ಮುಂಬಯಿ: ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ಟೆಸ್ಟ್ ತಂಡಕ್ಕೆ ಪದಾರ್ಪಣೆ ಮಾಡಿದ್ದ ಯಶಸ್ವಿ ಜೈಸ್ವಾಲ್ (Yashasvi Jaiswal) ದೊಡ್ಡ ಸಾಧನೆ ಮಾಡಿದ್ದರು. ಮೊದಲ ಪಂದ್ಯದಲ್ಲಿಯೇ ಅವರು 171 ರನ್ ಬಾರಿ ಮಿಂಚಿದರಲ್ಲದೆ ಭಾರತದ ಗೆಲುವಿನಲ್ಲಿ ಪ್ರಧಾನ ಪಾತ್ರ ವಹಿಸಿದ್ದರು. 21 ವರ್ಷದ ವಿನಾಶಕಾರಿ ಬ್ಯಾಟಿಂಗ್ ಮಾಡಿದ ಕಾರಣ ಅವರ ಬಗ್ಗೆ ದೊಡ್ಡ ಬಗ್ಗೆಯ ಚರ್ಚೆಗಳು ಆರಂಭಗೊಂಡವು. ಈ ವೇಳೆ ಯಶಸ್ವಿ ತನ್ನ ಬಾಲ್ಯದಲ್ಲಿ ಪಾನಿಪುರಿ ಮಾರಾಟ ಮಾಡುತ್ತಿದ್ದರು ಎಂದು ಹೇಳಲಾಯಿತು. ಅದರ ಬಗ್ಗೆಯೇ ಸಿಕ್ಕಾಪಟ್ಟೆ ಸುದ್ದಿಗಳಾದವು. ಆದರೆ ಈ ಸುದ್ದಿ ಸಂಪೂರ್ಣವಾಗಿ ಸುಳ್ಳು ಎಂದು ಅವರ ಬಾಲ್ಯದ ತರಬೇತುದಾರ ಜ್ವಾಲಾ ಸಿಂಗ್ ಸ್ಪಷ್ಟಪಡಿಸಿದ್ದಾರೆ.
ರಿಪಬ್ಲಿಕ್ ವರ್ಲ್ಡ್ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅವರು ಯಶಸ್ವಿ ಪಾನಿ ಪುರಿಗಳನ್ನು ಮಾರಾಟ ಮಾಡುತ್ತಾರೆ ಎಂಬ ವದಂತಿಗಳು ಸಂಪೂರ್ಣವಾಗಿ ಸುಳ್ಳು ಮತ್ತು ಮಾಧ್ಯಮಗಳು ಈ ಕಥೆ ಕಟ್ಟಿವೆ ಎಂದು ಜ್ವಾಲಾ ಸಿಂಗ್ ಸ್ಪಷ್ಟಪಡಿಸಿದ್ದಾರೆ. ಯಶಸ್ವಿ 16 ವರ್ಷದವರಿದ್ದಾಗ ನಡೆಸಿದ್ದ ಸಂದರ್ಶನದಲ್ಲಿ ಹೇಗೆ ಅವರ ಮಾತನ್ನು ಬಳಸಿಕೊಂಡು ಪಾನಿಪುರಿ ಕತೆಯನ್ನು ಕಟ್ಟಲಾಗುತ್ತಿದೆ ಎಂದು ಹೇಳಿದ್ದಾರೆ.
ಆ ಸಮಯದಲ್ಲಿ ನಾನು ಇಂಗ್ಲೆಂಡ್ನಲ್ಲಿದ್ದೆ. ನನ್ನೊಂದಿಗೆ ಸಮಾಲೋಚಿಸದ ಕೆಲವು ಪತ್ರಕರ್ತರು 16 ವರ್ಷದ ಯಶಸ್ವಿ ಅವರನ್ನು ಭೇಟಿಯಾಗಿ ಸಂದರ್ಶನ ಮಾಡಲು ಮುಂದಾದರು. ಯಶಸ್ವಿ ನನ್ನನ್ನು ಸಂಪರ್ಕಿಸಿ ಕೆಲವು ಪತ್ರಕರ್ತರು ತಮ್ಮನ್ನು ಸಂದರ್ಶಿಸಲು ಬಯಸುತ್ತಾರೆ ಎಂದು ಕೇಳಿಕೊಂಡರು. ನಾನು ಸರಿ ಮುಂದುವರಿಯಿರಿ ಎಂದು ಹೇಳಿದೆ. ಪತ್ರಕರ್ತರು ಯಶಸ್ವಿಗೆ ಕೆಲವು ವೈಯಕ್ತಿಕ ಪ್ರಶ್ನೆಗಳನ್ನು ಕೇಳಿದ್ದರು. ಯಶಸ್ವಿ ಮುಗ್ಧತೆಯಿಂದ ಪಾನಿಪುರಿ ಘಟನೆಯನ್ನು ಹೇಳಿದ್ದರು ತಮ್ಮ ವರದಿಗಳಿಗೆ ಪ್ರಾಮುಖ್ಯತೆ ನೀಡಲು ಪತ್ರಕರ್ತರು ಪಾನಿಪುರಿ ವಿಷಯವನ್ನು ತಮ್ಮ ಶೀರ್ಷಿಕೆಯಾಗಿ ಬಳಸಿಕೊಂಡರು ಎಂದು ಜ್ವಾಲಾ ಸಿಂಗ್ ಹೇಳಿದ್ದಾರೆ.
ಜೈಸ್ವಾಲ್ ಪ್ರದರ್ಶನ ನೀಡಿದಾಗಲೆಲ್ಲಾ, ಪಾನಿಪುರಿ ಸ್ಟಾಲ್ನಲ್ಲಿ ವ್ಯಕ್ತಿಯೊಬ್ಬರ ಜತೆ ಯಶಸ್ವಿ ನಿಂತಿರುವ ಚಿತ್ರಗಳನ್ನು ಬಳಸಲಾಗುತ್ತದೆ. ಅವರನ್ನು ಜೈಸ್ವಾಲ್ ತಂದೆ ಎಂದು ಹೇಳಲಾಗುತ್ತದೆ. ಅದು ಕೇವಲ ಸಾಂದರ್ಭಿಕ ಚಿತ್ರ. ಅವರ ತಂದೆ ಜೀವನೋಪಾಯಕ್ಕಾಗಿ ಪಾನಿಪುರಿಗಳನ್ನು ಮಾರಾಟ ಮಾಡುವುದಿಲ್ಲ ಎಂದು ಸಿಂಗ್ ಹೇಳಿದ್ದಾರೆ. ರಾಜಸ್ಥಾನ್ ರಾಯಲ್ಸ್ನ ಯುವ ಆರಂಭಿಕ ಆಟಗಾರ ತನ್ನ ಜೀವನೋಪಾಯಕ್ಕಾಗಿ ಅಥವಾ ತನ್ನ ಕ್ರಿಕೆಟ್ ಕೋಚಿಂಗ್ ಗೆ ಹಣ ಗಳಿಸಲು ಎಂದಿಗೂ ಪಾನಿಪುರಿಗಳನ್ನು ಮಾರಾಟ ಮಾಡಲಿಲ್ಲ ಎಂಬುದನ್ನು ಹೇಳಿದರು.
ಅಪ್ಪನಿಗೆ ಪೇಂಟ್ ಅಂಗಡಿ
ಪಾನಿಪುರಿ ಕತೆ ಸುದ್ದಿಗೆ ಉತ್ತಮ ಶೀರ್ಷಿಕೆಯನ್ನು ನೀಡುತ್ತದೆ. ಇದರಲ್ಲಿ ಕೇವಲ 5% ಸತ್ಯವಿದೆ. ಅವರು ಮೊದಲು ಮುಂಬೈಗೆ ಬಂದು ಟೆಂಟ್ನಲ್ಲಿ ವಾಸಿಸುತ್ತಿದ್ದಾಗ ಅದನ್ನು ಕೆಲವೇ ದಿನಗಳವರೆಗೆ ಮಾಡಿರಬಹುದು. ಆರಂಭದಲ್ಲಿ ಅವರಿಗೆ ಮೂಲಭೂತ ಸೌಕರ್ಯಗಳಿರಲಿಲ್ಲ. ವಿದ್ಯುತ್ ಇರಲಿಲ್ಲ. ಯಶಸ್ವಿ ಮಗುವಾಗಿದ್ದಾಗ ಕೆಲವು ವ್ಯಾಪಾರಿಗಳು ಅವರಿಗೆ ಸಹಾಯ ಮಾಡಿದ್ದರು. ಆದರೆ ನಾನು ಕ್ರಿಕೆಟ್ ತರಬೇತಿಯನ್ನು ಪ್ರಾರಂಭಿಸಿ ಅವರನ್ನು ನನ್ನ ತೆಕ್ಕೆಗೆ ತೆಗೆದುಕೊಂಡ ನಂತರ ಎಲ್ಲ ಕಷ್ಟಗಳು ನಿಂತುಹೋದವು ಎಂದು ಸಿಂಗ್ ಹೇಳಿದ್ದಾರೆ.
ಇದನ್ನೂ ಓದಿ : IPL 2023: 15 ವರ್ಷಗಳ ಹಿಂದಿನ ದಾಖಲೆ ಮುರಿದ ಯಶಸ್ವಿ ಜೈಸ್ವಾಲ್
ಆರಂಭದಲ್ಲಿ ಯಶಸ್ವಿ ಮುಂಬೈಗೆ ಬಂದಾಗ, ಅವರ ಪೋಷಕರು ಪ್ರತಿ ತಿಂಗಳಿಗೆ 1000 ರೂ.ಗಳನ್ನು ಕಳುಹಿಸುತ್ತಿದ್ದರು. ಅವರ ತಂದೆ ಪೇಂಟ್ ಅಂಗಡಿಯನ್ನು ಹೊಂದಿದ್ದಾರೆ. ಅವರು ಇಂದು ಯಾವುದೇ ಕ್ರಿಕೆಟ್ ಆಡುತ್ತಿದ್ದರೂ, ಸರಿಯಾದ ಕೋಚಿಂಗ್, ಆಹಾರ ಮತ್ತು ವಸತಿಯಿಂದಾಗಿ ಆಗಿದೆ. ನಾನು ಅವರಿಗೆ ಎಲ್ಲವನ್ನೂ ಒದಗಿಸಲು ನನ್ನ ಕೈಲಾದಷ್ಟು ಪ್ರಯತ್ನಿಸಿದ್ದೇನೆ. ಸಮಯ ಮತ್ತು ಹಣದ ಸರಿಯಾದ ಹೂಡಿಕೆಯಿಲ್ಲದೆ ಯಾರೂ ಕ್ರಿಕೆಟಿಗರಾಗಲು ಸಾಧ್ಯವಿಲ್ಲ. ನನ್ನ ಜೀವನದ 9 ಅಮೂಲ್ಯ ವರ್ಷಗಳನ್ನು ಅವರಿಗೆ ನೀಡಿದ್ದೇನೆ ಎಂದು ಸಿಂಗ್ ಹೇಳಿದ್ದಾರೆ.
ಆರಂಭಿಕ ಕಷ್ಟಗಳ ಹೊರತಾಗಿಯೂ, ಯಶಸ್ವಿ ಅವರು ಪ್ರತಿಭಾನ್ವಿತ ಆಟಗಾರ ಮತ್ತು ಮುಂಬರುವ ವರ್ಷಗಳಲ್ಲಿ ಭಾರತೀಯ ಕ್ರಿಕೆಟ್ ತಂಡಕ್ಕೆ ದೊಡ್ಡ ಆಸ್ತಿ ಎಂಬುದನ್ನು ಜಗತ್ತಿಗೆ ತೋರಿಸಿದ್ದಾರೆ. ಐಪಿಎಲ್ 2023ರ ಅಭಿಯಾನದಲ್ಲಿ ಅವರ ಅದ್ಭುತ ಪ್ರದರ್ಶನದಿಂದಾಗಿ, ಅವರು ಋತುರಾಜ್ ಗಾಯಕ್ವಾಡ್ ಅವರಿಗೆ ಬದಲಿಯಾದರು.
ಡಬ್ಲ್ಯುಟಿಸಿ ಫೈನಲ್ಸ್ ನಂತರ, ಜೈಸ್ವಾಲ್ಗೆ ಸುಂದರವಾದ ಅವಕಾಶ ಸಿಕ್ಕಿತು. ಆ ಅವಕಾಶವನ್ನು ಬಳಸಿಕೊಂಡು ಉತ್ತಮ ಪ್ರದರ್ಶನ ನೀಡಿದರು ವೆಸ್ಟ್ ಇಂಡೀಸ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯಕ್ಕೆ ಮೊದಲು ವಿರಾಟ್ ಕೊಹ್ಲಿ ಚೊಚ್ಚಲ ಟೆಸ್ಟ್ ಕ್ಯಾಪ್ ಅನ್ನು ಯಶಸ್ವಿಗೆ ನೀಡಿದ್ದರು.