IND vs SL: ಇಂದು ಭಾರತಕ್ಕೆ ಹಾಲಿ ಚಾಂಪಿಯನ್​ ಲಂಕಾ ಎದುರಾಳಿ; ಗೆದ್ದರೆ ರೋಹಿತ್​ ಪಡೆ ಫೈನಲ್​ಗೆ

ಕೊಲಂಬೊ: ಪಾಕಿಸ್ತಾನ ವಿರುದ್ಧ ಸೋಮವಾರ ಬೃಹತ್​ ಮೊತ್ತದ ಅಂತರದಿಂದ ಗೆದ್ದು ಬೀಗಿದ ಭಾರತ ತಂಡ, ಮರು ದಿನವೇ ಹಾಲಿ ಚಾಂಪಿಯನ್​ ಶ್ರೀಲಂಕಾ(IND vs SL) ವಿರುದ್ಧ ಮತ್ತೊಂದು ಪಂದ್ಯವನ್ನಾಡಲು ಸಿದ್ಧವಾಗಿದೆ. ಉಭಯ ತಂಡಗಳ ಈ ಹೋರಾಟದಲ್ಲಿ ಯಾರೇ ಗೆದ್ದರು ಫೈನಲ್​ಗೆ ನೇರ ಪ್ರವೇಶ ಪಡೆಯಲಿದ್ದಾರೆ. ಹೀಗಾಗಿ ಈ ಪಂದ್ಯ ರೋಚಕವಾಗಿ ಸಾಗುವ ನಿರೀಕ್ಷೆ ಇದೆ. ಆದರೆ ಈ ಪಂದ್ಯಕ್ಕೂ ಮಳೆಯ ಭೀತಿ ಕಾಡಿದೆ.

ರಾಹುಲ್​-ಕೊಹ್ಲಿ ಮೇಲೆ ಮತ್ತೊಂದು ನಿರೀಕ್ಷೆ

ಗಾಯದಿಂದ ಚೇತರಿಕೆ ಕಂಡು ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಕಣಕ್ಕಿಳಿದಿದ್ದ ಕನ್ನಡಿಗ ಕೆ.ಎಲ್​ ರಾಹುಲ್​ ಭರ್ಜರಿ ಶತಕ ಬಾರಿಸಿ ಗ್ರೇಟ್​ ಕಮ್​ಬ್ಯಾಕ್​ ಮಾಡಿದ್ದಾರೆ. ರಾಹುಲ್​ ಅವರ ಈ ಕಮ್​ಬ್ಯಾಕ್​ ವಿಶ್ವಕಪ್​ ಟೂರ್ನಿಗೂ ಮುನ್ನ ಭಾರತಕ್ಕೆ ಹೆಚ್ಚಿನ ಆತ್ಮವಿಶ್ವಾಸ ಮೂಡುವಂತೆ ಮಾಡಿದೆ. ಅವರು ಗಾಯದಿಂದ ಚೇತರಿಕೆ ಕಂಡ ತಕ್ಷಣ ಏಷ್ಯಾಕಪ್​ಗೆ ಆಯ್ಕೆ ಮಾಡಿದ ವಿಚಾರದಲ್ಲಿ ಸುನೀಲ್​ ಗವಾಸ್ಕರ್​, ರವಿಶಾಸ್ತ್ರಿ ವಿರೋಧ ವ್ಯಕ್ತಪಡಿಸಿದ್ದರು. ಇದಕ್ಕೆ ಪಾಕ್​ ವಿರುದ್ಧದ ಪಂದ್ಯದಲ್ಲಿ ರಾಹುಲ್ ಬ್ಯಾಟ್​ ಮೂಲಕವೇ ಉತ್ತರಿಸಿದ್ದರು. ಇದೀಗ ಲಂಕಾ ವಿರುದ್ಧದ ಪಂದ್ಯದಲ್ಲೂ ಅವರ ಮೇಲೆ ತಂಡ ನಿರೀಕ್ಷೆಯೊಂದನ್ನು ಮಾಡಿದೆ. ಜತೆಗೆ ಪ್ರಚಂಡ ಫಾರ್ಮ್​ನಲ್ಲಿರುವ ಕೊಹ್ಲಿಯ ಮೇಲು ತಂಡ ವಿಶ್ವಾಸ ಇಟ್ಟಿದೆ.

ವಿಶ್ವಕಪ್​ಗೆ ಮೊದಲ ಕೀಪರ್​ ಆಗಿ ಆಯ್ಕೆಗೊಂಡ ರಾಹುಲ್​ ಅವರೇ ಈ ಪಂದ್ಯದಲ್ಲಿಯೂ ಕೀಪಿಂಗ್​ ನಡೆಸಲಿದ್ದಾರೆ. ಇಶಾನ್​ ಕಿಶನ್​ ಕೇವಲ ಬ್ಯಾಟಿಂಗ್​ ರೋಲ್​ ಮಾತ್ರ ನಿರ್ವಹಿಸಲಿದ್ದಾರೆ. ಓಪನಿಂಗ್​ ವಿಭಾಗದಲ್ಲಿ ಎಡವುತ್ತಿದ್ದ ನಾಯಕ ರೋಹಿತ್​ ಉತ್ತಮ ಫಾರ್ಮ್​ ಕಂಡುಕೊಂಡಿದ್ದಾರೆ. ಗಿಲ್​ ಜತೆ ಸೇರಿಕೊಂಡು ತಂಡಕ್ಕೆ ಉತ್ತಮ ಆರಂಭ ಒದಗಿಸುತ್ತಿದ್ದಾರೆ. ಹೀಗಾಗಿ ಬ್ಯಾಟಿಂಗ್​ ಬಲಿಷ್ಠವಾಗಿ ಗೋಚರಿಸಿದೆ.

ಒಂದು ಬದಲಾವಣೆ ಸಾಧ್ಯತೆ

ಬೌಲಿಂಗ್​ನಲ್ಲಿ ಚೈನಾಮನ್​ ಖ್ಯಾತಿಯ ಕುಲ್​ದೀಪ್​ ಯಾದವ್​ ಮತ್ತೊಮ್ಮೆ ಮೋಡಿ ಮಾಡುವ ವಿಶ್ವಾಸದಲ್ಲಿದ್ದಾರೆ. ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಪ್ರಮುಖ 5 ವಿಕೆಟ್​ ಉರುಳಿಸಿ ಮೆರೆದಾಡಿದ್ದರು. ಜತೆಗೆ ಪಾಂಡ್ಯ ಇನ್​ಸ್ವಿಂಗ್​ ಮೂಲಕ ಗಮನಸೆಳೆದಿದ್ದರು. ನಿರೀಕ್ಷೆಗೆ ತಕ್ಕ ಪ್ರದರ್ಶನ ತೋರುವಲ್ಲಿ ವಿಫಲರಾಗಿದ್ದ ಶಾರ್ದೂಲ್​ ಅವರನ್ನು ಈ ಪಂದ್ಯದಲ್ಲಿ ಕೈಬಿಟ್ಟು ಅನುಭವಿ ಮೊಹಮ್ಮದ್​ ಶಮಿ ಅವರಿಗೆ ಅವಕಾಶ ನೀಡುವ ಸಾಧ್ಯತೆ ಇದೆ.

ಇದನ್ನೂ ಓದಿ IND vs SL: ಭಾರತ-ಲಂಕಾ ಪಂದ್ಯಕ್ಕೂ ಮಳೆ ಭೀತಿ; ಪಿಚ್​ ರಿಪೋರ್ಟ್​, ಸಂಭಾವ್ಯ ತಂಡ ಹೀಗಿದೆ

ಲಂಕಾ ಸವಾಲು ಸುಲಭವಲ್ಲ

ಶ್ರೀಲಂಕಾ ತಂಡದಲ್ಲಿ ಹೆಚ್ಚಿನ ಸ್ಟಾರ್​ ಆಟಗಾರರು ಕಾಣಿಸಿಕೊಳ್ಳದಿದ್ದರೂ ಅವರ ಸವಾಲನ್ನು ಹಗುರವಾಗಿ ತೆಗೆದುಕೊಳ್ಳಬಾರದು. ಏಕೆಂದರೆ ಯುವ ಆಟಗಾರರನ್ನೆ ನೆಚ್ಚಿಕೊಂಡ ಲಂಕಾ ಕಳೆದ ಬಾರಿ ಅಂಡರ್​ ಡಾಗ್​ ಎಂದೇ ಪರಿಗಣಿಸಿದ್ದರೂ ಕಪ್​ ಎತ್ತಿ ಮೆರೆದಾಡಿತ್ತು. ಅಲ್ಲದೆ ಈ ಬಾರಿ ತವರಿನ ಲಾಭವೂ ತಂಡಕ್ಕಿದೆ. ಹೀಗಾಗಿ ಎಚ್ಚರಿಕೆಯಿಂದ ಭಾರತ ತಂಡ ಆಡಬೇಕಿದೆ. ಕಡೆಗಣಿಸಿದರೆ ಕೈ ಸುಟ್ಟುಕೊಳ್ಳುವುದು ಖಚಿತ. ಲಂಕಾ ಎಲ್ಲ ವಿಭಾಗದಲ್ಲಿಯೂ ಸಮತೋಲನವಾಗಿದೆ.

ಮೀಸಲು ದಿನ ಇಲ್ಲ

ಈ ಪಂದ್ಯಕ್ಕೆ ಮಳೆ ಬಂದರೆ ಮೀಸಲು ದಿನ ಇಲ್ಲ. ಹೀಗಾಗಿ ಪಂದ್ಯ ಮಳೆಯಿಂದ ನಡೆಯದೇ ಹೋದರೆ ಉಭಯ ತಂಡಗಳಿಗೆ ತಲಾ ಒಂದು ಅಂಕ ನೀಡಲಾಗುತ್ತದೆ. ಸದ್ಯ ಅಂಕಪಟ್ಟಿಯಲ್ಲಿ ಇತ್ತಂಡಗಳು 2 ಅಂಕ ಸಂಪಾದಿಸಿ ಕ್ರಮವಾಗಿ ಮೊದಲೆರಡು ಸ್ಥಾನದಲ್ಲಿ ಕಾಣಿಸಿಕೊಂಡಿದೆ.