ಭುವನೇಶ್ವರ: ಕಳೆದ ಬಾರಿಯ ಚಾಂಪಿಯನ್ ಬೆಲ್ಜಿಯಮ್ ತಂಡವನ್ನು ಮಣಿಸಿದ ಜರ್ಮನಿ ಹಾಕಿ ತಂಡ ಇಲ್ಲಿ ನಡೆದ ಹಾಕಿ ವಿಶ್ವ ಕಪ್ನ (Hockey World Cup) ಟ್ರೋಫಿ ತನ್ನದಾಗಿಸಿಕೊಂಡಿತು. ಜರ್ಮನಿ ತಂಡದ ಪಾಲಿಗೆ ಇದು ಮೂರನೇ ವಿಶ್ವ ಕಪ್ ಆಗಿದ್ದು ಈ ಹಿಂದೆ 2002 ಹಾಗೂ 2006ರಲ್ಲಿ ಚಾಂಪಿಯನ್ಪಟ್ಟ ಅಲಂಕರಿಸಿತ್ತು. ಭಾನುವಾರ ನಡೆದ ಫೈನಲ್ ಪಂದ್ಯದಲ್ಲಿ ಬೆಲ್ಜಿಯಮ್ ವಿರುದ್ಧ ಸಡನ್ ಡೆತ್ 5-4 ಗೋಲ್ಗಳ ಅಂತರದಿಂದ ಜರ್ಮನಿ ಜಯ ಸಾಧಿಸಿತು.
ಪಂದ್ಯದ ನಿಗದಿತ ಅವಧಿಯಲ್ಲಿ ಇತ್ತಂಡಗಳು ತಲಾ 3 ಗೋಲ್ಗಳನ್ನು ಬಾರಿಸಿದ್ದವು. ಜರ್ಮನಿ ತಂಡದ ಪರವಾಗಿ ನಿಕ್ಲಾಸ್ ವೆಲ್ಲೆಸ್ (29ನೇ ನಿಮಿಷ), ಗೊಂಜಾಲೊ ಪೆಲ್ಲಾಟ್ (41ನೇ ನಿಮಿಷ) ಹಾಗೂ ಗ್ಯಾಟ್ ಗ್ರಾಂಬಶ್ ಗೋಲ್ ಬಾರಿಸಿದರು. ಮಾಜಿ ಚಾಂಪಿಯನ್ ಬೆಲ್ಜಿಯಮ್ ತಂಡದ ಪರವಾಗಿ ಅಬೆಲ್ ಫ್ಲಾರೆಂಟ್ (10ನೇ ನಿಮಿಷ), ಟಾಂಗಿ ಕಾಸಿನ್ಸ್ (11ನೇ ನಿಮಿಷ), ಟಾಮ್ ಬೂನ್ (59ನೇ ನಿಮಿಷ) ಗೋಲ್ ಬಾರಿಸಿದರು.
ಇದನ್ನೂ ಓದಿ : Hockey World Cup: ಹಾಕಿ ವಿಶ್ವ ಕಪ್; ಜಪಾನ್ ವಿರುದ್ಧ ಭಾರತಕ್ಕೆ 8-0 ಗೋಲ್ ಅಂತರದ ಗೆಲುವು
ಅದಕ್ಕಿಂತ ಮೊದಲು ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡವನ್ನು 3-1 ಗೋಲ್ಗಳಿಂದ ಮಣಿಸಿದ ನೆದರ್ಲೆಂಡ್ಸ್ ತಂಡ ಕಂಚಿನ ಪದಕ ಗೆದ್ದುಕೊಂಡಿತು. ನೆದರ್ಲೆಂಡ್ಸ್ ತಂಡದ ಬ್ರಿಂಕ್ಮನ್ (35 ಹಾಗೂ 45ನೇ ನಿಮಿಷ), ಜಿಪ್ ಜಿನ್ಸೆನ್ (33ನೇ ನಿಮಿಷ) ಗೋಲ್ ಬಾರಿಸಿದರು. ಆಸ್ಟ್ರೇಲಿಯಾ ತಂಡದ ಪರ ಜೆರೆಮಿ ಹೇವರ್ಡ್ 13ನೇ ನಿಮಿಷದಲ್ಲಿ ಗೋಲ್ ಹೊಡೆದರು.
ಇದೇ ವೇಳೆ ಭಾರತ ತಂಡವು 9ನೇ ಸ್ಥಾನಿಯಾಗಿ ಹಾಲಿ ಆವೃತ್ತಿಯ ವಿಶ್ವ ಕಪ್ ಅಭಿಯಾನವನ್ನು ಕೊನೆಗೊಳಿಸಿತು. ತವರಿನಲ್ಲಿ ನಡೆದ ಟೂರ್ನಿಯ ಲಾಭವನ್ನು ಪಡೆಯಲು ಭಾರತ ತಂಡ ವಿಫಲವಾಯಿತು.