ನ್ಯೂಯಾರ್ಕ್: ಸೋಮವಾರ ನಡೆದಿದ್ದ ಟಿ20 ವಿಶ್ವಕಪ್(T20 World Cup 2024) ಪಂದ್ಯದಲ್ಲಿ ಎರಡೂ ಪಂದ್ಯಗಳು ಕೂಡ ಅತಿ ಹೆಚ್ಚು ಡಾಟ್ ಬಾಲ್(Most dot balls in t20 world cup) ಕಂಡ ಪಂದ್ಯ ಎಂಬ ನೂತನ ದಾಖಲೆ ಬರೆದಿದೆ. ಮೊದಲ ಪಂದ್ಯವಾದ ನಮೇಬಿಯಾ ಮತ್ತು ಒಮಾನ್ 123 ಡಾಟ್ ಬಾಲ್ ದಾಖಲಾದರೆ, ರಾತ್ರಿ ನಡೆದ ಶ್ರೀಲಂಕಾ ಮತ್ತು ದಕ್ಷಿಣ ಆಫ್ರಿಕಾ(Sri Lanka vs South Africa) ನಡುವಿನ ಪಂದ್ಯದಲ್ಲಿ 127 ಎಸೆತಗಳು ಡಾಟ್ ಆದವು. 2007ರ ಉದ್ಘಾಟನ ಆವೃತ್ತಿಯಲ್ಲಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಪಂದ್ಯದಲ್ಲಿ 123 ಎಸೆತಗಳು ಡಾಟ್ ಆಗಿದ್ದು ಇದುವರೆಗಿನ ದಾಖಲೆಯಾಗಿತ್ತು. ಈಗ ಈ ದಾಖಲೆ ಪತನಗೊಂಡಿದೆ.
ಪ್ರಯಾಸದ ಗೆಲುವು ಸಾಧಿಸಿದ ದಕ್ಷಿಣ ಆಫ್ರಿಕಾ
ನಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ(Nassau County International Cricket Stadium) ಸೋಮವಾರ ರಾತ್ರಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಶ್ರೀಲಂಕಾ ತನ್ನ ಆಯ್ಕೆಯನ್ನು ಸಮರ್ಥಿಸಿಕೊಳ್ಳುವಲ್ಲಿ ಸಂಪೂರ್ಣ ವಿಫಲವಾಯಿತು. ಬ್ಯಾಟಿಂಗ್ ಮರೆತವರಂತೆ ಆಡಿ 19.1 ಓವರ್ಗಳಲ್ಲಿ ಕೇವಲ 77 ರನ್ಗೆ ಸರ್ವಪತನ ಕಂಡಿತು. ಇದು ಟಿ20 ವಿಶ್ವಕಪ್ನಲ್ಲಿ ದಾಖಲಾದ 13ನೇ ಕನಿಷ್ಠ ಮೊತ್ತದ ನಿದರ್ಶನ. ಈ ಸಣ್ಣ ಮೊತ್ತವನ್ನು ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ಕೂಡ ಪರದಾಟ ನಡೆಸಿ 16.2 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 80 ರನ್ ಬಾರಿಸಿ ಪ್ರಯಾಸದ ಗೆಲುವು ತನ್ನದಾಗಿಸಿಕೊಂಡಿತು.
ಇದನ್ನೂ ಒದಿ T20 World Cup 2024: ದೂರದರ್ಶನದಲ್ಲಿಯೂ ಪ್ರಸಾರಗೊಳ್ಳಲಿದೆ ಟಿ20 ವಿಶ್ವಕಪ್ ಪಂದ್ಯಾವಳಿ
ಚೇಸಿಂಗ್ ವೇಳೆ ದಕ್ಷಿಣ ಆಫ್ರಿಕಾ ಕೂಡ ಲಂಕಾ ತಂಡದಂತೇ ಆರಂಭಿಕ ಆಘಾತ ಎದುರಿಸಿತು. 10 ರನ್ಗೆ ರೀಜಾ ಹೆಂಡ್ರಿಕ್ಸ್(4) ರೂಪದಲ್ಲಿ ಮೊದಲ ವಿಕೆಟ್ ಕಳೆದುಕೊಂಡಿತು. ಈ ವಿಕೆಟ್ ಪತನದ ಬಳಿಕ ನಾಯಕ ಐಡೆರ್ನ್ ಮಾರ್ಕ್ರಮ್ ಕೂಡ 12ರನ್ಗೆ ಆಟ ಮುಗಿಸಿದರು. ಟ್ರಿಕ್ಕಿ ಬ್ಯಾಟಿಂಗ್ ಟ್ರ್ಯಾಕ್ನಲ್ಲಿ ಹರಿಣ ಪಡೆಯ ಬ್ಯಾಟರ್ಗಳು ಕೂಡ ಸರಾಗವಾಗಿ ರನ್ ಗಳಿಸಲು ಕಷ್ಟ ಪಟ್ಟರು. ಹೀಗಾಗಿ ಪವರ್ ಪ್ಲೇಯಲ್ಲಿ 27 ರನ್ ಮಾತ್ರ ಒಟ್ಟುಗೂಡಿತು.
ವಿಕೆಟ್ ಕಳೆದುಕೊಳ್ಳವ ಭಯದಲ್ಲಿ ಕೇವಲ ಒಂದೆರಡು ರನ್ಗಳ ಓಟಗಳಿಗೆ ಸೀಮಿತರಾಗಿ ಕೊನೆಗೂ ತಂಡವನ್ನು ಗೆಲುವಿನ ದಡ ಸೇರಿದರು. ಚೇಸಿಂಗ್ ವೇಳೆ ದಾಖಲಾದದ್ದು ಕೇವಲ 3 ಸಿಕ್ಸರ್ ಮತ್ತು 3 ಬೌಂಡರಿ ಮಾತ್ರ. ಅಷ್ಟರ ಮಟ್ಟಿಗೆ ಆಘಾತಕಾರಿಯಾಗಿತ್ತು ಈ ಪಿಚ್. ರಂಭಿಕ ಆಟಗಾರ ಕ್ವಿಂಟನ್ ಡಿ ಕಾಕ್ 10 ಓವರ್ ತನಕ ಬ್ಯಾಟಿಂಗ್ ನಡೆಸಿ ಗಳಿಸಿದ್ದು 20 ರನ್ ಮಾತ್ರ. ಸ್ಫೋಟಕ ಬ್ಯಾಟಿಂಗ್ಗೆ ಹೆಸರುವಾಸಿಯಾದ ಯುವ ಬ್ಯಾಟರ್ ಟ್ರಿಸ್ಟಾನ್ ಸ್ಟಬ್ಸ್ 28 ಎಸೆತ ಎದುರಿಸಿ 13 ರನ್ ಕಲೆ ಹಾಕಿದರು. ಕನಿಷ್ಠ ಒಂದು ಬೌಂಡರಿ ಕೂಡ ಬಾರಿಸಲು ಸ್ಟಬ್ಸ್ಗೆ ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಹೆನ್ರಿಚ್ ಕ್ಲಾಸೆನ್(19*) ಮತ್ತು ಡೇವಿಡ್ ಮಿಲ್ಲರ್(6*) ರನ್ ಗಳಿಸಿ ಅಜೇಯರಾಗಿ ಉಳಿದು ತಂಡದ ಗೆಲುವು ಸಾರಿದರು.