ನಾಗ್ಪುರ: ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡದ ಸ್ಪಿನ್ ಬೌಲರ್ ರವೀಂದ್ರ ಜಡೇಜಾ (Ravindra Jadeja) 47 ರನ್ಗಳಿಗೆ 5 ವಿಕೆಟ್ ಕಬಳಿಸಿದ್ದಾರೆ. ಗಾಯದ ಸಮಸ್ಯೆ ಹಾಗೂ ಶಸ್ತ್ರ ಚಿಕಿತ್ಸೆ ಮುಗಿಸಿಕೊಂಡು ತಂಡಕ್ಕೆ ವಾಪಸಾಗಿರುವ ರವೀಂದ್ರ ಜಡೇಜಾ ಮೊದಲ ಹಣಾಹಣಿಯಲ್ಲೇ ಐದು ವಿಕೆಟ್ಗಳ ಸಾಧನೆ ಮಾಡಿದ್ದಾರೆ. ನಾಗ್ಪುರ ಪಿಚ್ ಹೆಚ್ಚು ತಿರುವು ಪಡೆದುಕೊಂಡಿದ್ದೇ ಜಡೇಜಾಗೆ ಹೆಚ್ಚು ವಿಕೆಟ್ಗಳು ಸಿಗಲು ಕಾರಣ ಎಂಬುದಾಗಿ ವಿಶ್ಲೇಷಣೆ ಮಾಡಲಾಗುತ್ತಿದೆ. ಆದರೆ, ಪಿಚ್ ಹೆಚ್ಚು ತಿರುವು ಪಡೆಯುತ್ತಿತ್ತು ಎಂಬ ವಾದ ಮತ್ತು ಆಸ್ಟ್ರೇಲಿಯಾ ತಂಡದ ಹಿರಿಯ ಆಟಗಾರರ ಟೀಕೆಗಳಿಗೆ ಜಡೇಜಾ ಕಡ್ಡಿ ಮುರಿದಂತೆ ಉತ್ತರ ಕೊಟ್ಟಿದ್ದಾರೆ. ನೀವೆಲ್ಲ ಅಂದುಕೊಂಡ ರೀತಿಯಲ್ಲಿ ಪಿಚ್ ಹೆಚ್ಚು ತಿರುವು ಪಡೆಯುತ್ತಿರಲಿಲ್ಲ, ನನ್ನ ಬುದ್ಧಿವಂತಿಕೆ ಬಳಸಿ ವಿಕೆಟ್ ಕಬಳಿಸಿದ್ದೇನೆ ಎಂಬುದಾಗಿ ಅವರು ಹೇಳಿದ್ದಾರೆ.
ನಾಗ್ಪುರ ಪಿಚ್ ದೊಡ್ಡ ಮಟ್ಟದ ತಿರುವು ಪಡೆಯುತ್ತಿರಲಿಲ್ಲ. ಲೊ ಬೌನ್ಸರ್ ಬಿಟ್ಟರೆ ಬೇರೆನೂ ಅನುಕೂಲಗಳು ಇರಲಿಲ್ಲ. ಉಳಿದಂತೆ ಸಾಮಾನ್ಯ ಪಿಚ್ನಂತೆ ಇತ್ತು. ಆದರೆ, ನಾನು ಕ್ರೀಸ್ನಲ್ಲಿ ನಾನಾ ತಂತ್ರಗಳನ್ನು ಬಳಸುವ ಮೂಲಕ ಆಸ್ಟ್ರೇಲಿಯಾ ತಂಡದ ವಿಕೆಟ್ಗಳನ್ನು ಉರುಳಿಸಿದೆ ಎಂಬುದಾಗಿ ಪಂದ್ಯ ಮುಗಿದ ಬಳಿಕದ ಮಾಧ್ಯಮ ಗೋಷ್ಠಿಯಲ್ಲಿ ಹೇಳಿದ್ದಾರೆ.
ಇದನ್ನೂ ಓದಿ : Ravindra jadeja : ಮತ್ತೆ ಭಾರತ ತಂಡದ ಜೆರ್ಸಿ ಧರಿಸಲು ಹೆಮ್ಮೆ ಎನಿಸುತ್ತದೆ ಎಂದ ರವೀಂದ್ರ ಜಡೇಜಾ
ಲೋಬೌನ್ಸರ್ ಬೀಳುತ್ತಿರುವುದರಿಂದ ಬ್ಯಾಟರ್ಗಳಿಗೆ ಗೊಂದಲ ಮೂಡಿಸಿದೆ. ಪ್ರತಿಯೊಂದು ಎಸೆತವೂ ಟರ್ನ್ ತೆಗೆದುಕೊಳ್ಳದ ಕಾರಣ ಬ್ಯಾಟರ್ಗಳು ತಪ್ಪು ಮಾಡುವಂತೆ ನೋಡಿಕೊಂಡು ವಿಕೆಟ್ಗಳನ್ನು ಕಬಳಿಸಿದೆ ಎಂದು ಜಡೇಜಾ ಹೇಳಿದ್ದಾರೆ.
ಭಾರತ ತಂಡದ ಸ್ಪಿನ್ನರ್ಗಳಿಗೆ ಅನುಕೂಲವಾಗುವ ಪಿಚ್ಗಳನ್ನು ಸಿದ್ಧಪಡಿಸುವ ಮೂಲಕ ಭಾರತ ತಂಡ ಸರಣಿ ಗೆಲುವಿಗೆ ಯೋಜನೆ ರೂಪಿಸಿಕೊಂಡಿದೆ ಎಂಬುದಾಗಿ ಆಸ್ಟ್ರೇಲಿಯಾದ ಹಿರಿಯ ಆಟಗಾರರು ಆರೋಪಿಸುತ್ತಿದ್ದಾರೆ. ಇದೇ ವಿಚಾರವಾಗಿ ಎರಡೂ ದೇಶಗಳ ಹಿರಿಯ ಆಟಗಾರರ ನಡುವೆ ವಾಕ್ಸಮರ ನಡೆಯುತ್ತಲೇ ಇದೆ.