ಮುಂಬಯಿ: ಭಾರತ ಹಾಗೂ ಆಸ್ಟ್ರೇಲಿಯಾ ತಂಡಗಳ (INDvsAUS) ನಡುವಿನ ಟೆಸ್ಟ್ ಸರಣಿಯಲ್ಲಿ ಆಟಗಾರರ ಪ್ರದರ್ಶನಕ್ಕಿಂತ ಹೆಚ್ಚಾಗಿ ಪಿಚ್ ಬಗ್ಗೆಯೇ ಚರ್ಚೆಗಳು ನಡೆಯುತ್ತಿವೆ. ಮಿತಿ ಮೀರಿ ತಿರುವು ಪಡೆಯುತ್ತಿದ್ದ ಪಿಚ್ ಭಾರತದ ಬೌಲರ್ಗಳಿಗೆ ಅನುಕೂಲಕರವಾಗಿದೆ ಎಂದು ಆಸ್ಟ್ರೇಲಿಯಾದ ಮಾಜಿ ಆಟಗಾರರು ಆರೋಪ ಮಾಡುತ್ತಿದ್ದರೆ, ಭಾರತದ ಹಿರಿಯ ಕ್ರಿಕೆಟಿಗರು ಬ್ಯಾಟ್ ಮತ್ತು ಬಾಲ್ ನಡುವೆ ಸಮತೋಲನ ಹೊಂದಿರುವ ಪಿಚ್ಗಳನ್ನು ಟೆಸ್ಟ್ಗೆ ರೂಪಿಸಬೇಕು ಎಂದು ಹೇಳುತ್ತಿದ್ದಾರೆ. ಅದರಲ್ಲೂ ಟೀಮ್ ಇಂಡಿಯಾದ ಮಾಜಿ ನಾಯಕ ಸುನೀಲ್ ಗವಾಸ್ಕರ್ ನಾಗ್ಪುರ್, ಡೆಲ್ಲಿ ಹಾಗೂ ಇಂದೋರ್ ಪಿಚ್ಗಳ ಬಗ್ಗೆ ಸತತವಾಗಿ ಟೀಕೆ ಮಾಡುತ್ತಿದ್ದಾರೆ. ಇದೀಗ ಅವರು, ವೇಗದ ಬೌಲರ್ ಜಸ್ಪ್ರಿತ್ ಬುಮ್ರಾ ಇಲ್ಲದ್ದಕ್ಕೆ ಟರ್ನಿಂಗ್ ಪಿಚ್ ಇಟ್ಟಿದ್ದಾರೆ ಎಂದು ಹೇಳಿಕೆ ಕೊಟ್ಟಿದ್ದಾರೆ.
ಇಂಡಿಯಾ ಟುಡೆ ಜತೆ ಮಾತನಾಡಿದ ಅವರು ಇಂದೋರ್ ಪಿಚ್ ಬಗ್ಗೆ ಮಾತನಾಡುತ್ತಾ, ಮೂರನೇ ಪಂದ್ಯಕ್ಕೆ ಜಸ್ಪ್ರಿತ್ ಬುಮ್ರಾ ಹಾಗೂ ಮೊಹಮ್ಮದ್ ಶಮಿ ಅಲಭ್ಯರಾಗುವುದು ಗೊತ್ತಿತ್ತು. ಅನುಭವಿ ಬೌಲರ್ಗಳು ಇಲ್ಲದೇ ಆಸೀಸ್ ಬಳಗದ 20 ವಿಕೆಟ್ ಉರುಳಿಸುವ ಯೋಜನೆ ಸುಲಭವಾಗಿರಲಿಲ್ಲ. ಹೀಗಾಗಿ ಮಿತಿ ಮೀರಿ ಟರ್ನಿಂಗ್ ಆಗುವ ಪಿಚ್ ತಯಾರಿಸಿದ್ದರು. ಆದರೆ, ಆಸ್ಟ್ರೇಲಿಯಾದ ಸ್ಪಿನ್ನರ್ಗಳು ಹೆಚ್ಚು ಯಶಸ್ಸು ಸಾಧಿಸಿದ್ದರು ಎಂದು ಬುಮ್ರಾ ಹೇಳಿದ್ದಾರೆ.
ಅನುಭವಿ ಮತ್ತು ಮಾರಕ ವೇಗದ ಬೌಲರ್ಗಳು ಇಲ್ಲದೇ ಭಾರತದ ಪಿಚ್ಗಳಲ್ಲಿ 20 ವಿಕೆಟ್ ಪಡೆಯುವುದು ಸುಲಭದ ಕೆಲಸವಲ್ಲ. ಸಿರಾಜ್ ಬೌಲಿಂಗ್ನಲ್ಲಿ ಹೆಚ್ಚು ಅನುಭವ ಹೊಂದಿಲ್ಲ. ಹೀಗಾಗಿ 20 ವಿಕೆಟ್ ಪಡೆಯುವುಕ್ಕೆ ಸಾಧ್ಯವಾಗಬೇಕಾದರೆ ಅದಕ್ಕೆ ಸ್ಪಿನ್ ಪಿಚ್ ಬೇಕಾಗುತ್ತದೆ ಎಂದು ಗವಾಸ್ಕರ್ ಹೇಳಿದ್ದಾರೆ.
ಇದನ್ನೂ ಓದಿ : INDvsAUS : ಅಪಾಯಕಾರಿಯಲ್ಲದ ಪಿಚ್ಗೆ 3 ಡಿಮೆರಿಟ್ ಅಂಕ ಕೊಟ್ಟಿದ್ದು ಯಾಕೆ? ಸುನೀಲ್ ಗವಾಸ್ಕರ್ ಪ್ರಶ್ನೆ
ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ನ ಫೈನಲ್ಗೆ ಭಾರತ ತಂಡ ಹೋಗಬೇಕಾದರೆ ಸ್ಪಿನ್ ಪಿಚ್ಗಳೇ ಅನಿವಾರ್ಯವಾಗಿತ್ತು. ಒಂದು ವೇಳೆ ಅನುಭವಿ ವೇಗಿಗಳು ತಂಡದಲ್ಲಿ ಇದ್ದರೆ ಅನುಕೂಲಕರ ಪಿಚ್ ತಯಾರು ಮಾಡಬಹುದಾಗಿತ್ತು. ಆದರೆ ಅವರಿಲ್ಲದಿದ್ದ ಕಾರಣ ಸ್ಪಿನ್ ಪಿಚ್ ಅನಿವಾರ್ಯವಾಯಿತು ಎಂದು ಹೇಳಿದ್ದಾರೆ.