ನಾಗ್ಪುರ: ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧ ಟೆಸ್ಟ್ ಸರಣಿಯ (INDvsAUS) ಮೊದಲ ಪಂದ್ಯದಲ್ಲಿ ಭಾರತ ತಂಡ ಉತ್ತಮ ಪ್ರದರ್ಶನ ನೀಡುತ್ತಿದೆ. ಮೊದಲ ದಿನದ ಆಟದಲ್ಲಿ ಆಸ್ಟ್ರೇಲಿಯಾ ತಂಡದ ಬ್ಯಾಟರ್ಗಳಿಗೆ ಭಾರತದ ಬ್ಯಾಟರ್ಗಳು ಸಂಪೂರ್ಣವಾಗಿ ಕಡಿವಾಣ ಹಾಕಿ 177 ರನ್ಗಳಿಗೆ ಕಡಿವಾಣ ಹಾಕಿದ್ದಾರೆ. ಪ್ರತಿಯಾಗಿ ಬ್ಯಾಟ್ ಮಾಡಿದ ಭಾರತ ರೋಹಿತ್ ಶರ್ಮಾ (56) ಅವರ ಅರ್ಧ ಶತಕದ ನೆರವಿನಿಂದ 1 ವಿಕೆಟ್ ನಷ್ಟಕ್ಕೆ 77 ರನ್ ಬಾರಿಸಿದೆ. ಈ ಮೂಲಕ ಮುನ್ನಡೆಯ ಸೂಚನೆ ನೀಡಿದೆ. ಏತನ್ಮಧ್ಯೆ, ಮೊದಲ ದಿನದಾಟದಲ್ಲಿ ಭಾರತ ತಂಡದ ಬೌಲರ್ಗಳ ಸಾಧನೆಯನ್ನು ಕ್ರಿಕೆಟ್ ಪ್ರೇಮಿಗಳು ಕೊಂಡಾಡಿದ್ದಾರೆ. ಅದರಲ್ಲೊಂದು ಡೇವಿಡ್ ವಾರ್ನರ್ ವಿಕೆಟ್.
ಆರಂಭಿಕ ಬ್ಯಾಟರ್ ಡೇವಿಡ್ ವಾರ್ನರ್ ಅಪಾಯಕಾರಿ ಬ್ಯಾಟರ್. ಅವರು ಕ್ರೀಸ್ನಲ್ಲಿ ಹೆಚ್ಚು ಹೊತ್ತು ನಿಂತರೆ ರನ್ ಹೊಳೆ ಖಾತರಿ. ಆದರೆ, ವೇಗದ ಬೌಲರ್ ಮೊಹಮ್ಮದ್ ಶಮಿ ವಾರ್ನರ್ ಅವರನ್ನು ಪೆವಿಲಿಯನ್ಗೆ ಕಳುಹಿಸುವ ಮೂಲಕ ಭಾರತ ತಂಡ ಮೇಲುಗೈ ಸಾಧಿಸಲು ನೆರವಾದರು. ಅದಕ್ಕಿಂತ ಹೆಚ್ಚಾಗಿ ಮೊಹಮ್ಮದ್ ಶಮಿಯ ಆ ಎಸೆತಕ್ಕೆ ಡೇವಿಡ್ ವಾರ್ನರ್ ಬೌಲ್ಡ್ ಆದ ರೀತಿಯೇ ಕಣ್ಮನ ಸೆಳೆಯಿತು.
ಮೊಹಮ್ಮದ್ ಶಮಿಯ ಎಸೆತ ಸ್ಟಂಪ್ಗೆ ಜೋರಾಗಿ ಬಡಿಯಿತು. ಅದರ ವೇಗಕ್ಕೆ ವಿಕೆಟ್ ಸುಮಾರು ದೂರದ ತನಕ ಎಗರಿ ಬಿತ್ತು. ಇದು ದಿನದ ವಿಕೆಟ್ಗಳ ಪಾಲಿನ ಹೈಲೈಟ್ ಎನಿಸಿಕೊಂಡಿತು. ವೇಗದ ಬೌಲರ್ ಒಬ್ಬ ಜೀವನದಲ್ಲಿ ಇಂಥದ್ದೊಂದು ವಿಕೆಟ್ನ ನಿರೀಕ್ಷೆಯಲ್ಲಿ ಇದ್ದೇ ಇರುತ್ತಾರೆ ಎಂಬುದಾಗಿ ನೆಟ್ಟಿಗರು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ: INDvsAUS : ಐದು ತಿಂಗಳ ಹಿಂದೆ ಗಾಯಾಳು, ಈಗ ಐದು ವಿಕೆಟ್ಗಳ ಸರದಾರ; ಜಡೇಜಾ ಸಾಧನೆಗೆ ಅಭಿಮಾನಿಗಳ ಮೆಚ್ಚುಗೆ
ಭಾರತ ತಂಡದ ಪಾಲಿಗೆ ಇದೇ ಮಾದರಿಯ ವಿಕೆಟ್ ಸ್ಟೀವ್ ಸ್ಮಿತ್ ಅವರದ್ದು. ಜಡೇಜಾ ಅವರ ಎಸೆತ ಸ್ಮಿತ್ ಬ್ಯಾಟ್ ಬೀಸುವ ನಡುವೆಯೇ ಕೆಳಗಿನಿಂದ ನುಗ್ಗಿ ವಿಕೆಟ್ಗೆ ಬಿತ್ತು. ಈ ಮೂಲಕ ಸ್ಟಾರ್ ಬ್ಯಾಟರ್ ವಿಕೆಟ್ ಪತನಗೊಂಡಿತ್ತು.