ಸ್ಟುಟ್ಗಾರ್ಟ್: ಯುರೋ ಕಪ್ ಫುಟ್ಬಾಲ್(Euro 2024) ಟೂರ್ನಿಯಲ್ಲಿ ಆತಿಥೇಯ ಜರ್ಮನಿ(Germany) ತಂಡ ನಾಕೌಟ್ ಹಂತಕ್ಕೇರಿದೆ. ಬುಧವಾರ ರಾತ್ರಿ ನಡೆದ ಎ ಗುಂಪಿನ ಪಂದ್ಯದಲ್ಲಿ ಎದುರಾಳಿ ಹಂಗೇರಿಯನ್ನು(Hungary) 2-0 ಗೋಲುಗಳಿಂದ ಮಗುಚಿ ಹಾಕುವ ಮೂಲಕ ಈ ಸಾಧನೆ ಮಾಡಿದೆ. ಈ ಗೆಲುವಿನೊಂದಿಗೆ ಜರ್ಮನಿ ಹಾಲಿ ಆವೃತ್ತಿಯಲ್ಲಿ ಮೊದಲ ತಂಡವಾಗಿ 16ರ ಘಟಕ್ಕೆ ತಲುಪಿತು. ದಿನದ ಕ್ರೊವೇಷಿಯಾ ಮತ್ತು ಅಲ್ಬೇನಿಯಾ ನಡುವಣ ದಿನದ ಮತ್ತೊಂದು ಪಂದ್ಯ 2-2 ಗೋಲುಗಳ ಅಂತರದಿಂದ ಡ್ರಾ ಗೊಂಡಿತು.
ಸ್ಟಟ್‌ ಗಾರ್ಟ್ನಲ್ಲಿ ಕಿಕ್ಕಿರಿದು ನೆರೆದ ತವರಿನ ಅಭಿಮಾನಿಗಳ ಮುಂದೆ ಜರ್ಮನಿ ಶ್ರೇಷ್ಠ ಆಟವಾಡಿ ಗೆಲುವು ಸಾಧಿಸುವ ಜತೆಗೆ ಅಭಿಮಾನಿಗಳಿಗೆ ಭರ್ಜರಿ ರಸದೌತಣ ಒದಗಿಸಿತು. ಸ್ಕಾಟ್ಲೆಂಡ್ ವಿರುದ್ಧ ಉದ್ಘಾಟನ ಪಂದ್ಯದಲ್ಲಿ 5-1 ಗೋಲು ಬಾರಿಸಿ ಮೆರೆದಾಡಿದ್ದ ಜರ್ಮನಿ ತಂಡ ಹಂಗೇರಿ ವಿರುದ್ಧದವೂ ಗೆದ್ದು ಬೀಗಿತು.
21 ವರ್ಷದ ಜಮಾಲ್ ಮೂಸಿಯಾಲ 22ನೇ ನಿಮಿಷದಲ್ಲಿ ಗೋಲು ಬಾರಿಸುವ ಮೂಲಕ ಜರ್ಮನಿಗೆ ಮುನ್ನಡೆ ತಂದು ಕೊಟ್ಟರು. ಇದಾಗ ಬಳಿಕ ನಾಯಕ ಇಲ್ಕೆ ಗುಂಡೋಕನ್ 67ನೇ ನಿಮಿಷದಲ್ಲಿ ಗೋಲು ಬಾರಿಸಿ ಪಂದ್ಯವನ್ನು ಗೆಲುವಿನ ದಡ ಸೇರಿಸಿದರು.
ಡ್ರಾದಲ್ಲಿ ಅಂತ್ಯ ಕಂಡ ಕ್ರೊವೇಷಿಯಾ ಮತ್ತು ಅಲ್ಬೇನಿಯಾ ಪಂದ್ಯ
ಕ್ರೊವೇಷಿಯಾ ಮತ್ತು ಅಲ್ಬೇನಿಯಾ ತಂಡಗಳು ಡ್ರಾ ಸಾಧಿಸಿದ ಕಾರಣ ಬಿ ಗುಂಪಿನಿಂದ ನಾಕೌಟ್ ಹಂತಕ್ಕೇರುವ ಇತ್ತಂಡಗಳ ಹಾದಿ ದುರ್ಗಮವಾಗಿದೆ. ಕ್ರೊವೇಷಿಯಾ ತಂಡ ಆರಂಭಿಕ ಹಂತದ ಆಟದಲ್ಲಿ ಹಿನ್ನಡೆ ಅನುಭವಿಸಿದರೂ ಕೂಡ ದ್ವಿತಿಯಾರ್ಧದಲ್ಲಿ ಪುಡಿದೆದ್ದು ಸೋಲುವ ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವಲ್ಲಿ ಯಶಸ್ಸು ಕಂಡಿತು. ಪಂದ್ಯ ಆರಂಭಗೊಂಡ 11ನೇ ನಿಮಿಷಕ್ಕೆ ಅಲ್ಬೇನಿಯಾ ಗೋಲಿನ ಖಾತೆ ತೆರೆಯಿತು. ಈ ಗೋಲನ್ನು ಖಜಿಮ್ ಲಸಿ ಬಾರಿಸಿದರು.
ಇದನ್ನೂ ಓದಿ Euro 2024: ಅಂತಿಮ ಹಂತದಲ್ಲಿ ಗೋಲು ಬಾರಿಸಿ ಪೋರ್ಚುಗಲ್ಗೆ ರೋಚಕ ಗೆಲುವು ತಂದ ಫ್ರಾನ್ಸಿಸ್ಕೊ
74ನೇ ನಿಮಿಷದಲ್ಲಿ ಕ್ರೊವೇಷಿಯಾ ತಂಡದ ಆಟಗಾರ ಆಂಡ್ರೆಜ್ ಕ್ರಾಮರಿಕ್ ಗೋಲು ಬಾರಿಸುವ ಮೂಲಕ ಪಂದ್ಯವನ್ನು ಸಮಬಲಕ್ಕೆ ತಂದರು. ಈ ಗೋಲು ಸಿಡಿದ 4 ನಿಮಿಷದ ಅಂತರದಲ್ಲಿ ಕ್ಲೌಸ್ ಗಸುಲಾ ಸ್ವಗೋಲಿನ ಎಡವಟ್ಟು ಮಾಡಿಕೊಂಡರು ಇದರಿಂದ ಕ್ರೊವೇಷಿಯಾ 2-1 ಮುನ್ನಡೆ ಸಾಧಿಸಿತು. ಆದರೆ ಹೆಚ್ಚುವರಿ ಸಮಯದ ಆಟದಲ್ಲಿ ಕ್ಲೌಸ್ ಗೋಲು ಬಾರಿಸಿ ಪಂದ್ಯವನ್ನು ಡ್ರಾ ಮಾಡಿಕೊಳ್ಳುವ ಮೂಲಕ ತನ್ನ ಸ್ವಗೋಲಿನ ತಪ್ಪಿಗೆ ನ್ಯಾಯ ಒದಗಿಸಿದರು. ಒಂದೊಮ್ಮೆ ಅವರು ಈ ಗೋಲು ಬಾರಿಸದೇ ಹೋಗಿದ್ದರೆ ತಂಡದ ಪಾಲಿಗೆ ವಿಲನ್ ಆಗುತ್ತಿದ್ದರು.
ಇಂದು ನಡೆದ ಪಂದ್ಯದಲ್ಲಿ ಸ್ವಿಜರ್ಲ್ಯಾಂಡ್ ಮತ್ತು ಸ್ಕಾಟ್ಲೆಂಡ್ ವಿರುದ್ಧದ ಪಂದ್ಯ ಕೂಡ 1-1 ಗೋಲು ಅಂತರದಿಂದ ಸಮಬಲಗೊಂಡಿತು.