ಕೇಪ್ಟೌನ್ (ದಕ್ಷಿಣ ಆಫ್ರಿಕಾ): ಮಹಿಳೆಯರ ಟಿ20 ವಿಶ್ವ ಕಪ್ನಲ್ಲಿ (Women’s T20 World Cup) ಭಾರತ ತಂಡ ಸೆಮಿ ಫೈನಲ್ಸ್ ಹಂತದಲ್ಲಿ ಅಭಿಯಾನ ಮುಗಿಸಿದೆ. ಫೆಬ್ರವರಿ 23ರಂದು ನಡೆದ ಉಪಾಂತ್ಯದ ಹಣಾಹಣಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ 5 ರನ್ಗಳಿಂದ ಸೋತ ಹರ್ಮನ್ಪ್ರೀತ್ ಕೌರ್ ಬಳಗ ನಿರಾಸೆ ಎದುರಿಸಿತು. 173 ರನ್ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಲು ವಿಫಲಗೊಂಡ ಭಾರತದ ವನಿತೆಯರ ವಿಶ್ವ ಕಪ್ ಕನಸು ನುಚ್ಚುನೂರಾಯಿತು. ಅಗ್ರ ಕ್ರಮಾಂಕದ ಬ್ಯಾಟರ್ಗಳ ವೈಫಲ್ಯವೇ ಭಾರತದ ಸೋಲಿಗೆ ಕಾರಣವಾಯಿತು.
ನ್ಯೂಲ್ಯಾಂಡ್ಸ್ ಕ್ರಿಕೆಟ್ ಮೈದಾನದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ತಂಡ ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 172 ರನ್ ಪೇರಿಸಿತು. ಗುರಿ ಬೆನ್ನಟ್ಟಲು ಹೊರಟ ಭಾರತೀಯ ಬಳಗ ತನ್ನ ಪಾಲಿನ ಓವರ್ಗಳು ಮುಕ್ತಾಯಗೊಂಡಾಗ 8 ವಿಕೆಟ್ ನಷ್ಟಕ್ಕೆ 167 ರನ್ ಬಾರಿಸಿ ಸೋಲು ಕಂಡಿತು.
ದೊಡ್ಡ ಗುರಿಯನ್ನು ಬೆನ್ನಟ್ಟುವ ದಾರಿಯಲ್ಲಿ ನಾಯಕ ಹರ್ಮನ್ಪ್ರೀತ್ ಕೌರ್ (52) ಸ್ಫೋಟಕ ಅರ್ಧ ಶತಕ ಬಾರಿಸಿದರೆ, ಜೆಮಿಮಾ ರೋಡ್ರಿಗಸ್ (43) ಕೂಡ ಉತ್ತಮ ನೆರವು ಕೊಟ್ಟರು. ಆದರೆ, ಶಫಾಲಿ ವರ್ಮಾ (9) ಹಾಗೂ ಸ್ಮೃತಿ ಮಂಧಾನಾ (2) ಹಾಗೂ ಯಸ್ತಿಕಾ ಭಾಟಿಯಾ (4) ವೈಫಲ್ಯ ಕಂಡ ಕಾರಣ ಭಾರತ ತಂಡ ಉತ್ತಮ ಆರಂಭ ಪಡೆಯಲಿಲ್ಲ. ರಿಚಾ ಘೋಷ್ (14), ದೀಪ್ತಿ ಶರ್ಮಾ (20) ಹಾಗೂ ಸ್ನೇಹಾ ರಾಣಾ (11) ಕೊನೆಯಲ್ಲಿ ಹೋರಾಟ ನಡೆಸಿದರೂ ಗುರಿ ಮುಟ್ಟಲು ಸಾಧ್ಯವಾಗಲಿಲ್ಲ.
ಅದಕ್ಕಿಂತ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ ಅಲಿಸಾ ಹೀಲಿ (25) ಹಾಗೂ ಬೆತ್ ಮೂನಿ (54) ಅವರ ಜತೆಯಾಟದ ಮೂಲಕ ಮೊದಲ ವಿಕೆಟ್ಗೆ 52 ರನ್ ಗಳಿಸಿತು. ಬಳಿಕ ಮೆಗ್ ಲ್ಯಾನಿಂಗ್ (39) ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. ಆಶ್ಲೇ ಗಾರ್ಡ್ನರ್ ಕೂಡ 31 ರನ್ ಕೊಡುಗೆ ಕೊಟ್ಟರು.
ಇದನ್ನೂ ಓದಿ : T20 World Cup : ಐರ್ಲೆಂಡ್ ವಿರುದ್ಧ 5 ರನ್ ಜಯ, ವಿಶ್ವ ಕಪ್ನ ಸೆಮಿ ಫೈನಲ್ಗೇರಿದ ಭಾರತ ಮಹಿಳೆಯರ ತಂಡ
ಭಾರತ ತಂಡದ ಪರ ಬೌಲಿಂಗ್ನಲ್ಲಿ ಶಿಖಾ ಪಾಂಡೆ 32 ರನ್ಗಳಿಗೆ 2 ವಿಕೆಟ್ ಕಬಳಿಸಿದರು.