ಬೆಂಗಳೂರು: ಭಾರತ ಹಾಗೂ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡಗಳ ನಡುವಿನ ಮೂರನೇ ಪಂದ್ಯ ನಡೆದ ಇಂದೋರ್ ಪಿಚ್ಗೆ ಕಳಪೆ ರೇಟಿಂಗ್ಸ್ ಕೊಟ್ಟಿರುವ ಐಸಿಸಿ ನಿರ್ಧಾರವನ್ನು ಪ್ರಶ್ನಿಸಿ ಬಿಸಿಸಿಐ ಸಲ್ಲಿಸಿದ್ದ ಮನವಿ ಮಾನ್ಯಗೊಂಡಿದೆ. ಬಿಸಿಸಿಐ ಮೇಲ್ಮನವಿಯನ್ನು ಪುರಸ್ಕರಿಸಿರುವ ಐಸಿಸಿಯ ಕ್ರಿಕೆಟ್ ಕಮಿಟಿ ಸದಸ್ಯರು ಮ್ಯಾಚ್ ರೆಫರಿ ಕ್ರಿಸ್ ಬ್ರಾಡ್ ಅವರ ನಿರ್ಧಾರವನ್ನು ತಳ್ಳಿ ಹಾಕಿದ್ದು, ಪಿಚ್ ಕಳಪೆಯಾಗಿರಲಿಲ್ಲ, ಸರಾಸರಿಗಿಂತ ಕಡಿಮೆಯಾಗಿತ್ತು ಎಂದು ಹೇಳಿ ಕೇವಲ ಒಂದು ಡಿಮೆರಿಟ್ ಅಂಕ ವಿಧಿಸಿದೆ.
ಬಾರ್ಡರ್ ಗವಾಸ್ಕರ್ ಟ್ರೋಫಿಯ ಪಂದ್ಯ ನಡೆದ ಇಂದೋರ್ ಪಿಚ್ನಲ್ಲಿ ಎರಡು ದಿನ ಹಾಗೂ ಮೂರನೇ ದಿನ ಮೊದಲ ಅವಧಿ ಸೇರಿಕೊಂಡು ಒಟ್ಟಾರೆ 31 ವಿಕೆಟ್ಗಳು ಉರುಳಿದ್ದವು. ಹೀಗಾಗಿ ಮ್ಯಾಚ್ ರೆಫರಿ ಕ್ರಿಸ್ ಬ್ರಾಡ್ ಪಿಚ್ ಕಳಪೆಯಾಗಿತ್ತು ಎಂದು ವರದಿ ನೀಡಿ ಮೂರು ಡಿಮೆರಿಟ್ ಅಂಕಗಳನ್ನು ನೀಡಿದ್ದರು. ಡಿಮರಿಟ್ ಅಂಕಗಳನ್ನು ಪಡೆಯುವುದು ಪಿಚ್ ಒಂದರ ದೌರ್ಬಲ್ಯ ಎನಿಸಿಕೊಳ್ಳುತ್ತದೆ. ಯಾಕೆಂದರೆ ಐದು ವರ್ಷಗಳ ಅವಧಿಯಲ್ಲಿ ಆ ಪಿಚ್ಗೆ ಏನಾದರೂ ಐದು ಡಿಮೆರಿಟ್ ಅಂಕಗಳು ಲಭಿಸಿದರೆ ಒಂದು ವರ್ಷ ಕಾಲ ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಯೋಜಿಸಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಮಧ್ಯಪ್ರದೇಶ ಕ್ರಿಕೆಟ್ ಸಮಿತಿಯು ಐಸಿಸಿ ನಿರ್ಧಾರ ಸರಿಯಲ್ಲ ಎಂದು ಬಿಸಿಸಿಐಗೆ ಸೂಚನೆ ಕೊಟ್ಟಿತ್ತು.
ಮಧ್ಯಪ್ರದೇಶ ಕ್ರಿಕೆಟ್ ಸಮಿತಿಯ ಮನವಿ ಮೇರೆಗೆ ಬಿಸಿಸಿಐ ಈ ಬಗ್ಗೆ ಕಳವಳ ವ್ಯಕ್ತಪಡಿಸಿ ಐಸಿಸಿಗೆ ತೀರ್ಪನ್ನು ಮರು ಪರಿಶೀಲನೆ ಮಾಡುವಂತೆ ಕೋರಿತ್ತು. ಅದನ್ನು ಕ್ರಿಕೆಟ್ ಕಮಿಟಿ ಸದಸ್ಯರಾದ ಐಸಿಸಿ ಜನರಲ್ ಮ್ಯಾನೇಜರ್ ವಾಸಿಮ್ ಖಾನ್, ಕ್ರಿಕೆಟ್ ಕಮಿಟಿ ಸದಸ್ಯರಾದ ರೋಜರ್ ಹಾರ್ಪರ್ ಪರಿಶೀಲನೆ ನಡೆಸಿದ್ದಾರೆ. ಪಂದ್ಯದ ದೃಶ್ಯಗಳನ್ನು ಸಂಪೂರ್ಣವಾಗಿ ವೀಕ್ಷಿಸಿ ಪಿಚ್ ಅಪಾಯಕಾರಿಯಾಗಿರಲಿಲ್ಲ ಮತ್ತು ಕಳಪೆಯಾಗಿರಲಿಲ್ಲ ಎಂದು ತಿರ್ಮಾನಕ್ಕೆ ಬಂದಿದ್ದಾರೆ. ಪಿಚ್ ಸರಾಸರಿ ಗುಣಮಟ್ಟಕ್ಕಿಂತ ಕಡಿಮೆ ಇದ್ದ ಕಾರಣ ಕೇವಲ ಒಂದು ಡಿಮೆರಿಟ್ ಅಂಕಗಳನ್ನು ಮಾತ್ರ ನೀಡಲಾಗಿದೆ.
ಇದನ್ನೂ ಓದಿ : INDvsAUS : ಇಂದೋರ್ ಪಿಚ್ಗೆ ಡಿಮೆರಿಟ್ ಅಂಕ, ಮರುಪರಿಶೀಲನೆ ಅರ್ಜಿ ಸಲ್ಲಿಸಿದ ಬಿಸಿಸಿಐ
ಇಂದೋರ್ನಲ್ಲಿ ನಡೆದ ಪಿಚ್ನಲ್ಲಿ ಭಾರತ ತಂಡ ಸೋಲು ಕಂಡಿತ್ತು. ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಮ್ನಲ್ಲಿ ಆಯೋಜನೆಗೊಂಡ ನಂತರದ ಪಂದ್ಯವೂ ಡ್ರಾದಲ್ಲಿ ಕೊನೆಗೊಂಡಿತ್ತು. ಪಂದ್ಯದಲ್ಲಿ ವಿರಾಟ್ ಕೊಹ್ಲಿ 186 ರನ್ ಬಾರಿಸಿ ಮಿಂಚಿದ್ದರು. ಇದರ ಫಲವಾಗಿ ಸರಣಿಯು 2-1 ಅಂತರದಿಂದ ಭಾರತ ತಂಡದ ಪಾಲಾಗಿತ್ತು. ಈ ಫಲಿತಾಂಶದ ಹಿನ್ನೆಲೆ ಭಾರತ ತಂಡ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ನ ಫೈನಲ್ಗೆ ಆಯ್ಕೆಯಾಗಿದೆ. ಜೂನ್ನಲ್ಲಿ ಇಂಗ್ಲೆಂಡ್ ಕೆನಿಂಗ್ಟನ್ ಓವಲ್ನಲ್ಲಿ ಪಂದ್ಯ ನಡೆಯಲಿದೆ.