ರಾಂಚಿ: ಜುಲೈ 7ರ ಶುಕ್ರವಾರದಂದು ವಿಶ್ವದಾದ್ಯಂತದ ಕ್ರಿಕೆಟ್ ಪ್ರೇಮಿಗಳು ಲೆಜೆಂಡರಿ ಎಂ.ಎಸ್.ಧೋನಿ (MS Dhoni) ಅವರ 42 ನೇ ಹುಟ್ಟುಹಬ್ಬಕ್ಕೆ ಶುಭ ಹಾರೈಸಿದ್ದಾರೆ. ದಿನವಿಡೀ ಭಾರತ ತಂಡದ ಮಾಜಿ ನಾಯಕ ಟ್ವಿಟರ್ ಮತ್ತು ಇನ್ಸ್ಟಾಗ್ರಾಮ್ನಲ್ಲಿ ಟ್ರೆಂಡಿಂಗ್ನಲ್ಲಿದ್ದರು ಇದೀಗ ಭಾರತದ ಮಾಜಿ ನಾಯಕನ ಬರ್ತ್ಡೇ ವೀಡಿಯೊಗಳು ವೈರಲ್ ಆಗಿದ್ದು ಇಂಟರ್ನೆಟ್ನಲ್ಲಿ ಬಿರುಗಾಳಿ ಎಬ್ಬಿಸಿವೆ. ಏಕೆಂದರೆ ಅವರು ತಮ್ಮ ಹುಟ್ಟುಹಬ್ಬವನ್ನು ವಿಭಿನ್ನ ರೀತಿಯಲ್ಲಿ ಆಚರಿಸಿಕೊಂಡಿದ್ದು ಅದನ್ನು ಸಾಕಷ್ಟು ಮಂದಿ ಮೆಚ್ಚಿದ್ದಾರೆ. ಧೋನಿ ತಮ್ಮ ಪ್ರೀತಿಯ ನಾಯಿಗಳೊಂದಿಗೆ ಹುಟ್ಟು ಹಬ್ಬವನ್ನು ಆಚರಿಸಿಕೊಂಡು ಅವುಗಳಿಗೆ ಕೇಕ್ ತಿನಿಸಿದ್ದಾರೆ.
ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಈ ವಿಡಿಯೊವನ್ನು ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಅಚ್ಚರಿ ಎಂದರೆ ಅವರು ಐದು ತಿಂಗಳ ಬಳಿಕ ಈ ವೇದಿಕೆಯಲ್ಲಿ ವಿಡಿಯೊವೊಂದು ಅಪ್ಲೋಡ್ ಮಾಡಿದ್ದಾರೆ. ಅದಕ್ಕೆ ಧೋನಿಯ ಅಪಾರ ಅಭಿಮಾನಿಗಳು ಭಾರಿ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ಹೃದಯಸ್ಪರ್ಶಿ ವೀಡಿಯೊದಲ್ಲಿ, 42 ವರ್ಷದ ಧೋನಿ ತನ್ನ ಸಾಕು ನಾಯಿಗಳ ಮುಂದೆ ಕೇಕ್ ಕತ್ತರಿಸುವುದನ್ನು ಕಾಣಬಹುದು. ನಂತರ, ನಾಯಿಗಳ ಕಡೆಗೆ ಕೇಕ್ಗಳ ತುಂಡನ್ನು ಎಸೆಯುತ್ತಾರೆ. ಐದು ನಾಯಿಗಳಿಗೆ ಒಂದೊಂದರಂತೆ ಕೇಕ್ ಹಾಕಿದ್ದಾರೆ. ಜತೆಗೆ ಅದರಲ್ಲೊಂದು ತುಣುಕು ಕೇಕ್ ಅನ್ನು ತಾವು ಕೂಡ ತಿಂದಿದ್ದಾರೆ.
ಯುವ ಪೀಳಿಗೆಗೆ ಪ್ರೇರಣೆ ನೀಡಿರುವ ದಿಗ್ಗಜ ಕ್ರಿಕೆಟಿಗ ಸಾಧ್ಯವಾದಷ್ಟು ಸಾಮಾಜಿಕ ಜಾಲತಾಣಗಳಿಂದ ದೂರವಿರುತ್ತಾರೆ. ಅವರ ಅಭಿಮಾನಿಗಳು ಅದಕ್ಕೆ ಒಗ್ಗಿಕೊಂಡಿದ್ದಾರೆ. ಹುಟ್ಟುಹಬ್ಬದ ಶುಭಾಶಯಗಳಿಗೆ ಪ್ರತಿಕ್ರಿಯೆ ತಿಳಿಸಲು ಅವರಿಂದ ಪೋಸ್ಟ್ ಪ್ರಕಟವಾಗಿರುವುದನ್ನು ನೋಡಿದ ಅಭಿಮಾನಿಗಳು ಖಂಡಿತವಾಗಿಯೂ ಆಶ್ಚರ್ಯಚಕಿತರಾಗುತ್ತಿದ್ದರು. ನಿಸ್ಸಂದೇಹವಾಗಿ ಅಭಿಮಾನಿಗಳಿಗೆ ಅತ್ಯುತ್ತಮ ರಿಟರ್ನ್ ಉಡುಗೊರೆಯಾಗಿದೆ. ವೀಡಿಯೊದ ಶೀರ್ಷಿಕೆಯಲ್ಲಿ, ಧೋನಿ ತಮ್ಮ ಅಭಿಮಾನಿಗಳಿಗೆ ಆತ್ಮೀಯ ಶುಭಾಶಯಗಳಿಗಾಗಿ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ. ಜತೆಗೆ ತಮ್ಮ ಜನ್ಮದಿನವನ್ನು ಹೇಗೆ ಆಚರಿಸಿಕೊಂಡೆ ಎಂಬುದರ ವಿಡಿಯೊವನ್ನೂ ಅಪ್ಲೋಡ್ ಮಾಡಿದ್ದಾರೆ.
ಇದನ್ನೂ ಓದಿ : MS Dhoni: ಇದನ್ನು ತಿಂದರೆ ಪಂದ್ಯದಲ್ಲಿ ಗೆಲುವು ಖಂಡಿತ; ಧೋನಿ ನಂಬುತ್ತಿದ್ದ ಮೌಢ್ಯ ಇದು!
“ನಿಮ್ಮೆಲ್ಲರ ಆತ್ಮೀಯ ಶುಭಾಶಯಗಳಿಗೆ ಧನ್ಯವಾದಗಳು, ನನ್ನ ಜನ್ಮದಿನದಂದು ನಾನು ಏನು ಮಾಡಿದ್ದೇನೆ ಎಂಬುದರ ಒಂದು ಇಣುಕುನೋಟ” ಎಂದು ಧೋನಿ ಪೋಸ್ಟ್ನ ಶೀರ್ಷಿಕೆಯಲ್ಲಿ ಬರೆದಿದ್ದಾರೆ. ಧೋನಿ ಅವರ ಪೋಸ್ಟ್ ಈಗಾಗಲೇ ಒಂದು ಗಂಟೆಯೊಳಗೆ 25 ಲಕ್ಷಕ್ಕೂ ಅಧಿಕ ಲೈಕ್ ಗಿಟ್ಟಿಸಿಕೊಂಡಿತ್ತು.
ಧೋನಿಗೆ ಶುಭಾಶಯ ಕೋರಿದ್ದ ಸಚಿನ್
ಸಚಿನ್ ತೆಂಡೂಲ್ಕರ್ ಮತ್ತು ಎಂಎಸ್ ಧೋನಿ ಸಾರ್ವಕಾಲಿಕ ಅತ್ಯಂತ ಜನಪ್ರಿಯ ಭಾರತೀಯ ಕ್ರಿಕೆಟಿಗರು. ಅವರು ಭಾರತಕ್ಕಾಗಿ ಹಲವಾರು ವರ್ಷಗಳ ಕಾಲ ಒಟ್ಟಿಗೆ ಆಡಿದ್ದರು. ಭಾರತ ತಂಡಕ್ಕೆ ಹಲವಾರು ಪ್ರಶಸ್ತಿಗಳನ್ನು ತಂದುಕೊಟ್ಟವರು. ಧೋನಿಯ ಜನ್ಮದಿನದಂದು, ‘ಲಿಟ್ಲ್ ಮಾಸ್ಟರ್’ ಸಚಿನ್ ಹೃದಯಸ್ಪರ್ಶಿ ಟ್ವೀಟ್ ಕೂಡ ಮಾಡಿದ್ದಾರೆ. ಕ್ರಿಕೆಟ್ ಉತ್ಸಾಹಿಗಳಿಂದ ಈ ಟ್ವೀಟ್ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತಗೊಂಡಿತು. ಹೆಲಿಕಾಪ್ಟರ್ ಶಾಟ್ನಂತೆಯೇ ನಿಮ್ಮ ಖ್ಯಾತಿ ಎತ್ತರಕ್ಕೆ ಏರುತ್ತಲೇ ಇರಲಿ. ನಿಮಗೆ ಹುಟ್ಟುಹಬ್ಬದ ಶುಭಾಶಯಗಳು ಎಂದು ಸಚಿನ್ ಬರೆದುಕೊಂಡಿದ್ದಾರೆ.