ಮುಂಬಯಿ: ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಒಡೆತನದ ಮುಂಬಯಿ ಇಂಡಿಯನ್ಸ್, ತನ್ನ ಐದನೇ ಕ್ರಿಕೆಟ್ ಫ್ರಾಂಚೈಸಿಯಾಗಿ ‘ಎಂಐ ನ್ಯೂಯಾರ್ಕ್’ ತಂಡವನ್ನು ತನ್ನದಾಗಿಸಿಕೊಂಡಿದೆ. ನ್ಯೂಯಾರ್ಕ್ ಮೂಲದ ಈ ತಂಡದಿಂದ ಎಮ್ಐ ಕ್ರಿಕೆಟ್ನ ವ್ಯಾಪ್ತಿ ವಿಸ್ತಾರಗೊಂಡಿದೆ. ಇದರೊಂದಿಗೆ ಮುಂಬಯಿ ಇಂಡಿಯನ್ಸ್ ತಂಡ ಈಗ ಮೂರು ಖಂಡಗಳು, ನಾಲ್ಕು ದೇಶಗಳು, ಐದು ಕ್ರಿಕೆಟ್ ಲೀಗ್ಗಳಲ್ಲಿ (Cricket League) ಕ್ರಿಕೆಟ್ ತಂಡಗಳ ಒಡೆತನವನ್ನು ಹೊಂದಿದೆ. ‘ಹೊಸ ತಂಡವು ಚೊಚ್ಚಲ ಆವೃತ್ತಿಯ ಮೇಜರ್ ಲೀಗ್ ಕ್ರಿಕೆಟ್ನಲ್ಲಿ (ಎಂಎಲ್ಸಿ) ಆಡಲಿದೆ.
ಬೆಳೆಯುತ್ತಿರುವ ಎಂಐ ಕುಟುಂಬಕ್ಕೆ ನ್ಯೂಯಾರ್ಕ್ ಫ್ರಾಂಚೈಸಿಯನ್ನು ಸ್ವಾಗತಿಸಲು ನಾನು ಉತ್ಸುಕಳಾಗಿದ್ದೇನೆ. ಅಮೆರಿಕದ ಕ್ರಿಕೆಟ್ ಲೀಗ್ಗೆ ಇದೇ ಮೊದಲ ಬಾರಿಗೆ ಪ್ರವೇಶ ಪಡೆಯುತ್ತಿದ್ದೇವೆ. ಕ್ರಿಕೆಟ್ ಆಟದ ಜಾಗತಿಕ ಬ್ರ್ಯಾಂಡ್ ಆಗಿ ಮುಂಬಯಿ ಇಂಡಿಯನ್ಸ್ ಅನ್ನು ರೂಪಿಸುವ ಭರವಸೆ ನನ್ನದು. ಎಂಐಗೆ ಇದು ಇನ್ನೊಂದು ಹೊಸ ಆರಂಭ. ನಾನು ಮುಂದಿನ ಉತ್ಸಾಹಿ ಪ್ರಯಾಣವನ್ನು ಎದುರು ನೋಡುತ್ತಿದ್ದೇನೆ ಎಂದು ನೀತಾ ಎಂ. ಅಂಬಾನಿ ಅವರು ಹೇಳಿದ್ದಾರೆ.
ರಿಲಯನ್ಸ್ ಕಂಪನಿಯು ಐಪಿಎಲ್ನಲ್ಲಿ ಮುಂಬಯಿ ಇಂಡಿಯನ್ಸ್ ), ಎಂಐ ಕೇಪ್ಟೌನ್ (ಎಸ್ಎ20), ಎಂಐ ಎಮಿರೇಟ್ಸ್ (ಐಎಲ್ಟಿ20)ಮತ್ತು ಮುಂಬಯಿ ಇಂಡಿಯನ್ಸ್ (ಡಬ್ಲ್ಯುಪಿಎಲ್) ತಂಡವನ್ನು ಹೊಂದಿದೆ. ‘ಎಂಐ ನ್ಯೂಯಾರ್ಕ್’ 5ನೇ ಫ್ರಾಂಚೈಸಿಯಾಗಿದೆ.
‘ಮೇಜರ್ ಲೀಗ್ ಕ್ರಿಕೆಟ್’ ಅಮೆರಿಕದಲ್ಲಿ ಆಡಲಾಗುವ ಮೊದಲ ವೃತ್ತಿಪರ ಟಿ20 ಕ್ರಿಕೆಟ್ ಚಾಂಪಿಯನ್ಷಿಪ್ ಆಗಿರುತ್ತದೆ. 2023ರ ಬೇಸಗೆ ಋತುವಿನಲ್ಲಿ ಚೊಚ್ಚಲ ಆವೃತ್ತಿಯ ಮೇಜರ್ ಲೀಗ್ ಕ್ರಿಕೆಟ್ ಟೂರ್ನಿಯು ನಡೆಯಲಿದೆ. ಹೆಚ್ಚಿನ ವಿವರಗಳಿಗೆ ಭೇಟಿ ನೀಡಿ: www.majorleaguecricket.com
ವಿಶ್ವದ ಎಲ್ಲೆಡೆ ಸುಮಾರು 50 ದಶಲಕ್ಷ ಡಿಜಿಟಲ್ ಅಭಿಮಾನಿಗಳನ್ನು ಹೊಂದಿರುವ ಮುಂಬೈ ಇಂಡಿಯನ್ಸ್, ಅತ್ಯಂತ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಜಾಗತಿಕ ಕ್ರಿಕೆಟ್ ಬ್ರ್ಯಾಂಡ್ ಎನಿಸಿದೆ. ವಿಶ್ವ ಪ್ರಮುಖ ಫ್ರಾಂಚೈಸಿ ಲೀಗ್ಗಳಲ್ಲಿ ವರ್ಷದಲ್ಲಿ ಸರಿಸುಮಾರು 6 ತಿಂಗಳ ಕಾಲ ಕ್ರಿಕೆಟ್ ಆಡುವ ಎಂಐ ತಂಡಗಳನ್ನು ಅಭಿಮಾನಿಗಳು ಸತತವಾಗಿ ಬೆಂಬಲಿಸುತ್ತಿದ್ದಾರೆ. 2009ರಿಂದ ಮುಂಬಯಿ ಇಂಡಿಯನ್ಸ್ ಶೇ. 99ರಷ್ಟು ಬ್ರ್ಯಾಂಡ್ ಮೌಲ್ಯದ (ಬ್ರ್ಯಾಂಡ್ ಫೈನಾನ್ಸ್) ಪ್ರಗತಿ ಕಂಡಿದೆ.
ಇದನ್ನೂ ಓದಿ : IPL 2023 : ಮುಂಬಯಿ ಇಂಡಿಯನ್ಸ್ ತಂಡಕ್ಕೆ ಮತ್ತೊಂದು ಆಘಾತ, ವೇಗದ ಬೌಲರ್ ಅಲಭ್ಯ
ಐಪಿಎಲ್ನಲ್ಲಿ ಮುಂಬಯ ಇಂಡಿಯನ್ಸ್ ತಂಡ ಅತಿ ಹೆಚ್ಚು ಯಶಸ್ಸು ಗಳಿಸಿದ ತಂಡವಾಗಿದೆ. ರೋಹಿತ್ ಶರ್ಮ ನೇತೃತ್ವದಲ್ಲಿ ಮುಂಬಯಿ ಇಂಡಿಯನ್ಸ್ ಬಳಗ ಐದು ಟ್ರೋಫಿಗಳನ್ನು ಗೆದ್ದು ದಾಖಲೆ ನಿರ್ಮಿಸಿದೆ. ಪ್ರಸ್ತುತ ನಡೆಯುತ್ತಿರುವ ಮಹಿಳೆಯ ಪ್ರೀಮಿಯರ್ ಲೀಗ್ನಲ್ಲೂ ಮುಂಬಯಿ ಇಂಡಿಯನ್ಸ್ ತಂಡ ಹರ್ಮನ್ಪ್ರೀತ್ ಕೌರ್ ನೇತೃತ್ವದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ.