ಬೆಂಗಳೂರು: ಶ್ರೀ ಕಂಠೀರವ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಪ್ರೊ ಕಬಡ್ಡಿ ಲೀಗ್‌ನ ದ್ವಿತೀಯ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್‌ ತಂಡ ತೆಲುಗು ಟೈಟನ್ಸ್‌ ವಿರುದ್ಧ 43-24 ಅಂತರದಲ್ಲಿ ಗೆದ್ದು ಸಂಭ್ರಮಿಸಿತು. ಹರಿಯಾಣ ಸ್ಟೀಲರ್ಸ್‌ ಪರ ಮೀತು ಶರ್ಮಾ(13) ಸೂಪರ್‌ ಟೆನ್‌ ರೇಡಿಂಗ್ ಸಾಧನೆ ತಂಡದ ಜಯದಲ್ಲಿ ಪ್ರಮುಖ ಪಾತ್ರವಹಿಸಿತು.
ಸ್ಟೀಲರ್ಸ್‌ ಪಡೆಯಲ್ಲಿ ಪ್ರತಿಯೊಬ್ಬ ಆಟಗಾರರೂ ಅಂಕ ಗಳಿಸಿದ್ದು ವಿಶೇಷವಾಗಿತ್ತು. ತೆಲುಗು ಟೈಟನ್‌ ಪರ ಆದರ್ಶ್ ಟಿ ಹಾಗೂ ವಿಜಯ ಕುಮಾರ್‌ ಟ್ಯಾಕಲ್‌ನಲ್ಲಿ ತಲಾ 4 ಅಂಕಗಳನ್ನು ಗಳಿಸಿದರು ಉಳಿದ ಆಟಗಾರರಿಂದ ಸಂಘಟಿತ ಪ್ರದರ್ಶನ ಕಂಡು ಬಾರದ ಕಾರಣ ತಂಡ ಸೋಲಿನ ಸುಳಿಗೆ ಸಿಲುಕಿತು.
ಪ್ರಥಮಾರ್ಧದಲ್ಲಿ ಹರಿಯಾಣ ಸ್ಟೀಲರ್ಸ್‌ 24-11 ಅಂತರದಲ್ಲಿ ಬೃಹತ್‌ ಮುನ್ನಡೆ ಕಾಯ್ದುಕೊಂಡಿತು. ಸ್ಟೀಲರ್ಸ್‌ ಆಲ್ರೌಂಡ್‌ ಪ್ರದರ್ಶನ ತೋರಿ ಎರಡು ಬಾರಿ ತೆಲುಗು ಟೈಟನ್ಸ್‌ ಪಡೆಯನ್ನು ಆಲೌಟ್‌ ಮಾಡಿತು. ರೇಡಿಂಗ್‌ನಲ್ಲಿ 12-7 ಅಂತರದಲ್ಲಿ ಮುನ್ನಡೆ ಕಂಡಿತು, ಟ್ಯಾಕಲ್‌ನಲ್ಲಿ 7-4 ರಲ್ಲಿ ಮೇಲುಗೈ ಸಾಧಿಸಿತು. 36 ರೇಡ್‌ಗಳಲ್ಲಿ 14 ಯಶಸ್ವಿ ರೇಡ್‌ ಸ್ಟೀಲರ್ಸ್‌ ಪಾಲಾಯಿತು.
ಇದನ್ನೂ ಓದಿ | Pro Kabaddi | ಭರತ್‌ ಭರ್ಜರಿ ಆಟ; ಯು ಮುಂಬಾಗೆ ಸೋಲುಣಿಸಿದ ಬೆಂಗಳೂರು ಬುಲ್ಸ್‌