ಕಿವೀಸ್​ ವಿರುದ್ಧ ಭಾರತ ಕೊನೆಯ ಬಾರಿ ವಿಶ್ವಕಪ್ ಪಂದ್ಯ ಗೆದ್ದಾಗ ಕೊಹ್ಲಿ,ರೋಹಿತ್​ಗೆ​ ಎಷ್ಟು ವಯಸ್ಸು?

ಧರ್ಮಶಾಲ: ಸತತ ನಾಲ್ಕು ಪಂದ್ಯಗಳನ್ನು ಗೆದ್ದು ಅಜೇಯ ಓಟ ಕಾಯ್ದುಕೊಂಡಿರುವ ಭಾರತ ಮತ್ತು ನ್ಯೂಜಿಲ್ಯಾಂಡ್​ ತಂಡಗಳು(India vs New Zealand) ಭಾನುವಾರದ ವಿಶ್ವಕಪ್​ ಲೀಗ್(ICC Cricket World Cup 2023)​ ಪಂದ್ಯದಲ್ಲಿ ಕಾದಾಟ ನಡೆಸಲಿದೆ. ಆದರೆ ಇದಕ್ಕೂ ಮುನ್ನ ಸ್ವಾರಸ್ಯಕರ ವಿಚಾರವೊಂದಿದೆ. ಭಾರತ ತಂಡ ನ್ಯೂಜಿಲ್ಯಾಂಡ್​ ವಿರುದ್ಧ ವಿಶ್ವಕಪ್​ ಟೂರ್ನಿಯಲ್ಲಿ ಕೊನೆಯ ಬಾರಿ ಗೆಲುವು ಸಾಧಿಸಿದಾಗ ರೋಹಿತ್​ ಶರ್ಮ(Rohit Sharma) ಮತ್ತು ವಿರಾಟ್​ ಕೊಹ್ಲಿ(Virat Kohli) ಶಾಲಾ ವಿದ್ಯಾರ್ಥಿಗಳಾಗಿದ್ದರು. ಆಗ ಅವರಿಗೆ ಎಷ್ಟು ವಯಸ್ಸಾಗಿತ್ತು ಎನ್ನುವ ಅಭಿಮಾನಿಗಳ ಕುತೂಹಲಕ್ಕೆ ಇಲ್ಲಿದೆ ಉತ್ತರ.

ಕೊಹ್ಲಿಗೆ 14, ರೋಹಿತ್​ಗೆ 16 ವಯಸ್ಸು

ಭಾರತ ತಂಡ ನ್ಯೂಜಿಲ್ಯಾಂಡ್​ ವಿರುದ್ಧ ಕೊನೆಯ ಬಾರಿ ವಿಶ್ವಕಪ್​ ಟೂರ್ನಿಯಲ್ಲಿ ಗೆಲುವು ಸಾಧಿಸಿತ್ತು. 2003ರಲ್ಲಿ. ಸೌರವ್​ ಗಂಗೂಲಿ ನಾಯಕತ್ವದಲ್ಲಿ ಕಣಕ್ಕಿಳಿದಿದ್ದ ಭಾರತ 7 ವಿಕೆಟ್​ಗಳ ಗೆಲುವು ಸಾಧಿಸಿತ್ತು. 4 ವಿಕೆಟ್​ ಕಿತ್ತ ಜಹೀರ್​ ಖಾನ್​ ಅವರು ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರು. ಈ ಪಂದ್ಯದ ಬಳಿಕ ಭಾರತ ಕಿವೀಸ್​ ವಿರುದ್ಧ ಆಡಿದ ಎಲ್ಲ ವಿಶ್ವಕಪ್​ ಟೂರ್ನಿಗಳಲ್ಲಿಯೂ ಸೋಲು ಕಂಡಿದೆ.

ಭಾರತ 2003ರ ವಿಶ್ವಕಪ್​ನಲ್ಲಿ(ICC Cricket World Cup 2003) ಕಿವೀಸ್​ ವಿರುದ್ಧ ಗೆದ್ದಾಗ ಇಂದು ಭಾರತ ತಂಡದಲ್ಲಿರುವ ನಾಯಕ ರೋಹಿತ್​ ಶರ್ಮ 16 ವರ್ಷದವರಾಗಿದ್ದರು. ವಿರಾಟ್ ಕೊಹ್ಲಿಗೆ 15 ವರ್ಷವಾಗಿತ್ತು. ಇಬ್ಬರು ಕೂಡ ಶಾಲಾ ವಿದ್ಯಾರ್ಥಿಗಳಾಗಿದ್ದರು. 20 ವರ್ಷಗಳಲ್ಲಿ ಆಡಿದ ಎಲ್ಲ ಮಹತ್ವದ ಐಸಿಸಿ ಟೂರ್ನಿಗಳಲ್ಲಿ ಕಿವೀಸ್​ ವಿರುದ್ಧ ಸೋಲು ಕಂಡಿರುವ ಭಾರತಕ್ಕೆ ಈ ಪಂದ್ಯದಲ್ಲಿ ಉಭಯ ಆಟಗಾರರು ಗೆಲುವು ತಂದು ಕೊಟ್ಟು ಸೋಲಿನ ದಾಖಲೆಯನ್ನು ಮುರಿಯುವಲ್ಲಿ ಪ್ರಮುಖ ಪಾತ್ರವಹಿಸಲಿದ್ದಾರಾ ಎಂದು ನೋಡಬೇಕಿದೆ.

ಕೊಹ್ಲಿ ಅವರು ನಾಯಕನಾಗಿ ವಿಶ್ವಕಪ್​ನಲ್ಲಿ ಆಡಿದ್ದರೂ ಕಿವೀಸ್​ ವಿರುದ್ಧ ಗೆಲುವು ಸಾಧಿಸಲು ಸಾಧ್ಯವಾಗಲಿಲ್ಲ. ಟಿ20, ಏಕದಿನ ಮತ್ತು ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ನಲ್ಲಿ ಕೊಹ್ಲಿ ಸಾರಥ್ಯದಲ್ಲಿ ಭಾರತ ತಂಡ ಮಂಡಿಯೂರಿತ್ತು. ರೋಹಿತ್​ ಅವರು ನಾಯಕನಾಗಿ ಕಿವೀಸ್​ ವಿರುದ್ಧ ವಿಶ್ವಕಪ್​ನಲ್ಲಿ ಮೊದಲ ಬಾರಿ ಕಣಕ್ಕಿಳಿಯುತ್ತಿದ್ದಾರೆ. ಇವರ ನಾಯಕತ್ವದಲ್ಲಾದರೂ ಭಾರತ ​ಸೋಲಿನ ಕೊಂಡಿಯನ್ನು ಕಡಿದುಕೊಳ್ಳಲಿದೆಯಾ ಎನ್ನುವುದಕ್ಕೆ ಭಾನನುವಾರ ಹಿಮಾಲಯದ ತಪ್ಪಲಿನಲ್ಲಿರುವ ಧರ್ಮಶಾದಲ್ಲಿ ಉತ್ತರ ಸಿಗಲಿದೆ.

ಇದನ್ನೂ ಓದಿ IND vs NZ: ನ್ಯೂಜಿಲ್ಯಾಂಡ್​ ಪಂದ್ಯಕ್ಕೆ ಟೀಮ್​ ಇಂಡಿಯಾದಲ್ಲಿ 2 ಬದಲಾವಣೆ

ವಿಶ್ವಕಪ್ ಮುಖಾಮುಖಿ

ಇತ್ತಂಡಗಳು ವಿಶ್ವಕಪ್​ ಟೂರ್ನಿಯಲ್ಲಿ ಒಟ್ಟು 9 ಬಾರಿ ಮುಖಾಮುಖಿಯಾಗಿವೆ. ಇದರಲ್ಲಿ ಭಾರತ ಗೆದ್ದಿದ್ದು ಕೇವಲ ಮೂರು ಪಂದ್ಯಗಳು ಉಳಿದ 5 ಪಂದ್ಯಗಳಲ್ಲಿ ಕಿವೀಸ್​ ಗೆದ್ದು ಬೀಗಿದೆ. 2019 ವಿಶ್ವಕಪ್​ನಲ್ಲಿ ಲೀಗ್ ಪಂದ್ಯ ಮಳೆಯಿಂದ ರದ್ದುಗೊಂಡಿತ್ತು. ಆದರೆ​ ಸೆಮಿಫೈನಲ್​ನಲ್ಲಿ ಭಾರತ ಸೋಲು ಕಂಡಿತ್ತು. ಇದಾದ ಬಳಿಕ ಟೆಸ್ಟ್​ ವಿಶ್ವಕಪ್​ ಫೈನಲ್​ನಲ್ಲಿಯೂ ಭಾರತ ಕಿವೀಸ್​ ವಿರುದ್ಧ ಮಂಡಿಯೂರಿತ್ತು. 2016ರ ಟಿ20 ವಿಶ್ವಕಪ್​ನಲ್ಲಿಯೂ ಭಾರತ ಸೋಲು ಕಂಡಿತ್ತು. ಒಟ್ಟಾರೆ ಭಾರತ 2007ರ ಬಳಿಕ ಆಡಿದ ಎಲ್ಲ ಐಸಿಸಿ ಮಹತ್ವದ ಟೂರ್ನಿಯಲ್ಲೂ ಸೋಲು ಕಂಡಿದೆ.

ಕಳೆದ ಬಾರಿ ಅಂದರೆ 2019ರ ವಿಶ್ವಕಪ್​ನ ಸೆಮಿಫೈನಲ್​ನಲ್ಲಿ ಭಾರತ ಇನ್ನೇನು ಗೆಲ್ಲಲಿದೆ ಎನ್ನುವಷ್ಟರಲ್ಲಿ ಧೋನಿ ಅವರನ್ನು ಗಪ್ಟಿಲ್ ರನೌಟ್​ ಮಾಡಿ ಭಾರತದ ವಿಶ್ವಕಪ್​ ಕನಸನ್ನು ಭಗ್ನಗೊಳಿಸಿದ್ದರು. ಈ ಸೋಲಿಗೆ ಭಾರತ ಭಾನುವಾರ ಸೇಡು ತೀರಿಸಿಕೊಳ್ಳಬೇಕಿದೆ.