ರಾವಲ್ಪಿಂಡಿ : ಪ್ರವಾಸಿ ಇಂಗ್ಲೆಂಡ್‌ ವಿರುದ್ಧದ ಟೆಸ್ಟ್‌ ಸರಣಿಯ (ENGvsPAK) ಮೊದಲ ಪಂದ್ಯದ ಮೂರನೇ ದಿನ ಪಾಕಿಸ್ತಾನ ತಂಡದ ನಾಯಕ ಬಾಬರ್ ಅಜಮ್‌ ಶತಕ ಬಾರಿಸಿದ್ದಾರೆ. ಅಜಮ್‌ ೧೪ ಫೋರ್‌ ಹಾಗೂ ಒಂದು ಸಿಕ್ಸರ್‌ಗಳ ನೆರವಿನಿಂದ ೧೨೬ ಎಸೆತಗಳಲ್ಲಿ ಶತಕ ಬಾರಿಸಿದ್ದರು. 136 ರನ್‌ ಗಳಿಸಿದ ಅವರು ಜಾಕ್ ಲೀಚ್‌ಗೆ ವಿಕೆಟ್ ಒಪ್ಪಿಸಿದ್ದರು. ಅದಕ್ಕಿಂತ ಮೊದಲು ಇಂಗ್ಲೆಂಡ್‌ ಪೇರಿಸಿದ್ದ ೬೫೭ ರನ್‌ಗೆ ಪ್ರತಿಯಾಗಿ ಬ್ಯಾಟ್‌ ಮಾಡಿದ ಪಾಕಿಸ್ತಾನ ತಂಡದ ಆರಂಭಿಕರಾದ ಅಬ್ದುಲ್ಲಾ ಶಫಿಕ್‌ (೧೧೪), ಇಮಾಮ್‌ ಉಲ್‌ ಹಕ್‌ (೧೨೧) ಶತಕ ಬಾರಿಸಿದ್ದರು. ಇವರ ನೆರವಿನಿಂದ ಮೂರನೇ ದಿನದ ಅಂತ್ಯಕ್ಕೆ ಪಾಕ್‌ ೭ ವಿಕೆಟ್‌ಗೆ ೪೯೯ ರನ್‌ ಬಾರಿಸಿದೆ.
ಬಾಬರ್ ಶತಕ ಬಾರಿಸುತ್ತಿದ್ದಂತೆ ಅವರನ್ನು ಟ್ವೀಟ್‌ ಮೂಲಕ ಹೊಗಳಿದ ಇಂಗ್ಲೆಂಡ್‌ ತಂಡದ ಮಾಜಿ ನಾಯಕ ಮೈಕೆಲ್‌ ವಾನ್‌ “ಇದೊಂದು ಅದ್ಭುತ ಶತಕ. ಎಲ್ಲ ಮಾದರಿಯ ಕ್ರಿಕೆಟ್‌ನಲ್ಲಿ ಬಾಬರ್ ಅಜಮ್‌ ಅತ್ಯುತ್ತಮ ಆಟಗಾರ,” ಎಂಬುದಾಗಿ ಬರೆದುಕೊಂಡಿದ್ದಾರೆ.
ಮೈಕೆಲ್‌ ಅವರ ಹೊಗಳಿಕೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳನ್ನು ಕೆರಳಿಸಿದೆ. ರಾವಲ್ಪಿಂಡಿ ಪಿಚ್‌ನಲ್ಲಿ ಇಂಗ್ಲೆಂಡ್‌ನ ಮೂವರು ಬ್ಯಾಟರ್‌ ಸೇರಿದಂತೆ ಒಟ್ಟಾರೆ ಆರು ಮಂದಿ ಶತಕ ಬಾರಿಸಿರುವಾಗ ಬಾಬರ್ ಅವರ ಶತಕವನ್ನು ಅದ್ಭುತ ಎಂದು ಹೊಗಳಿದ ವಾನ್‌ ಹೇಳಿಕೆಯನ್ನು ತೆಗಳಿದ್ದಾರೆ.
ಇದೊಂದು ಸಪಾಟು ಪಿಚ್‌. ಇಲ್ಲಿ ಭಾರತ ತಂಡದ ಸ್ಪಿನ್ನರ್ ಆರ್‌ ಅಶ್ವಿನ್‌ ಕೂಡ ತ್ರಿಶತಕ ಬಾರಿಸಬಲ್ಲರು. ನಾನೇನು ಬಾಬರ್ ವಿರೋಧಿಯಲ್ಲ. ಆದರೆ, ಈ ಪಿಚ್‌ನಲ್ಲಿ ಬಾರಿಸಿದ ಶತಕವನ್ನು ಹೊಗಳುವ ಅಗತ್ಯವಿಲ್ಲ. ನನ್ನ ಪ್ರಕಾರ ನೀವು ಇಂಗ್ಲೆಂಡ್‌ ತಂಡ ಪಂದ್ಯವನ್ನು ಬಿಟ್ಟರೆ ಇನ್ಯಾವುದನ್ನೂ ನೋಡುತ್ತಿಲ್ಲ ಎಂದು ಅನಿಸುತ್ತದೆ ಎಂದು ಬರೆದುಕೊಂಡಿದ್ದಾರೆ.
ಇನ್ನೊಬ್ಬರು, ಈ ಪಿಚ್‌ನಲ್ಲಿ ಯಾರೂ ೩೦ ರನ್‌ಗಳಿಗಿಂತ ಹೆಚ್ಚು ಗಳಿಸಿಲ್ಲ. ಇಂಥ ಸಂದರ್ಭದಲ್ಲಿ ಬಾಬರ್ ಶತಕ ಬಾರಿಸಿದ್ದಾರೆ ಎಂದು ಹೇಳುತ್ತಿದ್ದೀರಿ ಎಂಬುದಾಗಿ ವಾನ್‌ ಅವರನ್ನು ಲೇವಡಿ ಮಾಡಿದ್ದಾರೆ.
ಇದನ್ನೂ ಓದಿ | Kohli VS Babar | ಬಾಬರ್ ಅಜಮ್‌ಗಿಂತ ವಿರಾಟ್‌ ಹೇಗೆ ಶ್ರೇಷ್ಠ ಬ್ಯಾಟರ್‌? ಪಾಕ್‌ ಲೆಜೆಂಡ್‌ಗಳು ವಿವರಿಸಿದ್ದಾರೆ