ಜೊಹಾನ್ಸ್ಬರ್ಗ್: ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ತಂಡ 8 ವಿಕೆಟ್ಗಳ ಗೆಲುವು ಸಾಧಿಸಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿದೆ. ಈ ಪಂದ್ಯದಲ್ಲಿ ಪದಾರ್ಪಣೆ ಮಾಡಿದ ಸಾಯಿ ಸುದರ್ಶನ್(Sai Sudharsan) ಅವರು ಅರ್ಧಶತಕ ಬಾರಿಸುವ ಮೂಲಕ ದಾಖಲೆಯೊಂದನ್ನು ತಮ್ಮ ಹೆಸರಿಗೆ ಬರೆದಿದ್ದಾರೆ.
ಜೋಹಾನ್ಸ್ಬರ್ಗ್ನ ವಾಂಡರರ್ಸ್ ಸ್ಟೇಡಿಯಂನಲ್ಲಿ ಭಾನುವಾರ ನಡೆದ ಈ ಪಂದ್ಯದಲ್ಲಿ ಚೇಸಿಂಗ್ ವೇಳೆ ತಾಳ್ಮೆಯುತ ಬ್ಯಾಟಿಂಗ್ ನಡೆಸಿದ ಸಾಯಿ ಸುದರ್ಶನ್ 43 ಎಸೆತ ಎದುರಿಸಿ 9 ಬೌಂಡರಿ ನೆರವಿನಿಂದ ಅಜೇಯ 55 ರನ್ ಬಾರಿಸಿದರು. ಅರ್ಧಶತಕ ಪೂರ್ತಿಗೊಳ್ಳುತ್ತಿದ್ದಂತೆ ಭಾರತ ಪರ ಚೊಚ್ಚಲ ಪಂದ್ಯದಲ್ಲೇ ಆರಂಭಿಕ ಆಟಗಾರನಾಗಿ 50 ಪ್ಲಸ್ ರನ್ ಬಾರಿಸಿದ 4ನೇ ಆಟಗಾರ ಎನಿಸಿಕೊಂಡರು.
FIFTY FOR SAI SUDHARSAN…!!!!
— Johns. (@CricCrazyJohns) December 17, 2023
India debut, playing in South Africa – Sudharsan has arrived in style with a fifty in International cricket. 🇮🇳 pic.twitter.com/8s9L4w5flm
ಮಾಜಿ ಆಟಗಾರ ರಾಬಿನ್ ಉತ್ತಪ್ಪ ಅವರು ಭಾರತ ಪರ ಚೊಚ್ಚಲ ಏಕದಿನ ಪಂದ್ಯದಲ್ಲೇ ಆರಂಭಿಕನಾಗಿ ಆಡಿ 50 ಪ್ಲಸ್ ರನ್ ಬಾರಿಸಿದ ಮೊದಲ ಆಟಗಾರ ಎನಿಸಿಕೊಂಡಿದ್ದಾರೆ. ಉತ್ತಪ್ಪ ಈ ದಾಖಲೆಯನ್ನು 2006 ರಲ್ಲಿ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ನಿರ್ಮಿಸಿದ್ದರು. ಪಂದ್ಯದಲ್ಲಿ ಅವರು 86 ರನ್ ಬಾರಿಸಿದ್ದರು. ಕೆ.ಎಲ್ ರಾಹುಲ್ ಅವರು ತಮ್ಮ ಚೊಚ್ಚಲ ಏಕದಿನ ಪಂದ್ಯದಲ್ಲೇ ಆರಂಭಿಕನಾಗಿ ಶತಕ ಬಾರಿಸಿದ ದಾಖಲೆ ಹೊಂದಿದ್ದಾರೆ.
ಚೊಚ್ಚಲ ಪಂದ್ಯದಲ್ಲಿ ಆರಂಭಿಕನಾಗಿ 50+ ಬಾರಿಸಿದ ಭಾರತದ ಆಟಗಾರರು
ರಾಬಿನ್ ಉತ್ತಪ್ಪ- 86 ರನ್. ಇಂಗ್ಲೆಂಡ್ ವಿರುದ್ಧ(2006)
ಕೆ.ಎಲ್ ರಾಹುಲ್-100* ರನ್. ಜಿಂಬಾಬ್ವೆ ವಿರುದ್ಧ(2016)
ಫೈಜಿ ಫೈಜಲ್-55* ರನ್. ಜಿಂಬಾಬ್ವೆ ವಿರುದ್ಧ(2016)
ಸಾಯಿ ಸುದರ್ಶನ್-55* ರನ್. ದಕ್ಷಿಣ ಆಫ್ರಿಕಾ ವಿರುದ್ಧ(2023)
ಇದನ್ನೂ ಓದಿ IND vs SA: ಭಾರತಕ್ಕೆ ಗೆಲುವಿನ ಹರ್ಷ ನೀಡಿದ ಅರ್ಶ್ದೀಪ್; 8 ವಿಕೆಟ್ ಜಯ
ಜೀವದಾನ ಪಡೆದು ಅರ್ಧಶತಕ
ಚೇಸಿಂಗ್ ವೇಳೆ ಪದಾರ್ಪಣ ಪಂದ್ಯವಾಡಿದ ಸಾಯಿ ಸುದರ್ಶನ್ ಅವರು ಅರ್ಧಶತಕ ಬಾರಿಸುವ ಮೂಲಕ ತಮ್ಮ ಆಯ್ಕೆಯನ್ನು ಸಮರ್ಥಿಸಿಕೊಂಡರು. ಆರಂಭಿಕನಾಗಿ ಕಣಕ್ಕಿಳಿದ ಅವರು 10 ರನ್ ದಾಟುವ ಮುನ್ನವೇ ಎಲ್ಬಿಡಬ್ಲ್ಯು ಅಪಾಯದಿಂದ ಜೀವದಾನ ಪಡೆದರು. ದಕ್ಷಿಣ ಆಫ್ರಿಕಾ ಡಿಆರ್ಎಸ್ ಮೊರೆ ಹೋಗಿದ್ದರೆ ಅವರು ವಿಕೆಟ್ ಕಳೆದುಕೊಳ್ಳಬೇಕಿತ್ತು. ಟಿವಿ ರೀಪ್ಲೆಯಲ್ಲಿ ನೋಡುವಾಗ ಪಿಚಿಂಗ್ ಇನ್ಸೈಡ್ ಮತ್ತು ಚೆಂಡು ಸರಿಯಾಗಿ ವಿಕೆಟ್ಗೆ ಬಡಿದಿರುವ ಸ್ಪಷ್ಟವಾಗಿತ್ತು. ಆದರೆ ಮಾರ್ಕ್ರಮ್ ಡಿಆರ್ಎಸ್ ಪಡೆಯದ ಕಾರಣ ಸಾಯಿ ಸುದರ್ಶನ್ ಪಾರಾದರು. ಇದೇ ಅವಕಾಶವನ್ನು ಎರಡು ಕೈಗಳಿಂದ ಬಾಚಿದ ಅವರು ಅಜೇಯ ಅರ್ಧಶತಕ ಬಾರಿಸಿ ಮಿಂಚಿದರು. 43 ಎಸೆತ ಎದುರಿಸಿ 9 ಬೌಂಡರಿ ನೆರವಿನಿಂದ 55 ರನ್ ಬಾರಿಸಿದರು. ಇವರ ಜತೆಗಾರ ಶ್ರೇಯಸ್ ಅಯ್ಯರ್ 6 ಬೌಂಡರಿ ಮತ್ತು 1 ಸಿಕ್ಸರ್ ಸಿಡಿಸಿ 52 ರನ್ ಗಳಿಸಿದರು. ಇನ್ನೇನು ಗೆಲುವಿಗೆ ಒಂದೆರಡು ರನ್ ಬೇಕಿದ್ದಾಗ ಅಯ್ಯರ್ ವಿಕೆಟ್ ಕಳೆದುಕೊಂಡರು.