ಮುಂಬಯಿ: 2023 ರ ವಿಶ್ವಕಪ್‌ಗೆ ಮುಂಚಿತವಾಗಿ ಭಾರತ ಕ್ರಿಕೆಟ್ ತಂಡಕ್ಕೆ ಹಾಗೂ ಅಭಿಮಾನಿಗಳಿಗೆ ಶುಭ ಸುದ್ದಿ ದೊರಕಿದೆ. ಭಾರತದ ಸ್ಟಾರ್ ವೇಗಿ ಜಸ್ಪ್ರೀತ್ ಬುಮ್ರಾ ಭಾರತದ ಐರ್ಲೆಂಡ್ ಪ್ರವಾಸ ಹೋಗಲಿರುವ ಭಾರತ ತಂಡದಲ್ಲಿ ಸ್ಥಾನ ಪಡೆಯಲಿದ್ದಾರೆ. ಬೆನ್ನುನೋವಿನ ಸಮಸ್ಯೆಯಿಂದಾಗಿ 2022ರ ಸೆಪ್ಟೆಂಬರ್‌ನಿಂದ ಬುಮ್ರಾ ಆಡಿರಲಿಲ್ಲ. ಅದರ ಪರಿಣಾಮ ಪ್ರತಿಯೊಂದು ಟೂರ್ನಿಯಲ್ಲಿ ಪ್ರತಿಫಲನಗೊಂಡಿತ್ತು. ಹೀಗಾಗಿ ಅವರ ಮರಳುವಿಕೆ ತಂಡಕ್ಕೆ ಚೈತನ್ಯ ತಂದೆ.
ಟೀಮ್‌ ಇಂಡಿಯಾದ ಆಯ್ಕೆದಾರರು ಮತ್ತು ಬಿಸಿಸಿಐ ಮತ್ತು ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯು ಬುಮ್ರಾ ಅವರು ಫಿಟ್ ಆಗಿರುವ ಸೂಚನೆ ಕೊಟ್ಟಿದೆ. 50 ಓವರ್‌ಗಳ ಆಟದ ಒತ್ತಡವನ್ನು ನೀಡುವ ಮೊದಲು ತಂಡದ ಮ್ಯಾನೇಜ್ಮೆಂಟ್‌ ಟಿ 20 ಪಂದ್ಯಗಳಲ್ಲಿ ಅವರ ಫಿಟ್‌ನೆಸ್‌ ಪರೀಕ್ಷೆ ಮಾಡಲು ಬಯಸಿದೆ. ಭಾರತವು ಆಗಸ್ಟ್ 18, 20 ಮತ್ತು 23ರಂದು ಐರ್ಲೆಂಡ್ ವಿರುದ್ಧ ಮೂರು ಟಿ ೨೦ ಪಂದ್ಯಗಳನ್ನು ಆಡಲಿದೆ. ಅದರಲ್ಲಿ ಬುಮ್ರಾ ಪಾಲ್ಗೊಳ್ಳಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ : World Cup 2023 : ಜೂನ್ 27ರಂದು ವಿಶ್ವ ಕಪ್‌ ವೇಳಾಪಟ್ಟಿ ಪ್ರಕಟ
2023ರ ವಿಶ್ವಕಪ್ ವೇಳೆಗೆ ಬುಮ್ರಾ ಅವರನ್ನು ಫುಟ್‌ ಫಿಟ್ ಮಾಡುವುದು ಬಿಸಿಸಿಐ ಆಲೋಚನೆಯಾಗಿದೆ. ಆದಾಗ್ಯೂ, ಅವರು ಸುಮಾರು ಒಂದು ವರ್ಷದಿಂದ ಕ್ರಿಕೆಟ್ ಆಡದ ಅವರಿಗೆ ಏಕಾಏಕಿ ತಂಡಕ್ಕೆ ಪ್ರವೇಶ ಕೊಡಿಸಲು ಬಿಸಿಸಿಐ ಉತ್ಸುಕವಾಗಿಲ್ಲ. ಹಂತಹಂತವಾಗಿ ಆಡಿಸುವ ಉದ್ದೇಶ ಹೊಂದಿದೆ. ಐರ್ಲೆಂಡ್ ಪ್ರವಾಸದ ಬಳಿಕ ಶ್ರೀಲಂಕಾದಲ್ಲಿ ನಡೆಯಲಿರುವ ಏಷ್ಯಾಕಪ್‌ನಲ್ಲಿ ಭಾರತ ತಂಡ ಆಡಲಿದೆ. ಇದು ವಿಶ್ವ ಕಪ್‌ಗೆ ಮೊದಲು ಬುಮ್ರಾ ಅವರ ಮೊದಲ 50 ಓವರ್‌ಗಳ ಪಂದ್ಯವಾಗಿರಲಿದೆ.
ಕಳೆದ ಒಂದು ವರ್ಷದಿಂದ ಬುಮ್ರಾ ಅವರ ಗಾಯದ ವಿವರ ಮತ್ತು ಚಟುವಟಿಕೆ
- ಜುಲೈ 2022: ಜುಲೈ 2022ರಲ್ಲಿ ಇಂಗ್ಲೆಂಡ್ ವಿರುದ್ಧದ 2 ನೇ ಏಕದಿನ ಪಂದ್ಯದ ನಂತರ ಬುಮ್ರಾ ಬೆನ್ನುನೋವಿನಿಂದ ಬಳಲಿದ್ದರು. 3ನೇ ಏಕದಿನ ಪಂದ್ಯದಿಂದ ಹೊರಗುಳಿದರು. ಸಮಾಲೋಚನೆಯ ಬಳಿಕ 2019ರಲ್ಲಿ ಅವರು ಅನುಭವಿಸಿದ ಬೆನ್ನುನೋವಿನ ಪುನರಾವರ್ತನೆಯಾಗಿದೆ ಎಂದು ತಿಳಿದುಬಂತು
- ಆಗಸ್ಟ್ 2022: ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಸರಣಿಯಿಂದ ವಂಚಿತರಾದರು. ಅವರ ಬೆನ್ನು ಸಮಸ್ಯೆ ಉಲ್ಬಣಗೊಂಡ ಕಾರಣ ಬೆಂಗಳೂರಿನ ಎನ್‌ಸಿಎಗೆ ಮರಳಿದ್ದರು.
- ಆಗಸ್ಟ್ 2022: ಸಮಯಕ್ಕೆ ಸರಿಯಾಗಿ ಚೇತರಿಸಿಕೊಳ್ಳಲು ವಿಫಲವಾದ ಕಾರಣ ಬುಮ್ರಾ ಏಷ್ಯಾ ಕಪ್‌ನಿಂದ ಹೊರಗುಳಿದರು.
- ಸೆಪ್ಟೆಂಬರ್ 2022: ಎರಡೂವರೆ ತಿಂಗಳ ಚೇತರಿಕೆಯ ನಂತರ, ಬುಮ್ರಾ ಅವರನ್ನು ಟಿ20 ವಿಶ್ವಕಪ್‌ಗೆ ಮುಂಚಿತವಾಗಿ ದಕ್ಷಿಣ ಆಫ್ರಿಕಾ ಸರಣಿಗೆ ಆಯ್ಕೆ ಮಾಡಲಾಯಿತು.
- ಸೆಪ್ಟೆಂಬರ್ 2022: ಎರಡು ಟಿ20 ಪಂದ್ಯಗಳಲ್ಲಿ ಕೇವಲ 6 ಓವರ್‌ಗಳನ್ನು ಎಸೆದ ಬುಮ್ರಾ ಗಾಯದ ಸಮಸ್ಯೆಗೆ ಒಳಗಾದರು.
- ಅಕ್ಟೋಬರ್ 2022: ಬುಮ್ರಾ ಟಿ 20 ವಿಶ್ವಕಪ್‌ನಿಂದ ಸಂಪೂರ್ಣವಾಗಿ ಹೊರಗುಳಿದರು.
- ನವೆಂಬರ್ 2022: ವೇಗದ ಬೌಲರ್ ನ್ಯೂಜಿಲೆಂಡ್ ಪ್ರವಾಸದಿಂದ ವಂಚಿತರಾದರು.
- ಡಿಸೆಂಬರ್ 2022: ಅವರು ಬಾಂಗ್ಲಾದೇಶ ಪ್ರವಾಸವನ್ನೂ ತಪ್ಪಿಸಿಕೊಂಡರು.
- ಜನವರಿ 2023: ಆರಂಭದಲ್ಲಿ ಶ್ರೀಲಂಕಾ ಏಕದಿನ ಸರಣಿಯಲ್ಲಿ ಅವರನ್ನು ಹೆಸರಿಸಲಾಗಿದ್ದರೂ ನಂತರ ತೆಗೆದು ಹಾಕಲಾಯಿತು.
- ಫೆಬ್ರವರಿ 2023: ಬಾರ್ಡರ್ ಗವಾಸ್ಕರ್ ಟ್ರೋಫಿಯಿಂದ ಬುಮ್ರಾ ಹೊರಗುಳಿದರು
- ಮಾರ್ಚ್ 2023: ನ್ಯೂಜಿಲೆಂಡ್‌ನಲ್ಲಿ ಬೆನ್ನು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು.
- ಜೂನ್ 2023: ಶಸ್ತ್ರಚಿಕಿತ್ಸೆಯ ನಂತರ ಪುನಶ್ಚೇತನವನ್ನು ಮುಂದುವರಿಸಲಾಯಿತು.
ವೇಗಿ ಬುಮ್ರಾ ಪ್ರಸ್ತುತ ಎನ್‌ಸಿಎನಲ್ಲಿ ಪುನಶ್ಚೇತನಕ್ಕೆ ಒಳಗಾಗುತ್ತಿದ್ದಾರೆ. ಕ್ರಿಕ್ಬಝ್ ವರದಿಯ ಪ್ರಕಾರ, ಅವರು ಶೇಕಡಾ 70 ಚೇತರಿಸಿಕೊಂಡಿದ್ದಾರೆ. ಐರ್ಲೆಂಡ್ ಪ್ರವಾಸಕ್ಕೆ ಎರಡು ತಿಂಗಳು ಬಾಕಿಯಿದ್ದು, ಅಷ್ಟೊತ್ತಿಗಾಗಲೇ ಅವರೂ ಪೂರ್ತಿಯಾಗಿ ಚೇತರಿಸಿಕೊಳ್ಳಲಿದ್ದಾರೆ. ಬುಮ್ರಾ ಶೇಕಡಾ 100 ಫಿಟ್ ಆಗಿದ್ದರೆ ಮಾತ್ರ ಐರ್ಲೆಂಡ್ ವಿರುದ್ಧ ಆಡಲಿದ್ದಾರೆ.
ತಮ್ಮ ಸುಧಾರಣೆಯನ್ನು ಮುಂದುವರಿಸಲು, ಬುಮ್ರಾ ಮುಂದಿನ ತಿಂಗಳು ಎನ್‌ಸಿಎನಲ್ಲಿ ಕೆಲವು ಪಂದ್ಯಗಳನ್ನು ಆಡಲಿದ್ದಾರೆ ಮತ್ತು ಪೂರ್ಣ ಪ್ರಮಾಣದಲ್ಲಿ ಬೌಲಿಂಗ್ ಮಾಡಲು ಪ್ರಾರಂಭಿಸಲಿದ್ದಾರೆ. ಈ ಪಂದ್ಯಗಳು ವೇಗದ ಬೌಲರ್‌ಗೆ ದೊಡ್ಡ ಪರೀಕ್ಷೆಯಾಗಿದೆ.