ನವ ದೆಹಲಿ: ಸಿಂಗಾಪುರ ಓಪನ್ ಬ್ಯಾಡ್ಮಿಂಟನ್ ಓಪನ್ ಚಾಂಪಿಯನ್ಷಿಪ್ ಗೆದ್ದಿರುವ ತಮ್ಮನ್ನು ಅಭಿನಂದಿಸಿದ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರಿಗೆ ಭಾರತದ ಬ್ಯಾಡ್ಮಿಂಟನ್ ತಾರೆ P V Sindhu ಧನ್ಯವಾದ ತಿಳಿಸಿದ್ದಾರೆ.
ಪಿ ವಿ ಸಿಂಧೂ ಭಾನುವಾರ ಮಕ್ತಾಯಗೊಂಡ ಸಿಂಗಾಪುರ ಓಪನ್ ಸೂಪರ್ ಸೀರಿಸ್ 500 ಟೂರ್ನಿಯಲ್ಲಿ ಚಾಂಪಿಯನ್ ಆಗಿದ್ದರು. ಚೀನಾದ ವಾಂಗ್‌ ಜಿ ಯಿ ವಿರುದ್ಧ 21-9, 11-21, 21-15 ಗೇಮ್‌ಗಳಿಂದ ಗೆಲುವು ಸಾಧಿಸಿ ಪ್ರಶಸ್ತಿಗೆ ಮುತ್ತಿಟ್ಟಿದ್ದರು. ಅದು ಅವರ ಪಾಲಿಗೆ ಪ್ರಸಕ್ತ ವರ್ಷದಲ್ಲಿ ಲಭಿಸಿದ ಮೂರನೇ ಪ್ರಶಸ್ತಿ ಹಾಗೂ ಚೊಚ್ಚಲ ಸಿಂಗಾಪರ ಓಪನ್ ಕಿರೀಟ.
ಪ್ರಧಾನಿ ಟ್ವೀಟ್ನಲ್ಲಿ ಏನಿದೆ?
ಸಿಂಧೂ ಅವರ ಸಾಧನೆಗೆ ಪ್ರಧಾನಿ ನರೇಂದ್ರ ಮೋದಿ ಅಭಿನಂದನೆ ಸಲ್ಲಿಸಿ ಟ್ವೀಟ್ ಮಾಡಿದ್ದಾರೆ. ಸಿಂಗಾಪುರ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಚಾಂಪಿಯನ್ ಆದ ಪಿ. ವಿ ಸಿಂಧೂಗೆ ಅಭಿನಂದನೆಗಳು. ಅವರು ತಮ್ಮ ಉತ್ಕೃಷ್ಟ ಕ್ರೀಡಾ ಪ್ರತಿಭೆಯನ್ನು ಪ್ರದರ್ಶಿಸುವ ಮೂಲಕ ಅದರಲ್ಲಿ ಯಶಸ್ಸು ಸಾಧಿಸಿದ್ದಾರೆ. ಇದು ದೇಶಕ್ಕೆ ಹೆಮ್ಮೆಯ ಸಂಗತಿಯಾಗಿದ್ದು, ಭವಿಷ್ಯದ ಕ್ರೀಡಾಪಟುಗಳಿಗೆ ಪ್ರೇರಣಾದಾಯಕವಾಗಿದೆ, ಎಂದು ಬರೆದುಕೊಂಡಿದ್ದಾರೆ.
ಅದಕ್ಕೆ ಪ್ರತಿಕ್ರಿಯೆ ನೀಡಿರುವ ಸಿಂಧೂ, ನಿಮ್ಮ ಅಭಿಮಾನದ ಮಾತುಗಳಿಗೆ ನಾನು ಚಿರಋಣಿ ಎಂದು ಹೇಳಿದ್ದಾರೆ.