ಧರ್ಮಶಾಲಾ: ಚೋಕರ್ಸ್ ಹಣೆಪಟ್ಟಿಯನ್ನು ಕಳೆದುಕೊಳ್ಳವ ಶಪಥ ಮಾಡಿರುವ ದಕ್ಷಿಣ ಆಫ್ರಿಕಾ(SA vs NED) ತಂಡ ಈ ಬಾರಿಯ ವಿಶ್ವಕಪ್ ಟೂರ್ನಿಯಲ್ಲಿ ಉತ್ಕೃಷ್ಟ ಮಟ್ಟದ ಆಟ ಪ್ರದರ್ಶಿಸುತ್ತಿದೆ. ಆಡಿದ ಎರಡು ಪಂದ್ಯಗಳಲ್ಲಿಯೂ ಮುನ್ನೂರರ ಗಡಿ ದಾಟಿ ಗೆಲುವು ಸಾಧಿಸಿದೆ. ಇದೀಗ ಮೂರನೇ ಪಂದ್ಯಕ್ಕೆ ಸಜ್ಜಾಗಿದೆ. ಮಂಗಳವಾರ ನೆದರ್ಲೆಂಡ್ಸ್ ವಿರುದ್ಧ ಆಡಲಿದೆ.
ದಕ್ಷಿಣ ಆಫ್ರಿಕಾ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡೂ ವಿಭಾಗದಲ್ಲಿಯೂ ಅತ್ಯಂತ ಸಮರ್ಥವಾಗಿದೆ. ಬ್ಯಾಟಿಂಗ್ನಲ್ಲಿ ಕ್ವಿಂಟನ್ ಡಿ ಕಾಕ್, ಹೆನ್ರಿಕ್ ಕ್ಲಾಸೆನ್, ಟೆಂಬ ಬವುಮಾ, ರಸ್ಸಿ ವಾನ್ಡರ್ ಡುಸ್ಸೆನ್, ಐಡೆನ್ ಮಾರ್ಕ್ರಮ್, ಡೇವಿಡ್ ಮಿಲ್ಲರ್ ಇವರೆಲ್ಲ ಸಿಡಿದು ನಿಂತರೆ ದೊಡ್ಡ ಮೊತ್ತಕೇನು ಕೊರತೆಯಾಗದು. ಬೌಲಿಂಗ್ ಕೂಡ ಘಾತವಾಗಿದೆ. ಕಗಿಸೊ ರಬಾಡ, ಲುಂಗಿ ಎನ್ಗಿಡಿ, ಸ್ಪಿನ್ನಲ್ಲಿ ಕೇಶವ್ ಮಹಾರಾಜ್, ತಬ್ರೇಜ್ ಮೋಡಿ ಮಾಡಬಲ್ಲರು. ಅದರಲ್ಲೂ ಡಿ ಕಾಕ್ ಅವರು ಸತತ ಎರಡು ಶತಕ ಬಾರಿಸಿ ಮಿಂಚಿದ್ದಾರೆ. ಈ ಪಂದ್ಯದಲ್ಲಿಯೂ ಶತಕ ಬಾರಿಸುವ ಇರಾದೆಯಲ್ಲಿದ್ದಾರೆ. ಇಂತಹ ಘಟಾನುಘಟಿ ಆಟಗಾರನ್ನು ಹಿಡಿದು ನಿಲ್ಲಿಸಿ ನೆದರ್ಲೆಂಡ್ಸ್ ಗೆದ್ದರೆ ಇವರ ಸಾಹಸವನ್ನು ಮೆಚ್ಚಲೇ ಬೇಕು. ಕ್ರಿಕೆಟ್ನಲ್ಲಿ ಏನೂ ಸಂಭವಿಸಬಹುದು ಎನ್ನುವುದಕ್ಕೆ ಭಾನುವಾರದ ಆಫ್ಘಾನ್ ಮತ್ತು ಇಂಗ್ಲೆಂಡ್ ವಿರುದ್ಧದ ಪಂದ್ಯವೇ ಸಾಕ್ಷಿ.
ನೆದರ್ಲೆಂಡ್ಸ್ ತಂಡ ಸೋಲು ಕಂಡಿದ್ದರೂ ಕಳಪೆ ಪ್ರದರ್ಶನವನ್ನು ಮಾತ್ರ ತೋರಿಲ್ಲ. ಬಲಿಷ್ಠ ತಂಡಕ್ಕೂ ಒಂದು ಹಂತದಲ್ಲಿ ಸೋಲಿನ ಭಯ ಹುಟ್ಟಿಸಿತ್ತು. ನಿಂತು ಆಡುವ 2 ಆಟಗಾರರು ಈ ತಂಡದಲ್ಲಿದ್ದರೆ ಗೆಲುವು ಖಚಿತ. ಎಲ್ಲ ಆಟಗಾರರು ಬಿರುಸಿನ ಬ್ಯಾಟಿಂಗ್ಗೆ ಹೆಚ್ಚು ಒತ್ತು ನೀಡುವ ಕಾರಣ ಒಂದು ಹಂತದಲ್ಲಿ ರನ್ ಹೊಳೆಯೇ ಹರಿದು ಬಂದರೂ ಆ ಬಳಿಕ ನಾಟಕೀಯ ಕುಸಿತ ಕಾಣುತ್ತಿದೆ. ಬಾಸ್ ಡಿ ಲೀಡೆ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ತಂಡಕ್ಕೆ ನೆರವಾಗಬಲ್ಲರು.
ಪಿಚ್ ರಿಪೋರ್ಟ್
ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂನ ಪಿಚ್ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡಕ್ಕೂ ಸಮಾನವಾದ ಅವಾಶ ಕಲ್ಪಿಸುತ್ತದೆ. ರಾತ್ರಿಯ ವೇಳೆ ಇಲ್ಲಿ ಇಬ್ಬನಿ ಸಮಸ್ಯೆ ಇರುವುದರಿಂದ ಚೇಸಿಂಗ್ ನಡೆಸುವ ತಂಡಕ್ಕೆ ಹೆಚ್ಚು ಸಹಾಯಕಾರಿ. ಬೌಲರ್ಗೆ ನಿರ್ದಿಷ್ಟ ಗುರಿಯೆಡೆಗೆ ಬೌಲಿಂಗ್ ನಡೆಸಲು ಹಿಡಿತ ಸಾಧಿಸುವುದಿಲ್ಲ. ಇಬ್ಬನಿಯಿಂದ ಚೆಂಡು ಕೈಯಿಂದ ಜಾರುತ್ತದೆ. ಹೀಗಾಗಿ ಟಾಸ್ ಗೆದ್ದ ತಂಡ ಮೊದಲು ಬೌಲಿಂಗ್ ಆಯ್ಕೆ ಮಾಡುವ ಸಾಧ್ಯತೆ ಇದೆ.
ಇದನ್ನೂ ಓದಿ ಒಲಿಂಪಿಕ್ಸ್‌ಗೂ ಕ್ರಿಕೆಟ್ ಎಂಟ್ರಿ; ಅಧಿಕೃತ ಪ್ರಕಟಣೆ ಹೊರಡಿಸಿದ ಒಲಿಂಪಿಕ್‌ ಸಮಿತಿ
ಮೈದಾನದಲ್ಲಿ ಎಚ್ಚರಿಕೆ ಅಗತ್ಯ
ಔಟ್ ಫೀಲ್ಡ್ ನಲ್ಲಿ ಹೆಚ್ಚು ಮರಳು ಇರುವ ಕಾರಣ ಆಟಗಾರರಿಗೆ ಗಾಯದ ಅಪಾಯವಿದೆ ಎಂದು ಈಗಾಗಲೇ ಇಲ್ಲಿ ಆಡಿರುವ ಇಂಗ್ಲೆಂಡ್ ಮತ್ತು ಅಫಘಾನಿಸ್ತಾನ ತಂಡದ ಆಟಗಾರರು ಮತ್ತು ಕೋಚ್ಗಳು ಬಹಿರಂಗವಾಗಿಯೇ ಹೇಳಿದ್ದರು. ಅಲ್ಲದೆ ಇಲ್ಲಿ ಪಂದ್ಯ ಆಡುವ ಇತರ ತಂಡಗಳಿಗೂ ಎಚ್ಚರಿಕೆಯಿಂದ ಆಡುವಂತೆ ಸಲಹೆಯನ್ನು ನೀಡಿದ್ದರು. ಹೀಗಾಗಿ ಆಟಗಾರರು ಫೀಲ್ಡಿಂಗ್ ನಡೆಸುವಾಗ ಎಚ್ಚರಿಕೆಯಿಂದ ಆಡಬೇಕಾದ ಅಗತ್ಯವಿದೆ.
ವಿಶ್ವಕಪ್ ಆರಂಭಕ್ಕೂ ಮುನ್ನ ಪಂದ್ಯ ನಡೆಯುವ ಪ್ರತಿ ಮೈದಾನದ ನವೀಕರಣಕ್ಕೆ ಬಿಸಿಸಿಐ 50 ಕೋಟಿ ರೂ. ನೀಡಿತ್ತು. ಆದಾಗ್ಯೂ, ಧರ್ಮಶಾಲಾ ಮೇಲ್ಮೈಯ ನೋಟದಿಂದ ಯಾವುದೇ ಕೆಲಸ ನಡೆದಿಲ್ಲ ಎಂಬುದು ಸಾಬೀತಾಗಿದೆ.
ಸಂಭಾವ್ಯ ತಂಡ
ದಕ್ಷಿಣ ಆಫ್ರಿಕಾ:ಟೆಂಬಾ ಬವುಮಾ (ನಾಯಕ), ಕ್ವಿಂಟನ್ ಡಿ ಕಾಕ್ (ವಿಕೆಟ್ ಕೀಪರ್), ರಾಸ್ಸಿ ವಾನ್ ಡೆರ್ ಡುಸೆನ್, ಐಡೆನ್ ಮಾರ್ಕ್ರಮ್, ಹೆನ್ರಿಕ್ ಕ್ಲಾಸೆನ್, ಡೇವಿಡ್ ಮಿಲ್ಲರ್, ಮಾರ್ಕೊ ಜಾನ್ಸೆನ್, ಕೇಶವ್ ಮಹಾರಾಜ್, ಕಗಿಸೊ ರಬಾಡಾ, ಲುಂಗಿ ಎನ್ಗಿಡಿ, ತಬ್ರೈಜ್ ಶಮ್ಸಿ.
ನೆದರ್ಲೆಂಡ್ಸ್: ವಿಕ್ರಮಜಿತ್ ಸಿಂಗ್, ಮ್ಯಾಕ್ಸ್ ಓ ಡೌಡ್, ಕಾಲಿನ್ ಅಕರ್ಮನ್, ಸ್ಕಾಟ್ ಎಡ್ವರ್ಡ್ಸ್, ಬಾಸ್ ಡಿ ಲೀಡೆ, ತೇಜಾ ನಿಡಮನೂರು, ಸಾಕಿಬ್ ಜುಲ್ಫಿಕರ್, ಲೋಗನ್ ವ್ಯಾನ್ ಬೀಕ್, ರೋಲೋಫ್ ವ್ಯಾನ್ ಡೆರ್ ಮೆರ್ವೆ, ಆರ್ಯನ್ ದತ್, ಪಾಲ್ ವ್ಯಾನ್ ಮೀಕೆರೆನ್.