ಬೇರೆ ಬಣ್ಣದ ‘ಅಂಡರ್ ಶಾರ್ಟ್ಸ್’ ಧರಿಸಲು ಅವಕಾಶ ಮಾಡಿಕೊಟ್ಟಿತ್ತು. ಹೀಗಾಗಿ ಈ ಬಾರಿ ಮಹಿಳಾ ಆಟಗಾರ್ತಿಯರು ಯಾವುದೇ ಆತಂಕವಿಲ್ಲದೆ ಕಣಕ್ಕಿಳಿಯಬಹುದಾಗಿದೆ.

ಮಹಿಳಾ ಆಟಗಾರರ ಸಲುವಾಗಿ ನಿಯಮ ಬದಲಾವಣೆ

ಋತುಸ್ರಾವದ ಸಮಯದಲ್ಲಿ ಆಟಗಾರ್ತಿಯರು ಹೆಚ್ಚು ಆರಾಮದಾಯಕವಾಗಿ ಆಡಲು ಅನುವು ಮಾಡಿಕೊಡುವ ಸಲುವಾಗಿ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ವಿಂಬಲ್ಡನ್​ ಮಂಡಳಿ ತಿಳಿಸಿದೆ. ಹೊಸ ನಿಯಮದ ಪ್ರಕಾರ, ಮಹಿಳೆಯರು ಈ ಮೊದಲು ಧರಿಸುತ್ತಿದ್ದ ತಮ್ಮ ಶಾರ್ಟ್ಸ್ ಅಥವಾ ಸ್ಕರ್ಟ್‌ಗಳ ಗಾತ್ರದಲ್ಲೇ ಡಾರ್ಕ್ ಅಥವಾ ಲೈಟ್-ಡಾರ್ಕ್ ಬಣ್ಣದ ‘ಅಂಡರ್‌ಶಾರ್ಟ್ಸ್’ ಧರಿಸಬಹುದಾಗಿದೆ. ಆದರೆ ಈ ನಿಯಮ ಹೊರತುಪಡಿಸಿ ಇನ್ನುಳಿದಂತೆ ಹಳೆಯ ನಿಯಮಗಳು ಹಾಗೆಯೇ ಇರುತ್ತವೆ ಎಂದು ವಿಂಬಲ್ಡನ್ ತಿಳಿಸಿದೆ.

ಇದನ್ನೂ ಓದಿ Wimbledon 2023: ನಿವೃತ್ತಿಯಾಗಿದ್ದರೂ ವಿಂಬಲ್ಡನ್​ನಲ್ಲಿ ಕಣಕ್ಕಿಳಿಯಲಿದ್ದಾರೆ ಸಾನಿಯಾ ಮಿರ್ಜಾ

ಆಲ್ ಇಂಗ್ಲೆಂಡ್ ಕ್ಲಬ್‌ನ ಮುಖ್ಯ ಕಾರ್ಯನಿರ್ವಾಹಕ ಸ್ಯಾಲಿ ಬೋಲ್ಟನ್ ಈ ಬಗ್ಗೆ ಮಾಹಿತಿ ನೀಡಿದ್ದು, “ಆಟಗಾರರನ್ನು ಬೆಂಬಲಿಸಲು ನಾವು ಬದ್ಧರಾಗಿದ್ದೇವೆ. ಈ ನಿಯಮ ಸಡಿಲಿಕೆಯಿಂದ ಮಹಿಳಾ ಆಟಗಾರರ ಆತಂಕ ನಿವಾರಣೆಯಾಗಲಿದ್ದು, ಪ್ರದರ್ಶನದತ್ತ ಸಂಪೂರ್ಣ ಗಮನ ಹರಿಸಬಹುದು” ಎಂದು ಹೇಳಿದ್ದಾರೆ.

ಮೊದಲ ಬಾರಿಗೆ ನಿಯಮ ಬದಲಿಸಿದ ವಿಂಬಲ್ಡನ್​ ಮಂಡಳಿ

ವಿಂಬಲ್ಡನ್ ತನ್ನ ಗ್ರಾಸ್‌ಕೋರ್ಟ್ ಗ್ರ್ಯಾಂಡ್ ಸ್ಲ್ಯಾಮ್ ಇತಿಹಾಸದಲ್ಲೇ ಮೊದಲ ಬಾರಿಗೆ ಈ ನಿಯವನ್ನು ಬ್ರೇಕ್​ ಮಾಡಿದೆ. ಪಂದ್ಯಾವಳಿಗಳಲ್ಲಿ ಸಮಾನತೆಯ ಉದ್ದೇಶದಿಂದ ಎಲ್ಲ ಆಟಗಾರರಿಗೆ ಕಟ್ಟುನಿಟ್ಟಾದ ಬಿಳಿ ಉಡುಪಿನಿಂದಲೇ ಈ ಹಿಂದೆ ಆಡಬೇಕಿತ್ತು. ಆದರೆ ಆಲ್ ಇಂಗ್ಲೆಂಡ್ ಕ್ಲಬ್ WTA, ಬಟ್ಟೆ ಕಂಪನಿಗಳು ಮತ್ತು ವೈದ್ಯಕೀಯ ತಂಡದೊಂದಿಗೆ ಚರ್ಚಿಸಿದ ಬಳಿಕ ತನ್ನ ಹಳೆಯ ನಿಯಮಗಳನ್ನು ಕಳೆದ ವರ್ಷ ನವೀಕರಿಸಿತ್ತು.