ಸಿಡ್ನಿ: ಟಿ20 ವಿಶ್ವ ಕಪ್ ಅಂಕ ಪಟ್ಟಿಯಲ್ಲಿ ಸದ್ಯ ಒಂದು ಗೆಲುವಿನೊಂದಿಗೆ 2ನೇ ಸ್ಥಾನದಲ್ಲಿರುವ ಟೀಮ್ ಇಂಡಿಯಾ(IND) ಗುರುವಾರ ನೆದರ್ಲೆಂಡ್ಸ್ ವಿರುದ್ಧ ಮುಖಾಮುಖಿಯಾಗಲಿದೆ. ಈ ಪಂದ್ಯದಲ್ಲಿ ರೋಹಿತ್ ಪಡೆ ಗೆಲುವು ಸಾಧಿಸಿದರೆ 2ನೇ ಗುಂಪಿನಲ್ಲಿ ಮೊದಲನೇ ಸ್ಥಾನಕ್ಕೇರುವ ಅವಕಾಶ ಹೊಂದಿದೆ. ಆದ್ದರಿಂದ ಭಾರತ ದೊಡ್ಡ ಅಂತರದಲ್ಲಿ ಗೆದ್ದು ಅಂಕದ ಜತೆಗೆ ರನ್ರೇಟ್ ಕೂಡ ಸುಧಾರಿಸಬೇಕಿದೆ.
ಪಿಚ್ ರಿಪೋರ್ಟ್: ಈ ಪಿಚ್ ಹೆಚ್ಚಾಗಿ ಸ್ಪಿನ್ ಬೌಲಿಂಗ್ಗೆ ನೆರವಾಗಲಿದೆ. ಟಿ20 ವಿಶ್ವ ಕಪ್ನ ಉದ್ಘಾಟನ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನ್ಯೂಜಿಲೆಂಡ್ ತಂಡದ ಸ್ಪಿನ್ನರ್ಗಳು ಮೇಲುಗೈ ಸಾಧಿಸಿದ್ದೇ ಇದಕ್ಕೆ ಉತ್ತಮ ನಿದರ್ಶನ. ಹೀಗಾಗಿ ಭಾರತವೂ ಸ್ಪಿನ್ ಅಸ್ತ್ರವನ್ನು ಬಳಸಬೇಕಿದೆ. ಆದರೆ ಅಕ್ಷರ್ ಪಟೇಲ್ ಕಳೆದ ಪಾಕ್ ವಿರುದ್ಧದ ಪಂದ್ಯದಲ್ಲಿ ದುಬಾರಿಯಾಗಿದ್ದರು. ಅವರ ಸ್ಥಾನಕ್ಕೆ ಯಜುವೇಂದ್ರ ಚಹಲ್ ಅವರನ್ನು ಬಳಸಿಕೊಂಡರೆ ಸ್ಪಿನ್ ವಿಭಾಗ ಮತ್ತಷ್ಟು ಬಲಿಷ್ಠ ಗೊಳ್ಳಲಿದೆ. ಉಳಿದಂತೆ ಬ್ಯಾಟರ್ಗಳಿಗೂ ಈ ಪಿಚ್ ನೆರವಾಗಲಿದೆ.
ಮಳೆ ಮುನ್ಸೂಚನೆ
ಸಿಡ್ನಿಯಲ್ಲಿ ಗುರುವಾರ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಈ ನಿಟ್ಟಿನಲ್ಲಿ ಭಾರತ ಮತ್ತು ನೆದರ್ಲೆಂಡ್ಸ್ ಪಂದ್ಯಕ್ಕೆ ಮಳೆ ಭೀತಿ ಎದುರಾಗಿದೆ. ಭಾನುವಾರ ಮೆಲ್ಬೋರ್ನ್ನಲ್ಲಿಯೂ ಇದ್ದ ಮಳೆ ಭೀತಿ ಕೊನೆಗೆ ಠುಸ್ ಪಟಾಕಿಯಾಗಿತ್ತು. ಇದೀಗ ಸಿಡ್ನಿಯಲ್ಲೂ ಇದೇ ರೀತಿ ಆದರೆ ಅಚ್ಚರಿ ಪಡಬೇಕಿಲ್ಲ. ಆದರೆ ಪಂದ್ಯದ ವೇಳೆ ಮೋಡ ಕವಿದ ವಾತಾವರಣವಂತೂ ಇರಲಿದೆ.
ಮೆಲ್ಬೋರ್ನ್ನಲ್ಲಿ ಬುಧವಾರ ಮಳೆಯಾದ ಕಾರಣ ಇಂಗ್ಲೆಂಡ್ ಮತ್ತು ಐರ್ಲೆಂಡ್ ವಿರುದ್ಧ ಪಂದ್ಯವನ್ನು ಡಕ್ವರ್ತ್‌ ಲೂಯಿಸ್ ನಿಯಮದ ಮೂಲಕ ಫಲಿತಾಂಶ ಪಡೆಯಲಾಯಿತು. ಆದರೆ ದಿನದ ಮತ್ತೊಂದು ಪಂದ್ಯವಾದ ನ್ಯೂಜಿಲೆಂಡ್-ಅಫಘಾನಿಸ್ತಾನ ಪಂದ್ಯ ಮಳೆಯಿಂದಾಗಿ ಒಂದೂ ಎಸೆತವನ್ನು ಕಾಣದೆ ರದ್ದುಗೊಂಡಿತು. ಸಿಡ್ನಿ ನಗರದಲ್ಲಿಯೂ ಮಂಗಳವಾರ ಸಣ್ಣ ಪ್ರಮಾಣದ ಮಳೆಯಾಗಿದೆ.
ಪಂದ್ಯ ಆರಂಭ: ಮಧ್ಯಾಹ್ನ 12.30(ಭಾರತೀಯ ಕಾಲಮಾನ)
ಸ್ಥಳ: ಸಿಡ್ನಿ
ನೇರ ಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್
ಇದನ್ನೂ ಓದಿ | T20 World Cup | ಮಳೆ ಪಂದ್ಯದಲ್ಲಿ ಮೇಲುಗೈ ಸಾಧಿಸಿದ ಐರ್ಲೆಂಡ್; ಇಂಗ್ಲೆಂಡ್ ವಿರುದ್ಧ 5 ರನ್ ಜಯ