Site icon Vistara News

Pro Kabaddi: ತಲೈವಾಸ್​ ಮುಂದೆ ತಲೆಬಾಗಿದ ಟೈಟಾನ್ಸ್

Abhilash B C
Tamil Thalaivas

ಬೆಂಗಳೂರು: ನರೇಂದರ್(10) ಅವರ ರೇಡಿಂಗ್​ ಮತ್ತು ಸಾಹಿಲ್ ಗುಲಿಯಾ(7) ಡಿಫೆಂಡಿಂಗ್​ ಆಟಕ್ಕೆ ತೆಡೆಯೊಡ್ಡುವಲ್ಲಿ ವಿಫಲವಾದ ತೆಲುಗು ಟೈಟಾನ್ಸ್​(Telugu Titans) ತಂಡ ತಮಿಳ್​ ತಲೈವಾಸ್​(Tamil Thalaivas) ವಿರುದ್ಧ 38-36 ಅಂಕಗಳಿಂದ ಸೋಲು ಕಂಡಿದೆ. ಈ ಮೂಲಕ ಗೆಲುವಿನ ಖಾತೆ ತರೆಯುವ ಇರಾದೆಯೊಂದಿಗೆ ಆಡಿಲಿಳಿದ ತೆಲುಗು ತಂಡಕ್ಕೆ ಮತ್ತೆ ನಿರಾಸೆಯಾಗಿದೆ.

ಸ್ಟಾರ್​ ಆಟಗಾರ ಪವನ್​ ಸೆಹ್ರಾವತ್​ ಅವರು ತೆಲುಗು ಟೈಟಾನ್ಸ್ ತಂಡದಲ್ಲಿದ್ದರೂ ಅವರು ಈ ಹಿಂದೆ ಬುಲ್ಸ್​ ತಂಡದಲ್ಲಿ ಮಾಡುತ್ತಿದ್ದ ರೇಡಿಂಗ್​ ಕಮಾಲ್​ ತೋರಿಸುವಲ್ಲಿ ವಿಫಲರಾಗುತ್ತಿದ್ದಾರೆ. ಈ ಪಂದ್ಯದಲ್ಲಿ 17 ರೇಡ್​ ಮಾಡಿ ಗಳಿಸಿದ್ದು ಕೇವಲ 7 ಅಂಕ ಉಳಿದ 10 ರೇಡ್​ಗಳು ಅಂಕ ರಹಿತವಾಗಿತ್ತು.

ಇಲ್ಲಿನ ಕಂಠೀರವ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ, ಆರಂಭದಿಂದಲೇ ಹಿಡಿತ ಸಾಧಿಸಿದ ತಲೈವಾಸ್ ಮೊದಲಾರ್ಧದ ಆಟ ಮುಕ್ತಾಯಕ್ಕೆ 20-17 ಅಂಕದ ಮುನ್ನಡೆ ಸಾಧಿಸಿತು. ಇದೇ ಲಯವನ್ನು ಪಂದ್ಯದುದ್ದಕ್ಕೂ ತೋರ್ಪಡಿಸಿ ಮೇಲುಗೈ ಸಾಧಿಸಿತು. ತಂಡದ ಎಲ್ಲ ಪ್ರಮುಖ ಆಟಗಾರರು ಕೂಡ ಉತ್ತಮ ಪ್ರದರ್ಶನ ತೋರುವ ಮೂಲಕ ಗೆಲುವು ತಮ್ಮದಾಗಿಸಿಕೊಂಡರು. ಅಂತಿಮ 4 ನಿಮಿಷದ ಆಟದಲ್ಲಿ ಅತ್ಯಂತ ಜಿದ್ದಾಜಿದ್ದಿ ಏರ್ಪಟ್ಟರೂ ಕೂಡ ತಲೈವಾಸ್ ಅಂಕದ ಹಿನ್ನಡೆಯಾಗದಂತೆ ಎಚ್ಚರಿಕೆಯ ಆಟವಾಡಿತು.

ಇದನ್ನೂ ಓದಿ Pro Kabaddi: ಬೆಂಗಾಲ್​ ವಾರಿಯರ್ಸ್ ಆರ್ಭಟಕ್ಕೆ ಪಲ್ಟಿಯಾದ ಪಾಟ್ನಾ ಪೈರೆಟ್ಸ್‌

ತಮಿಳ್​ ಪರ ನರೇಂದರ್ ಒಟ್ಟು 16 ಬಾರಿ ಎದುರಾಳಿ ಕೋಟೆಗೆ ನುಗ್ಗಿ 10 ಅಂಕ ಕದಿಯುವಲ್ಲಿ ಯಶಸ್ಸು ಕಂಡರು. ಸಹ ಆಟಗಾರ ಸಾಹಿಲ್ ಗುಲಿಯಾ ಅಭಿಮನ್ಯುವಿಗೆ ರಚಿಸಿದ ಚಕ್ರವ್ಯೂಹದಂತೆ ಕೋಟೆಯನ್ನು ನಿರ್ಮಿಸಿ ಎದುರಾಳಿ ರೇಡರ್​ಗಳನ್ನು ಕಟ್ಟಿ ಹಾಕಿದರು. ಇವರ ಈ ಕೋಟೆಯನ್ನು ಕೆಡವಲು ಟೈಟಾನ್ಸ್​ಗೆ ಸಾಧ್ಯವಾಗಲೇ ಇಲ್ಲ. ಗುಲಿಯಾ 7 ಅಂಕ ಗಳಿಸಿದರು. ಉಳಿದಂತೆ ರೇಡರ್​ ಅಜಿಂಕ್ಯ ಪವಾರ್​, ಜತಿನ್ ಮತ್ತು ನಿತಿನ್​ ಸಿಂಗ್​​ ತಲಾ 4 ಅಂಕ ಕಲೆಹಾಕಿದರು. ತೆಲುಗು ಪರ ಪವನ್​ ಸೆಹ್ರಾವತ್​(7), ಮಿಲಾದ್(4), ಅಜಿತ್​(4), ರಾಬಿನ್ ಚೌಧರಿ(7), ಸಂಜೀವ್​(6) ಅಂಕ ಗಳಿಸಿದರು.

Exit mobile version