ರೊಸೇಯೂ (ಡೊಮಿನಿಕಾ): ಏಕದಿನ ವಿಶ್ವ ಕಪ್ ಟೂರ್ನಿಗೆ ಅರ್ಹತೆ ಪಡೆಯುವಲ್ಲಿ ವಿಫಲವಾಗಿ ಹತಾಶರಾಗಿರುವ ವೆಸ್ಟ್ ಇಂಡೀಸ್(IND vs WI) ತಂಡ ಪ್ರವಾಸಿ ಭಾರತ ವಿರುದ್ಧ ಟೆಸ್ಟ್ ಸರಣಿ ಆಡಲು ಸಜ್ಜಾಗಿದೆ. ಇತ್ತಂಡಗಳ ಮೊದಲ ಮುಖಾಮುಖಿ ಬುಧವಾರ ವಿಂಡ್ಸರ್ ಪಾರ್ಕ್‌ನಲ್ಲಿ ಆರಂಭಗೊಳ್ಳಲಿದೆ.
ಅದೊಂದು ಕಾಲವಿತ್ತು… ವೆಸ್ಟ್ ಇಂಡೀಸ್(West Indies Cricket) ವಿರುದ್ಧ ಆಡುವುದೆಂದರೆ ಎಂತಹ ಆಟಗಾರರ ಎದೆಯೂ ಒಮ್ಮೆ ನಡುಗಲಾರಂಭಿಸುತಿತ್ತು. ಸೋಲಿನ ಭಯ ಮಾತ್ರವಲ್ಲ, ದೇಹದ ಯಾವ ಭಾಗಕ್ಕೆ ಎಷ್ಟು ಹಾನಿ ಆಗಲಿದೆ ಎಂಬ ಆತಂಕ ಕಾಡುತಿತ್ತು. ಈ ಬಾರಿ ಏನು ಕಾದಿದೆಯೊ ಎನ್ನುವಷ್ಟು ಹೆದರಿಕೆ. ವೆಸ್ಟ್ ಇಂಡೀಸ್ ತಂಡದ ಹೆಸರು ಕೇಳಿದರೆ ಆಟಗಾರರ ಕುಟುಂಬದವರೂ ಆತಂಕಕ್ಕೆ ಒಳಗಾಗುತ್ತಿದ್ದ ಕಾಲವದು. ಅಂತಹ ತಂಡದ ವಿರುದ್ಧ ಇಂದು ಯಾರು ಬೇಕಾದರೂ ಗೆಲ್ಲಬಹುದು ಎಂಬ ಸ್ಥಿತಿ ಬಂದೊದಗಿದೆ. ಇಂಥ ತಂಡ ಈ ಬಾರಿಯ ವಿಶ್ವಕಪ್ಗೂ ಅರ್ಹತೆ ಪಡೆಯುವಲ್ಲಿ ವಿಫ‌ಲವಾಗಿದೆ. ಸ್ಕಾಟ್ಲೆಂಡ್‌ನಂಥ ಪುಟ್ಟ ತಂಡದೆದುರು ಅರ್ಹತಾ ಸುತ್ತಿನಲ್ಲಿ ಸೋತು ನಿರಾಶೆ ಅನುಭವಿಸಿತ್ತು. ಅಧಃಪತನ ಹಂತಕ್ಕೆ ಬಂದಿರುವ ವಿಂಡೀಸ್ ತಂಡದ ಪುನರುತ್ಥಾನ ಇದೀಗ ಭಾರತ ವಿರುದ್ಧದ ಸರಣಿಯಿಂದಲೇ ಆರಂಭಗೊಳ್ಳಲಿದೆಯಾ ಎನ್ನುವುದು ಈ ಸರಣಿಯ ಕೌತುಕ.
ಐಪಿಎಲ್ ಸೇರಿ ವಿಶ್ವದ ಅನೇಕ ಕ್ರಿಕೆಟ್ ಲೀಗ್ಗಳು ಯಾವತ್ತೂ ಉಗಮವಾಯಿತೋ ಅಂದಿನಿಂದ ವೆಸ್ಟ್ ಇಂಡೀಸ್ ತಂಡದ ಅಧಃಪತನವೂ ಆರಂಭವಾಯಿತು ಎಂದರೂ ತಪ್ಪಗಲಾರದು. ಆದರೆ ಇದೀಗ ಮತ್ತೆ ಹಳೆಯ ವಿಂಡೀಸ್ ತಂಡವನ್ನು ಕಟ್ಟಲು ಮಾಜಿ ಆಟಗಾರ ಬ್ರಿಯೆನ್ ಲಾರಾ ಸೇರಿದಂತೆ ಅನೇಕ ಮಾಜಿ ದಿಗ್ಗಜರು ಪಣತೊಟ್ಟಿದ್ದಾರೆ. ಇದರ ಪ್ರತಿಫಲ ಭಾರತ ವಿರುದ್ಧದ ಸರಣಿಯಲ್ಲಿ ಕಾಣಿಸಿಕೊಳ್ಳಲಿದೆಯಾ ಎಂದು ಕಾದು ನೋಡಬೇಕಿದೆ.
ಶಿವನಾರಾಯಣ್ ಚಂದ್ರಪಾಲ್ ಅವರ ಪುತ್ರ ತೇಜನಾರಾಯಣ ಚಂದ್ರಪಾಲ್, ಕ್ರೆಗ್ ಬ್ರಾತ್ವೇಟ್ ಸೇರಿ ಅನೇಕ ಯುವ ಆಟಗಾರರನ್ನು ಹೊಂದಿರುವ ವಿಂಡೀಸ್ ತಂಡ ಭಾರತಕ್ಕೆ ಸಡ್ಡು ಹೊಡೆದು ನಿಂತರೆ ವಿಂಡೀಸ್ ತಂಡ ತನ್ನ ಹಳೆಯ ಫಾರ್ಮ್ಗೆ ಮರಳಲು ಇಟ್ಟ ಮೊದಲ ಹೆಜ್ಜೆ ಇದು ಎನ್ನಬಹುದು. ಐಸಿಸಿ ಟ್ರೋಫಿ ಗೆಲ್ಲದಿದ್ದರೂ ಭಾರತ ತಂಡ ವಿಶ್ವದ ಬಲಿಷ್ಠ ತಂಡವಾಗಿದೆ. ಹೀಗಾಗಿ ಭಾರತದ ಸವಾಲು ಮೆಟ್ಟಿ ನಿಲ್ಲುವುದು ಕೂಡ ಅಷ್ಟೂ ಸುಲಭದಲ್ಲ. ವಿಂಡೀಸ್ ವಿರುದ್ಧ ಕಳೆದ 21 ವರ್ಷಗಳ ಅವಧಿಯಲ್ಲಿ ಆಡಿದ 8 ಟೆಸ್ಟ್ ಸರಣಿಯಲ್ಲಿ ಭಾರತ ಅಜೇಯ ದಾಖಲೆ ಕಾಯ್ದುಕೊಂಡಿದೆ.
ಇದನ್ನೂ ಓದಿ IND vs WI: ನೂತನ ಟೆಸ್ಟ್ ಜೆರ್ಸಿಯಲ್ಲಿ ಕಂಗೊಳಿಸಿದ ಭಾರತೀಯ ಆಟಗಾರರು; ಹಣಕ್ಕೋಸ್ಕರ ದೇಶದ ಹೆಸರೇ ಮಾಯಾ!
𝘿𝙊 𝙉𝙊𝙏 𝙈𝙄𝙎𝙎!
— BCCI (@BCCI) July 11, 2023
When #TeamIndia Captain @ImRo45 turned reporter in Vice-Captain @ajinkyarahane88's press conference 😎
What do you make of the questions 🤔 #WIvIND pic.twitter.com/VCEbrLfxrq
ಚೊಚ್ಚಲ ಅವಕಾಶ ನಿರೀಕ್ಷೆಯಲ್ಲಿ ಇಶಾನ್,ಜೈಸ್ವಾಲ್
ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಸೋಲಿನ ಬಳಿಕ ಬಿಸಿಸಿಐ ತಂಡದಲ್ಲಿ ಕೆಲ ಬದಲಾವಣೆಗೆ ಒತ್ತು ನೀಡಿದೆ. ಇದೇ ಕಾರಣಕ್ಕೆ ಅನೇಕ ಹಿರಿ ಆಟಗಾರರನ್ನು ಈ ಸರಣಿಯಿಂದ ಕೈ ಬಿಟ್ಟು ಯುವ ಆಟಗಾರರಿಗೆ ಮಣೆ ಹಾಕಿದೆ. ಐಪಿಎಲ್ನಲ್ಲಿ ಮಿಂಚಿದ್ದ ಯಶಸ್ವಿ ಜೈಸ್ವಾಲ್, ಇಶಾನ್ ಕಿಶನ್ ಮತ್ತು ಮುಖೇಶ್ ಕುಮಾರ್ ಅವರು ಈ ಪಂದ್ಯದಲ್ಲಿ ಆಡುವ ಸಾಧ್ಯತೆ ಅಧಿಕವಾಗಿದೆ. ಒಂದೊಮ್ಮೆ ಈ ಮೂವರು ಆಟಗಾರರು ಆಡುವ ಬಳಗದಲ್ಲಿ ಕಾಣಿಸಿಕೊಂಡರೆ ಇದು ಅವರಿಗೆ ಪದಾರ್ಪಣ ಟೆಸ್ಟ್ ಪಂದ್ಯವಾಗಲಿದೆ. ಜೈಸ್ವಾಲ್ ಅವರು ಈಗಾಗಲೇ ಅಭ್ಯಾಸದಲ್ಲಿ ರೋಹಿತ್ ಜತೆ ಬ್ಯಾಟಿಂಗ್ ನಡೆಸಿ ಗಮನಸೆಳೆದಿದ್ದಾರೆ. ಎಡಗೈ ಆಟಗಾರನಾಗಿರುವ ಕಾರಣದಿಂದ ಅವರು ರೋಹಿತ್ ಜತೆ ಇನಿಂಗ್ಸ್ ಆರಂಭಿಸುವುದು ಬಹುತೇಕ ಖಚಿತ. ಆದರೆ ಋತುರಾಜ್ ಗಾಯಕ್ವಾಡ್ ಅವರು ಅವಕಾಶಕ್ಕಾಗಿ ಇನ್ನು ಕೆಲ ಪಂದ್ಯಗಳಲ್ಲಿ ಕಾಯಬೇಕಾದಿತು.