GT vs MI: ಮಾಜಿ ತಂಡದ ಸವಾಲು​ ಗೆಲ್ಲುವರೇ ಹಾರ್ದಿಕ್​ ಪಾಂಡ್ಯ?​

ಅಹಮದಾಬಾದ್​: 17ನೇ ಆವೃತ್ತಿಯ ಐಪಿಎಲ್​ನ(IPL 2024) 5ನೇ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್(GT vs MI)​ ಮತ್ತು ಗುಜರಾತ್​ ಟೈಟಾನ್ಸ್​ ತಂಡಗಳು ಕಣಕ್ಕಿಳಿಯಲಿದೆ. ಗುಜರಾತ್(Gujarat Titans)​ ತಂಡವನ್ನು ಚೊಚ್ಚಲ ಬಾರಿಗೆ ಚಾಂಪಿಯನ್​ ಪಟ್ಟಕ್ಕೇರಿಸಿದ ಹಾರ್ದಿಕ್​ ಪಾಂಡ್ಯ ಈ ಬಾರಿ ಮುಂಬೈ(Mumbai Indians) ತಂಡದ ನಾಯಕನಾಗಿದ್ದಾರೆ. ತಮ್ಮ ಮಾಜಿ ತಂಡದ ವಿರುದ್ಧವೇ ಈ ಬಾರಿಯ ಐಪಿಎಲ್ ಅಭಿಯಾನ ಆರಂಭಿಸುತ್ತಿರುವುದ ಈ ಪಂದ್ಯದ ವಿಶೇಷತೆಯಾಗಿದೆ.

ಶುಭಮನ್​ ಗಿಲ್​ ಸಾರಥ್ಯದ ಗುಜರಾತ್​ ತಂಡ ಮುಂಬೈಗೆ ಹೋಲಿಸಿದರೆ ಅಷ್ಟು ಬಲಿಷ್ಠವಾಗಿಲ್ಲ. ತಂಡದ ಸ್ಟಾರ್​ ವೇಗಿ ಮೊಹಮದ್​ ಶಮಿ ಗಾಯದಿಂದಾಗಿ ಟೂರ್ನಿಯಿಂದ ಹೊರಬಿದ್ದಿರುವುದು ತಂಡಕ್ಕೆ ಉಂಟಾದ ದೊಡ್ಡ ನಷ್ಟ. ಆಸ್ಟ್ರೇಲಿಯಾದ ವಿಕೆಟ್​ ಕೀಪರ್​ ಬ್ಯಾಟರ್​ ಮ್ಯಾಥ್ಯೂ ವೇಡ್​ ಕೂಡ ಮೊದಲೆರಡು ಪಂದ್ಯಗಳಿಗೆ ಅಲಭ್ಯರಾಗಿದ್ದಾರೆ. ಸದ್ಯಕ್ಕೆ ಡೇವಿಡ್​ ಮಿಲ್ಲರ್​, ಕೇನ್​ ವಿಲಿಯಮ್ಸನ್, ರಶೀದ್​ ಖಾನ್​ ಮತ್ತು ಶುಭಮನ್​ ಗಿಲ್​ ಪ್ರದರ್ಶನದ ಮೇಲೆ ತಂಡದ ಭವಿಷ್ಯ ಅಡಗಿದೆ.

See more

Hugs Galore in MI vs GT Camp. pic.twitter.com/O5iiRCNmUe

— CricketGully (@thecricketgully) March 22, 2024

​​ಮುಂಬೈ ಸಮರ್ಥ ತಂಡ

5 ಬಾರಿಯ ಚಾಂಪಿಯನ್​ ಮುಂಬೈ ಇಂಡಿಯನ್ಸ್​ ತಂಡ ಎಲ್ಲ ವಿಭಾಗದಲ್ಲಿಯೂ ಸಮರ್ಥವಾಗಿದೆ. ಫಿಟ್​ ಆಗದ ಕಾರಣ ಸೂರ್ಯಕುಮಾರ್​ ಯಾದವ್​ ತಂಡ ಸೇರಲು ತಡವಾದರೂ ಕೂಡ ಮುಂಬೈಗೆ ಹಿನ್ನಡೆಯಾಗದು. ಏಕೆಂದರೆ ಅವರ ಸ್ಥಾನ ತುಂಬಬಲ್ಲ ಹಲವು ಡೇಂಜರಸ್​ ಬ್ಯಾಟರ್​ಗಳು ಈ ತಂಡದಲ್ಲಿದ್ದಾರೆ. ನಾಯಕತ್ವದ ಹೊರೆಯಿಂದ ಮುಕ್ತರಾಗಿರುವ ರೋಹಿತ್​ ಶರ್ಮ ಈ ಬಾರಿ ಪ್ರಚಂಡ ಬ್ಯಾಟಿಂಗ್​ ನಡೆಸುವ ಸಾಧ್ಯತೆ ಇದೆ. ಜಸ್​ಪ್ರೀತ್​ ಬುಮ್ರಾ, ಇಶಾನ್ ಕಿಶನ್​, ಟಿಮ್​ ಡೇವಿಡ್​, ಪಾಂಡ್ಯ ಹೀಗೆ ಆಟಗಾರರ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ.

ಇದನ್ನೂ ಓದಿ IPL 2024 : ಸಂಜು ಬಳಗದ ಸವಾಲು ಮೀರುವುದೇ ರಾಹುಲ್ ಪಡೆ?

ಮುಖಾಮುಖಿ

ಉಭಯ ತಂಡಗಳು ಇದುವರೆಗೆ ಐಪಿಎಲ್​ ಟೂರ್ನಿಯಲ್ಲಿ 4 ಬಾರಿ ಮುಖಾಮುಖಿಯಾಗಿವೆ. ತಲಾ 2 ಪಂದ್ಯಗಳಲ್ಲಿ ಗೆಲುವು ಮತ್ತು ಸೋಲು ಕಂಡಿದೆ. ನರೇಂದ್ರ ಮೋದಿ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ಗುಜರಾತ್​ ತಂಡ ಒಟ್ಟು 10 ಪಂದ್ಯಗಳನ್ನು ಆಡಿ 6ರಲ್ಲಿ ಗೆದ್ದಿದೆ. ಮುಂಬೈ ಇಂಡಿಯನ್ಸ್​ 4 ಪಂದ್ಯ ಆಡಿ ಕೇವಲ ಒಂದು ಗೆಲುವು ಮಾತ್ರ ದಾಖಲಿಸಿದೆ. ಒಟ್ಟಾರೆ ಇಲ್ಲಿ 28 ಐಪಿಎಲ್​ ಪಂದ್ಯಗಳು ನಡೆದಿದೆ. ಈ ಪೈಕಿ ಮೊದಲು ಬ್ಯಾಟಿಂಗ್​ ನಡೆಸಿದ ತಂಡ 13 ಬಾರಿ, ಚೇಸಿಂಗ್​ ನಡೆಸಿದ ತಂಡ 15 ಬಾರಿ ಗೆಲುವು ಸಾಧಿಸಿದೆ.

ಸಂಭಾವ್ಯ ತಂಡಗಳು

ಗುಜರಾತ್​: ಶುಭಮನ್ ಗಿಲ್ (ನಾಯಕ), ಡೇವಿಡ್ ಮಿಲ್ಲರ್, ವೃದ್ಧಿಮಾನ್ ಸಹಾ, ಕೇನ್ ವಿಲಿಯಮ್ಸನ್, ಬಿ ಸಾಯಿ ಸುದರ್ಶನ್, ವಿಜಯ್ ಶಂಕರ್, ರಾಹುಲ್ ತೆವಾಟಿಯಾ, ರಶೀದ್ ಖಾನ್, ಮೋಹಿತ್ ಶರ್ಮಾ, ಅಜ್ಮತುಲ್ಲಾ ಒಮರ್ಜಾಯ್, ಉಮೇಶ್ ಯಾದವ್.

ಮುಂಬೈ ಇಂಡಿಯನ್ಸ್​: ಹಾರ್ದಿಕ್ ಪಾಂಡ್ಯ (ನಾಯಕ), ರೋಹಿತ್ ಶರ್ಮಾ, ಡೆವಾಲ್ಡ್ ಬ್ರೆವಿಸ್, ಇಶಾನ್ ಕಿಶನ್, ತಿಲಕ್ ವರ್ಮಾ, ಟಿಮ್ ಡೇವಿಡ್, ಅರ್ಜುನ್ ತೆಂಡೂಲ್ಕರ್, ಜಸ್​ಪ್ರೀತ್​ ಬುಮ್ರಾ, ಪಿಯೂಷ್ ಚಾವ್ಲಾ , ಜೆರಾಲ್ಡ್ ಕೋಟ್ಜಿ, ದಿಲ್ಶನ್ ಮಧುಶಂಕ.