ಪುಣೆ: ಬಾಂಗ್ಲಾದೇಶ(IND vs BAN) ತಂಡ ಇಂದು(ಗುರುವಾರ) ನಡೆಯುವ ವಿಶ್ವಕಪ್ ಪಂದ್ಯದಲ್ಲಿ ಭಾರತ ತಂಡದ ಸವಾಲು ಎದುರಿಸಲಿದೆ. ಈ ಪಂದ್ಯಕ್ಕೂ ಮುನ್ನ ತಂಡದ ಸಹ ಆಟಗಾರರಿಗೆ ಹಿರಿಯ ಆಟಗಾರ ಮುಷ್ಫಿಕರ್‌ ರಹೀಂ(Mushfiqur Rahim) ಸಲಹೆಯೊಂದನ್ನು ನೀಡಿದ್ದಾರೆ. ವಿರಾಟ್ ಕೊಹ್ಲಿಯನ್ನು(virat kohli) ತಪ್ಪಿಯೂ ಯಾರು ಕೂಡ ಕೆಣಕಬಾರದು, ಕೆಣಕಿದರೆ ನಮಗೆ ಅಪಾಯ ಎಂದು ಕಿವಿ ಮಾತು ಹೇಳಿದ್ದಾರೆ.
ವಿರಾಟ್ ಕೊಹ್ಲಿ ವೀರಾವೇಶ
ಸ್ಟಾರ್ ಸ್ಪೋರ್ಟ್ಸ್ ಸಂದರ್ಶನದಲ್ಲಿ ಮಾತನಾಡಿದ ಮುಷ್ಫಿಕರ್‌, “ವಿರಾಟ್ ಅವರನ್ನು ಯಾವುದೇ ಕಾರಣಕ್ಕೂ ಸ್ಲೆಡ್ಜ್ ಮಾಡಿ ಕೆಣಕುವುದಕ್ಕೆ ನಾವು ಕೈ ಹಾಕುವುದಿಲ್ಲ. ಒಂದೊಮ್ಮೆ ಸ್ಲೆಡ್ಜ್ ಮಾಡಿದರೆ ಕೊಹ್ಲಿ ವೀರಾವೇಶ ತಾಳುತ್ತಾರೆ. ಇದನ್ನೂ ನಾವು ಈಗಾಗಲೇ ಕಂಡಿದ್ದೇವೆ. ಹೀಗಾಗಿ ನಮ್ಮ ಬೌಲರ್ಗಳಲ್ಲಿ ನಾನು ವಿನಂತಿ ಮಾಡುವುದೇನೆಂದರೆ ದಯವಿಟ್ಟು ಕೊಹ್ಲಿಯನ್ನು ಮಾತ್ರ ಕೆಣಕದಿರಿ” ಎಂದು ಕೇಳಿಕೊಳ್ಳುವುದಾಗಿ ಹೇಳಿದರು.
ಕೊಹ್ಲಿಗೆ ಸ್ಲೆಡ್ಜಿಂಗ್ ಎಂದರೆ ಇಷ್ಟ. ಅವರನ್ನು ಸ್ಲೆಡ್ಜ್ ಮಾಡಿದಷ್ಟೂ ಉತ್ತಮವಾಗಿ ಬ್ಯಾಟಿಂಗ್ ಪ್ರದರ್ಶನ ತೋರುತ್ತಾರೆ. ಇದು ಈಗಾಗಲೇ ವಿಶ್ವದ ಎಲ್ಲ ತಂಡದ ಬೌಲರ್ ಮತ್ತು ನಾಯಕರಿಗೂ ತಿಳಿದಿರುವ ವಿಚಾರ. ಅನಗತ್ಯವಾಗಿ ಅವರನ್ನು ಕೆಣಕಿದರೆ ಗೆಲ್ಲುವ ಪಂದ್ಯವನ್ನು ಸೋಲುವಂತಾಗಬಹುದು. ಹೀಗಾಗಿ ಕೊಹ್ಲಿಯನ್ನು ಶಾಂತವಾಗಿ ಆಡಲು ಬಿಡಬೇಕು. ಆಗ ಅವರ ವಿಕೆಟ್ ಪಡೆಯುವುದು ಸುಲಭ ಎಂದು ಮುಷ್ಫಿಕರ್‌ ರಹೀಂ ಅಭಿಪ್ರಾಯಪಟ್ಟರು. ವಿರಾಟ್ ಕೊಹ್ಲಿ ಬಾಂಗ್ಲಾದೇಶ ಎದುರು ಈವರೆಗೆ ಆಡಿರುವ 26 ಪಂದ್ಯಗಳನ್ನು ಆಡಿದ್ದು 65.31ರ ಸರಾಸರಿಯಲ್ಲಿ 1437 ರನ್ ಬಾರಿಸಿದ್ದಾರೆ.
ಕೊನೆಯ ವಿಶ್ವಕಪ್
36 ವರ್ಷದ ಮುಷ್ಫಿಕರ್‌ ರಹೀಂ ಅವರಿಗೆ ಇದು ಕೊನೆಯ ವಿಶ್ವಕಪ್ ಟೂರ್ನಿಯಾಗಿದೆ. ಇದುವರೆಗೆ ಬಾಂಗ್ಲಾ ಪರ 259 ಏಕದಿನ ಪಂದ್ಯಗಳನ್ನು ಆಡಿರುವ ಅವರು 7,525 ರನ್ ಗಳಿಸಿದ್ದಾರೆ. 144 ವೈಯಕ್ತಿಕ ಗರಿಷ್ಠ ಮೊತ್ತವಾಗಿದೆ. 9 ಶತಕ ಮತ್ತು 48 ಅರ್ಧಶತಕ ಒಳಗೊಂಡಿದೆ. 86 ಟೆಸ್ಟ್ ಪಂದ್ಯಗಳನ್ನು ಆಡಿ 5553 ರನ್ ಬಾರಿಸಿದ್ದಾರೆ. 102 ಟಿ20 ಪಂದ್ಯಗಳಿಂದ 1500 ರನ್ ಕಲೆ ಹಾಕಿದ್ದಾರೆ.
ಇದನ್ನೂ ಓದಿ IND vs BAN: ಭಾರತ-ಬಾಂಗ್ಲಾ ಪಂದ್ಯಕ್ಕೆ ಮಳೆ ಕಾಟ ಇದೆಯೇ?
Mushfiqur Rahim said "I never sledge Virat Kohli because he gets pumped up & brings his best. I always tell my bowlers, 'don't sledge him'. He doesn't want to lose any single cricket match". [Star Sports] pic.twitter.com/7Ak34HLPd4
— Johns. (@CricCrazyJohns) October 19, 2023
ದ್ರಾವಿಡ್ ಜತೆ ಆಡಿದ್ದ ಮುಷ್ಫಿಕರ್‌ ರಹೀಂ
2007ರ ವಿಶ್ವಕಪ್ ಟೂರ್ನಿಯಲ್ಲಿ ಭಾರತ ತಂಡ ಬಾಂಗ್ಲಾ ವಿರುದ್ಧ ಸೋಲು ಕಂಡಾಗ ಮುಷ್ಫಿಕರ್‌ ರಹೀಂ ಅವರು ತಂಡದಲ್ಲಿದ್ದರು. ಅವರು ಆ ಪಂದ್ಯದಲ್ಲಿ ಅಜೇಯ 56 ರನ್ ಬಾರಿಸಿ ಬಾಂಗ್ಲಾ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಈ ಪಂದ್ಯ ಭಾರತ ಮತ್ತು ಬಾಂಗ್ಲಾ ನಡುವಣ ಮೊದಲ ವಿಶ್ವಕಪ್ ಮುಖಾಮುಖಿಯಾಗಿತ್ತು. ಭಾರತ 5 ವಿಕಟ್ಗಳ ಸೋಲು ಕಂಡು ಲೀಗ್ನಿಂದ ಹೊರಬಿದ್ದಿತ್ತು. ಆಗ ರಾಹುಲ್ ದ್ರಾವಿಡ್ ಅವರು ಭಾರತ ತಂಡದ ನಾಯಕರಾಗಿದ್ದರು. ಸ್ವಾರಸ್ಯವೆಂದರೆ ಈಗ ದ್ರಾವಿಡ್ ಭಾರತ ತಂಡದ ಮುಖ್ಯ ಕೋಚ್ ಆಗಿದ್ದಾರೆ. ಅಂದು ದ್ರಾವಿಡ್ ಎದುರು ಆಡಿದ್ದ ಮುಷ್ಫಿಕರ್‌ ರಹೀಂ ಇನ್ನೂ ಕೂಡ ತಂಡದಲ್ಲಿದ್ದಾರೆ.
ಸಂಭಾವ್ಯ ತಂಡಗಳು
ಭಾರತ: ರೋಹಿತ್ ಶರ್ಮ, ಇಶಾನ್ ಕಿಶನ್, ವಿರಾಟ್ ಕೊಹ್ಲಿ, ಶ್ರೇಯಸ್ ಅಯ್ಯರ್, ಕೆ.ಎಲ್ ರಾಹುಲ್, ಹಾರ್ದಿಕ್ ಪಾಂಡ್ಯ, ರವೀಂದ್ರ ಜಡೇಜಾ, ಮೊಹಮ್ಮದ್ ಸಿರಾಜ್/ ಮೊಹಮ್ಮದ್ ಶಮಿ, ಜಸ್ಪ್ರೀತ್ ಬುಮ್ರಾ, ಶಾರ್ದೂಲ್ ಠಾಕೂರ್, ಕುಲ್ದೀಪ್ ಯಾದವ್.
ಬಾಂಗ್ಲಾದೇಶ: ಲಿಟ್ಟನ್ ದಾಸ್, ತಂಝಿದ್ ಹಸನ್, ನಜ್ಮುಲ್ ಹೊಸೈನ್ ಶಾಂಟೊ, ಮೆಹಿದಿ ಹಸನ್ ಮಿರಾಜ್, ಶಕೀಬ್ ಅಲ್ ಹಸನ್ (ನಾಯಕ), ಮುಶ್ಫಿಕರ್ ರಹೀಮ್, ತೌಹಿದ್ ಹೃದಯೋಯ್, ಮಹಮ್ಮದುಲ್ಲಾ, ತಸ್ಕಿನ್ ಅಹ್ಮದ್, ಶೋರಿಫುಲ್ ಇಸ್ಲಾಂ, ಮುಸ್ತಫಿಜುರ್ ರೆಹಮಾನ್.