ಕೌಲಾಲಂಪುರ: ಎರಡು ಬಾರಿಯ ಒಲಿಂಪಿಕ್‌ ಪದಕ ವಿಜೇತೆ ಭಾರತದ ಷಟ್ಲರ್‌ ಪಿ.ವಿ. ಸಿಂಧೂ ಇಲ್ಲಿ ನಡೆಯುತ್ತಿರುವ Malaysia Open ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಬುಧವಾರ ಕ್ವಾರ್ಟರ್‌ ಫೈನಲ್ಸ್‌ಗೆ ಪ್ರವೇಶ ಪಡೆದಿದ್ದಾರೆ.
ವಿಶ್ವದ ಏಳನೇ ರ‍್ಯಾಂಕ್ ನ ಆಟಗಾರ್ತಿಯಾಗಿರುವ ಪಿ.ವಿ. ಸಿಂಧೂ ಅವರು ಥಾಯ್ಲೆಂಡ್‌ನ ಪ್ರತಿಸ್ಪರ್ಧಿ ಪಿಟ್ಟಯಿಪೊರ್ನ್‌ ಚೈವಾನ್‌ ವಿರುದ್ಧ ೧೯-೨೧, ೨೧-೯, ೨೧-೧೪ ಗೇಮ್‌ಗಳಿಂದ ಗೆಲುವು ಸಾಧಿಸುವ ಮೂಲಕ ಎಂಟರ ಘಟ್ಟಕ್ಕೆ ಪ್ರವೇಶ ಪಡೆದರು. ಮುಂದಿನ ಸುತ್ತಿನಲ್ಲಿ ಅವರು ಚೈನೀಸ್‌ ತೈಪೆಯ ತಾಯ್‌ ಜು ಯಿಂಗ್‌ ವಿರುದ್ಧ ಆಡಬೇಕಾಗಿದೆ.
ಇದೇ ವೇಳೆ ವಿಶ್ವದ ೨೧ನೇ ರ‍್ಯಾಂಕ್‌ನ ಎಚ್‌ ಎಸ್‌ ಪ್ರಣಯ್‌ ಪುರುಷರ ಸಿಂಗಲ್ಸ್‌ನಲ್ಲಿ ಕ್ವಾರ್ಟರ್‌ಫೈನಲ್ಸ್‌ ಹಂತಕ್ಕೇರಿದ್ದಾರೆ. ಅವರು ಟೂರ್ನಿಯ ನಾಲ್ಕನೇ ಶ್ರೇಯಾಂಕದ ಚೈನೀಸ್‌ ತೈಪೆಯ ಆಟಗಾರ ಚೊ ಟಿನ್‌ ಚೆನ್‌ ವಿರುದ್ಧ ೨೧-೧೫, ೨೧-೭ ಅಂಕಗಳಿಂದ ಗೆಲುವು ಸಾಧಿಸಿದರು.
ಭಾರತ ತಂಡ ಥಾಮಸ್‌ ಕಪ್ ಗೆಲ್ಲುವಲ್ಲಿ ಪ್ರಧಾನ ಪಾತ್ರ ವಹಿಸಿದ್ದ ಪ್ರಣಯ್‌ ಅವರು ಮುಂದಿನ ಸುತ್ತಿನಲ್ಲಿ ವಿಶ್ವದ ೭ ರ‍್ಯಾಂಕ್‌ನ ಆಟಗಾರ ಇಂಡೋನೇಷ್ಯಾದ ಜೊನಾಥನ್‌ ಕ್ರಿಸ್ಟಿ ವಿರುದ್ಧ ಆಡಬೇಕಾಗಿದೆ.
ಬುಧವಾರ ಸಂಜೆಯ ವೇಳೆ ಭಾರತದ ಪುರುಷರ ಡಬಲ್ಸ್‌ ಜೋಡಿಯಾಗಿರುವ ಸಾತ್ವಿಕ್‌ಸಾಯಿರಾಜ್‌ ರಾಂಕಿ ರೆಡ್ಡಿ ಹಾಗೂ ಚಿರಾಗ್‌ ಶೆಟ್ಟಿ ಜೋಡಿ ಹಾಗೂ ಕಾಮನ್ವೆಲ್ತ್‌ ಗೇಮ್ಸ್‌ ಮಾಜಿ ಚಾಂಪಿಯನ್‌ ಪರುಪಳ್ಳಿ ಕಶ್ಯಪ್‌ನಲ್ಲಿ ಆಡಲಿದ್ದಾರೆ.
ಇದನ್ನೂ ಓದಿ: Malaysia Open: ಸಿಂಧೂ, ಕಶ್ಯಪ್‌ಗೆ ಗೆಲುವು