ಮುಂಬಯಿ : ಭಾರತ ತಂಡದ (Team India) ವೇಗದ ಬೌಲರ್ ಜಸ್ಪ್ರಿತ್ ಬುಮ್ರಾ ಅವರ ಲಭ್ಯತೆಯ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ಇಲ್ಲ. ಭಾರತ ತಂಡದ ಪ್ರಧಾನ ಬೌಲರ್ ಎನಿಸಿಕೊಂಡಿರುವ ಅವರು ಬೆನ್ನಿನ ಒತ್ತಡ ಗಾಯದಿಂದ ಬಳಲುತ್ತಿದ್ದು, ಪುನಶ್ಚೇತನಕ್ಕೆ ಒಳಪಟ್ಟರೂ ಸುಧಾರಣೆ ಕಂಡಿಲ್ಲ. ಹೀಗಾಗಿ ಅವರು ನ್ಯೂಜಿಲ್ಯಾಂಡ್ಗೆ ತೆರಳ ಸರ್ಜರಿಗೆ ಒಳಪಡಲಿದ್ದಾರೆ. ಅದು ಮುಗಿದು ಪುನಶ್ಚೇತನಕ್ಕೆ ಒಳಪಟ್ಟ ಬಳಿಕ ತಂಡಕ್ಕೆ ಯಾವಾಗ ಮರಳಬಹುದು ಎಂದು ಹೇಳುವುದು ಸಾಧ್ಯ. ಆದರೆ, ಅಲ್ಲಿಯ ತನಕ ಯಾರು ವೇಗದ ಬೌಲಿಂಗ್ ವಿಭಾಗದ ಹೊಣೆಗಾರಿಕೆ ವಹಿಸಿಕೊಳ್ಳುತ್ತಾರೆ ಎಂಬ ಪ್ರಶ್ನೆ ಎದ್ದಿದೆ. ಇದಕ್ಕೆ ಭಾರತ ತಂಡದ ಮಾಜಿ ಆಟಗಾರ ಮದನ್ ಲಾಲ್ ಸೂಕ್ತ ಉತ್ತರ ಕೊಟ್ಟಿದ್ದಾರೆ.
ಭಾರತ ಹಾಗೂ ಆಸ್ಟ್ರೇಲಿಯಾ ತಂಡಗಳ ನಡುವೆ ಟೆಸ್ಟ್ ಸರಣಿ ನಡೆಯುತ್ತಿದ್ದು , ಕೊನೇ ಪಂದ್ಯ ಮುಕ್ತಾಯಗೊಂಡ ಬಳಿಕ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ನ ಫೈನಲ್ಗೆ ಯಾವ ತಂಡ ತೇರ್ಗಡೆಯಾಗಬಹುದು ಎಂದು ನಿರ್ಧಾರವಾಗುತ್ತದೆ. ಆಸ್ಟ್ರೇಲಿಯಾ ತಂಡ ಈಗಾಗಲೇ ಫೈನಲ್ಗೆ ಪ್ರವೇಶ ಪಡೆದಿದ್ದು, ಭಾರತ ತಂಡ ಫೈನಲ್ಗೆ ಪ್ರವೇಶ ಪಡೆಯಲಿರುವ ಸಂಭಾವ್ಯ ತಂಡವಾಗಿದೆ. ಈ ಹಿನ್ನೆಲೆಯಲ್ಲಿ ಮಾತನಾಡಿದ ಮದನ್ಲಾಲ್, ಬುಮ್ರಾ ಅವರ ಲಭ್ಯತೆ ಕನಸನ್ನು ಮರೆತುಬಿಡಿ. ಉಮೇಶ್ಯಾದವ್ ಅವರನ್ನು ಫೈನಲ್ ಪಂದ್ಯಕ್ಕೆ ಸಜ್ಜುಗೊಳಿಸಿ ಎಂದು ಸಲಹೆ ಕೊಟ್ಟಿದ್ದಾರೆ.
ಭಾರತ ತಂಡ ಫೈನಲ್ಗೆ ಪ್ರವೇಶ ಪಡೆಯುವುದು ಖಚಿತ. ಅಲ್ಲಿ ಒಬ್ಬ ಸ್ಪಿನ್ನರ್ ಹಾಗೂ ಮೂರು ವೇಗದ ಬೌಲರ್ ಬೇಕಾಗುತ್ತದೆ. ಮೊಹಮ್ಮದ್ ಸಿರಾಜ್ ಹಾಗೂ ಮೊಹಮ್ಮದ್ ಶಮಿ ಆಡುವುದಕ್ಕೆ ಸಜ್ಜಾಗಿದ್ದಾರೆ. ಹೀಗಾಗಿ ಬುಮ್ರಾ ಲಭ್ಯತೆ ಮೇಲೆ ಮೂರನೇ ಬೌಲರ್ ಯಾರೆಂಬುದನ್ನು ನಿರ್ಧರಿಸುವುದು ಬೇಡ. ಬುಮ್ರಾ ಅವರ ಸೇವೆಯನ್ನು ಮರೆತುಬಿಡಿ. ಉಮೇಶ್ ಯಾದವ್ ಅವರು ಫೈನಲ್ ಪಂದ್ಯದಲ್ಲಿ ಆಡುವಂತೆ ನೋಡಿಕೊಳ್ಳಿ ಎಂದು ಸ್ಪೋರ್ಟ್ಸ್ ಟಾಕ್ನಲ್ಲಿ ಮಾತನಾಡುತ್ತಾ ಹೇಳಿದ್ದಾರೆ.
ಇದನ್ನೂ ಓದಿ : Umesh Yadav: ತಂದೆಯನ್ನು ಕಳೆದುಕೊಂಡು ದುಃಖದಲ್ಲಿದ್ದ ಉಮೇಶ್ ಯಾದವ್ಗೆ ಪತ್ರ ಬರೆದು ಧೈರ್ಯ ತುಂಬಿದ ಪ್ರಧಾನಿ ಮೋದಿ
ಗಾಯದ ಸಮಸ್ಯೆಯಿಂದ ಸುಧಾರಿಸಿಕೊಳ್ಳುವುದಕ್ಕೆ ಒಬ್ಬ ಆಟಗಾರನಿಗೆ ಕನಿಷ್ಠ ಮೂರು ತಿಂಗಳು ಬೇಕಾಗುತ್ತದೆ. ಹಾಗೆಯೇ ಬುಮ್ರಾಗೂ ಆರು ತಿಂಗಳ ಅವಧಿ ಸರ್ಜರಿ ಬಳಿಕದ ಸುಧಾರಣೆಗೆ ಬೇಕು. ಅಲ್ಲದೆ ಕಳೆದ ಸೆಪ್ಟೆಂಬರ್ನಿಂದ ಬುಮ್ರಾ ಗ್ರೌಂಡ್ಗೆ ಇಳಿದೇ ಇಲ್ಲ. ಹೀಗಿರುವಾಗ ತಕ್ಷಣಕ್ಕೆ ಬಂದು ಬೌಲಿಂಗ್ ಮಾಡುತ್ತಾರೆ ಎಂದು ನಿರೀಕ್ಷೆ ಮಾಡುವುದು ಸರಿಯಲ್ಲ ಎಂದು ಮದನ್ ಲಾಲ್ ಹೇಳಿದ್ದಾರೆ.