ಬೆಂಗಳೂರು : ವಿರಾಟ್ ಕೊಹ್ಲಿಗೂ ಡಾನ್ಸ್ಗೂ ಬಿಡದ ನಂಟು. ಅವರು ಪಂದ್ಯದ ನಡುವೆಯೇ ಮೈದಾನದಲ್ಲೇ ಡಾನ್ಸ್ ಮಾಡಿದ ಹಲವು ಸಂದರ್ಭಗಳನ್ನು ಅಭಿಮಾನಿಗಳು ವೀಕ್ಷಿಸಿದ್ದಾರೆ. ಅವರ ಹವ್ಯಾಸ ಅಲ್ಲಿಗೆ ಕೊನೆಯಾಗಿಲ್ಲ. ವಿಶ್ವದ ಸರ್ವಶ್ರೇಷ್ಠ ಬ್ಯಾಟ್ಸ್ಮನ್ಗೆ ರ್ಯಾಪ್ ಸಾಂಗ್ ಕೂಡ ಅಚ್ಚುಮೆಚ್ಚು. ಅವರು ಫಾಲೋ ಮಾಡುವ ಲಿಸ್ಟ್ನಲ್ಲಿ ರ್ಯಾಪರ್ಗಳ ಸಂಖ್ಯೆ ದೊಡ್ಡದಿದೆ. ಇಷ್ಟೆಲ್ಲ ಪೀಠಿಕೆ ಯಾಕೆಂದರೆ, ಮ್ಯೂಸಿಕ್ ಮತ್ತು ಡಾನ್ಸ್ ಅಭಿಮಾನಿಯಾಗಿರುವ ವಿರಾಟ್ ಹೊಸ ರ್ಯಾಪ್ ಆಲ್ಬಮ್ವೊಂದರಲ್ಲಿ (Royal Challengers Bangalore) ಕಾಣಿಸಿಕೊಳ್ಳಲಿದ್ದಾರೆ. ಈ ಮೂಲಕ ಅವರ ಅಭಿಮಾನಿಗಳ ಮನಸ್ಸಿಗೆ ಕಚಗುಳಿ ಇಡಲಿದ್ದಾರೆ.
ರ್ಯಾಪ್ ಆಲ್ಬಮ್ ಮಾಡಿರುವುದು ವಿರಾಟ್ ಕೊಹ್ಲಿ ಪ್ರತಿನಿಧಿಸುವ ಐಪಿಎಲ್ನ ಫ್ರಾಂಚೈಸಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು. ಮುಂದಿನ ಋತುವಿನ ಐಪಿಎಲ್ಗೆ ಮೊದಲು ಆಲ್ಬಮ್ ಬಿಡುಗಡೆ ಆಗಲಿದೆ ಎಂದು ಹೇಳಲಾಗುತ್ತಿದೆ. ಹಾಡಿಗೆ ನಯಾ ಶೇರ್ ಎಂಬ ಹೆಸರಿಡಲಾಗಿದೆ. ಅದರಲ್ಲಿ ವಿರಾಟ್ ಕೊಹ್ಲಿ ಬಣ್ಣ, ಬಣ್ಣದ ಪೋಷಾಕಿನೊಂದಿಗೆ ಮಿಂಚಲಿದ್ದಾರೆ ಎಂಬ ಸುಳಿವು ಸಿಕ್ಕಿದೆ. ಆಲ್ಬಮ್ ನ ಟೀಸರ್ ಬಿಡುಗಡೆಯಾಗಿದ್ದು, ಕೊಹ್ಲಿಯ ಲುಕ್ಗೆ ಅಭಿಮಾನಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ರಾಯಲ್ಚಾಲೆಂಜ್ಚೂಸ್ಬೋಲ್ಡ್ ಎಂಬ ಇನ್ಸ್ಟಾಗ್ರಾಮ್ ಹ್ಯಾಂಡಲ್ ಮೂಲಕ ಟೀಸರ್ ವೀಕ್ಷಿಸಬಹುದು. 9 ಗಂಟೆಯ ಹಿಂದೆ ಬಿಡುಗಡೆಯಾದ ಟೀಸರ್ ಈಗ ಸಾವಿರಾರು ವೀಕ್ಷಣೆ ಕಂಡಿದೆ.
ತಮಿಳಿನಲ್ಲಿ ಇತ್ತೀಚೆಗೆ ಬಿಡುಗಡೆಯಾದ ದಳಪತಿ ವಿಜಯ್ ನಟಿಸಿರುವ ಬೀಸ್ಟ್ ಸಿನಿಮಾದ ಹಾಡನ್ನು ಹಾಡಿರುವ ಜೊನಿತಾ ಗಾಂಧಿ ಈ ಆಲ್ಬಮ್ನಲ್ಲಿ ಹಾಡಿದ್ದಾರೆ. ಜತೆಗೆ ರ್ಯಾಪರ್ ಡಿವೈನ್ ಕೂಡ ಇದ್ದಾರೆ. ಒಟ್ಟಿನಲ್ಲಿ ಯುವಕರು ಹುಚ್ಚೆದ್ದು ಕುಣಿಯುವಂಥ ಹಾಡು ಸಿದ್ಧವಾಗಿದೆ. ವಿರಾಟ್ ಕೊಹ್ಲಿಯ ಡಾನ್ಸ್ ಕೂಡ ಇದರ ಭಾಗವಾಗಿರುವ ಕಾರಣ ಆರ್ಸಿಬಿ ಈ ಸಲ ಇನ್ನಷ್ಟು ಅಭಿಮಾನಿಗಳನ್ನು ಸೆಳೆಯುವುದರಲ್ಲಿ ಯಾವುದೇ ಅನುಮಾನ ಇಲ್ಲ.
ಇದನ್ನೂ ಓದಿ | Manoj Bhandage | ಆರ್ಸಿಬಿ ತಂಡಕ್ಕೆ ಮನೋಜ್ ಭಾಂಡಗೆ ಆಯ್ಕೆ; ಸಿಂಧನೂರಿನಲ್ಲಿ ಸಂಭ್ರಮಾಚರಣೆ