ಮುಂಬಯಿ : ರಿಲಯನ್ಸ್‌ ಒಡೆತನದ ಎಮ್‌ಐ ಗ್ಲೋಬಲ್ (Mumbai Indians) 2023ರ ಟಿ20 ಕ್ರಿಕೆಟ್ ಋತುವಿಗೆ ನಾಯಕರ ಹೆಸರುಗಳನ್ನು ಶುಕ್ರವಾರ ಪ್ರಕಟಿಸಿದೆ. ಅಂತೆಯೇ ಯುಎಇ ಕ್ರಿಕೆಟ್ ಲೀಗ್‌ನ (ಐಎಲ್ಟಿ20) ಎಂಐ ಎಮಿರೇಟ್ಸ್ ತಂಡಕ್ಕೆ ಆಲ್‌ರೌಂಡರ್‌ ಕೀರನ್ ಪೊಲಾರ್ಡ್ ನಾಯಕರಾಗಿದ್ದು, ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಲೀಗ್‌ನ (ಎಸ್ಎ20) ಎಂಐ ಕೇಪ್ಟೌನ್ ತಂಡಕ್ಕೆ ರಶೀದ್ ಖಾನ್ ಅವರಿಗೆ ನಾಯಕತ್ವ ನೀಡಲಾಗಿದೆ.
ದಕ್ಷಿಣ ಆಫ್ರಿಕಾ ಮತ್ತು ಯುಎಇಟಿ20 ಕ್ರಿಕೆಟ್ ಲೀಗ್‌ಗಳಿಗೆ ಪ್ರವೇಶ ಪಡೆಯುವ ಮೂಲಕ ಮುಂಬೈ ಇಂಡಿಯನ್ಸ್ ಜಾಗತಿಕ ಮಟ್ಟಕ್ಕೆ ವಿಸ್ತರಣೆಗೊಂಡಿದೆ. ಎಂಐ ಎಮಿರೇಟ್ಸ್ ಮತ್ತು ಎಂಐ ಕೇಪ್ಟೌನ್ ತಂಡಗಳು 2023ರ ಜನವರಿಯಲ್ಲಿ ಆರಂಭವಾಗಲಿರುವ ಈ ಟಿ20 ಲೀಗ್‌ಗಳ ಚೊಚ್ಚಲ ಆವೃತ್ತಿಯಲ್ಲಿ ಪಾಲ್ಗೊಳ್ಳಲಿವೆ.
“2023ರ ಕ್ರಿಕೆಟ್ ಋತುವಿಗೆ ನಮ್ಮ ಎಂಐ ಗ್ಲೋಬಲ್ ಕುಟುಂಬದ ಹೊಸ ನಾಯಕರ ಹೆಸರು ಘೋಷಿಸಲು ಅಪಾರ ಖುಷಿಯಾಗುತ್ತಿದೆ. ಪ್ರತಿಭೆ, ಅನುಭವ ಮತ್ತು ಉತ್ಸಾಹದ ಮಿಶ್ರಣವನ್ನು ಒಳಗೊಂಡ ಇಬ್ಬರು ಹೊಸ ನಾಯಕರನ್ನು ನಾವು ಪಡೆದಿದ್ದೇವೆ. ಪೊಲಾರ್ಡ್ ಮತ್ತು ರಶೀದ್ ಇಬ್ಬರೂ ಎಂಐನ ಮುಂಬಯಿ ಇಂಡಿಯನ್ಸ್ ಕ್ರಿಕೆಟ್ ಬ್ರಾಂಡ್‌ಗೆ ಶಕ್ತಿ ತುಂಬಲಿದ್ದಾರೆ’ ಎಂದು ಎಂಐ ಗ್ಲೋಬಲ್‌ನ ಮುಖ್ಯಸ್ಥರಾದ ಆಕಾಶ್ ಎಂ. ಅಂಬಾನಿ ಅವರು ಹೇಳಿದ್ದಾರೆ.
ಕೀರನ್ ಪೊಲಾರ್ಡ್ ನೇತೃತ್ವದ ಎಂಐ ಎಮಿರೇಟ್ಸ್ ತಂಡದಲ್ಲಿ ಡ್ವೇನ್ ಬ್ರಾವೊ, ನಿಕೋಲಸ್ ಪೂರನ್, ಟ್ರೆಂಟ್ ಬೌಲ್ಟ್ ಮತ್ತು ಇಮ್ರಾನ್ ತಾಹಿರ್ ಮತ್ತಿತರ ಸ್ಟಾರ್‌ ಆಟಗಾರರನ್ನು ಒಳಗೊಂಡಿದೆ. 2023ರ ಜನವರಿ 13ರಂದು ಆರಂಭವಾಗಲಿರುವ ಐಎಲ್ಟಿ20 ಟೂರ್ನಿಯಲ್ಲಿ ಎಂಐ ಎಮಿರೇಟ್ಸ್ ತಂಡ ಪದಾರ್ಪಣೆ ಮಾಡಲಿದೆ.
ರಶೀದ್ ಖಾನ್ ಸಾರಥ್ಯದ ಎಂಐ ಕೇಪ್ಟೌನ್ ತಂಡವು ದಕ್ಷಿಣ ಆಫ್ರಿಕಾದ ಸ್ಥಳೀಯ ತಾರೆಯರಾದ ಕಗಿಸೊ ರಬಾಡ, ಡಿವಾಲ್ಡ್ ಬ್ರೇವಿಸ್, ರಸ್ಸೀ ವಾನ್ ಡರ್ ಡುಸೆನ್ ಅವರೊಂದಿಗೆ ಜೋಫ್ರಾ ಆರ್ಚರ್, ಸ್ಯಾಮ್ ಕರನ್, ಲಿಯಾಮ್ ಲಿವಿಂಗ್‌ಸ್ಟನ್‌ ಅವರನ್ನು ಒಳಗೊಂಡಿದೆ. ಎಸ್ಎ20 ಟೂರ್ನಿಯು 2023ರ ಜನವರಿ 10ರಂದು ಆರಂಭಗೊಳ್ಳಲಿದ್ದು, ಎಂಐ ಕೇಪ್ಟೌನ್ ತಂಡವು ಉದ್ಘಾಟನಾ ಪಂದ್ಯದಲ್ಲೇ ಕಣಕ್ಕಿಳಿಯಲಿದೆ.
ಇದನ್ನೂ ಓದಿ | IPL 2023 | ಐಪಿಎಲ್‌ಗೆ ವಿದಾಯ ಹೇಳಿದ ಡ್ವೇನ್ ಬ್ರಾವೊ; ಸಿಎಸ್‌ಕೆ ತಂಡದಲ್ಲಿ ಹೊಸ ಜವಾಬ್ದಾರಿ