ಮೆಲ್ಬೋರ್ನ್: ಟಿ20 ವಿಶ್ವ ಕಪ್ (T20 World Cup) ಸೂಪರ್ 12 ಸುತ್ತಿನ ಇಂಗ್ಲೆಂಡ್ ಹಾಗೂ ಐರ್ಲೆಂಡ್ (Ireland ವಿರುದ್ಧದ ಬುಧವಾರದ ಪಂದ್ಯ ರೋಚಕ ಪಲಿತಾಂಶದೊಂದಿಗೆ ಅಂತ್ಯಗೊಂಡಿದೆ. ಮಳೆ ಪೀಡಿತ ಈ ಪಂದ್ಯದಲ್ಲಿ ಡಕ್ ವರ್ತ್ ನಿಯಮದಡಿಯಲ್ಲಿ ಐರ್ಲೆಂಡ್ 5 ರನ್ಗಳಿಂದ ಗೆಲುವು ದಾಖಲಿಸಿ ಟೂರ್ನಿಯಲ್ಲಿ ಗೆಲುವಿನ ಖಾತೆ ತೆರೆದಿದೆ.
ಮೆಲ್ಬೋರ್ನ್ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಐರ್ಲೆಂಡ್ 19. 5 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 157 ರನ್ ಗಳಿಸಿತು. ಬಳಿಕ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ ತಂಡ 14.3 ಓವರ್ಗಳಲ್ಲಿ 5 ವಿಕೆಟ್ಗೆ 105 ರನ್ ಗಳಿಸಿ ಗೆಲುವಿನ ಕಡೆ ಮುಖಮಾಡಿತ್ತು. ಈ ವೇಳೆ ಮಳೆ ಪಂದ್ಯಕ್ಕೆ ಅಡ್ಡಿಪಡಿಸಿತು. ನಿರಂತರವಾಗಿ ಮಳೆ ಸುರಿಯಲಾರಂಭಿಸಿದ ಕಾರಣ ಅಂತಿಮವಾಗಿ ಡಕ್ ವರ್ತ್ ಲೂಯಿಸ್ ನಿಯಮದ ಪ್ರಕಾರ ಐರ್ಲೆಂಡ್ ತಂಡವನ್ನು ವಿಜಯಿ ಎಂದು ಘೋಷಿಸಲಾಯಿತು. ಇತ್ತ ಇಂಗ್ಲೆಂಡ್ ತಂಡದ ಗೆಲುವಿಗೆ ಮಳೆ ತಣ್ಣೀರೆರಚಿತು.
ಚೇಸಿಂಗ್ ವೇಳೆ ಇಂಗ್ಲೆಂಡ್ ತಂಡದ ಆರಂಭ ಉತ್ತಮವಾಗಿರಲಿಲ್ಲ. ಜೋಸ್‌ ಬಟ್ಲರ್‌ ತಂಡದ ಖಾತೆ ತೆರೆಯುವ ಮುನ್ನವೇ ವಿಕೆಟ್ ಒಪ್ಪಿಸಿ ಆರಂಭಿಕ ಆಘಾತ ನೀಡಿದರು. ಇದರ ಬೆನ್ನಲೇ ಅಲೆಕ್ಸ್‌ ಹೇಲ್ಸ್‌(7), ಬೆನ್‌ ಸ್ಟೋಕ್ಸ್‌(6)ಕೂಡ ವಿಕೆಟ್ ಒಪ್ಪಿಸಿದರು. ಡೇವಿಡ್ ಮಲಾನ್ 37 ಎಸೆತದಿಂದ 35 ರನ್ ಗಳಿಸಿ ತಕ್ಕ ಮಟ್ಟಿನ ಪ್ರದರ್ಶನ ನೀಡಿದರು. ಆದರೆ ಮೊಯಿನ್ ಅಲಿ 24 ಮತ್ತು ಲಿವಿಂಗ್ಸ್ಟನ್ 1 ರನ್ ಗಳಿಸಿ ತಂಡಕ್ಕೆ ಆಸರೆಯಾದ ವೇಳೆ ಮಳೆ ಸುರಿಯಲಾರಂಭಿಸಿದ ಕಾರಣ ಪಂದ್ಯವನ್ನು ಸ್ಥಗಿತಗೊಳಿಸಲಾಯಿತು.
ಮೊದಲು ಬ್ಯಾಟಿಂಗ್ ನಡೆಸಿದ ಐರ್ಲೆಂಡ್ ತಂಡಕ್ಕೆ ನಾಯಕ ಆಂಡ್ರೆ ಬಾಲ್ಬಿರ್ನಿ ಮತ್ತು ಲಾರ್ಕನ್‌ ಟಕ್ಕರ್ ಜೋಡಿ 82 ರನ್ ನಿರ್ಣಾಯಕ ಜತೆಯಾಟದ ಮೂಲಕ ತಂಡಕ್ಕೆ ಭದ್ರ ಅಡಿಪಾಯ ಹಾಕಿದರು. ಇಂಗ್ಲೆಂಡ್ ಬೌಲಿಂಗ್‌ ದಾಳಿಯನ್ನು ಸಮರ್ಥವಾಗಿ ಎದುರಿಸಿದ ನಾಯಕ ಆಂಡ್ರೆ ಬಾಲ್ಬಿರ್ನಿ 47 ಎಸೆತಗಳಲ್ಲಿ ಎರಡು ಸಿಕ್ಸರ್‌ ಹಾಗೂ 4 ಬೌಂಡರಿಯೊಂದಿಗೆ 62 ರನ್ ಸಿಡಿಸಿದರು. ಟಕ್ಕರ್ 27 ಎಸೆತದಿಂದ 34 ರನ್ ಗಳಿಸಿದರು.
ಸ್ಕೋರ್‌ ವಿವರ
ಐರ್ಲೆಂಡ್: 19. 2 ಓವರ್‌ಗಳಿಗೆ 157-10 (ಆಂಡ್ರೆ ಬಾಲ್ಬಿರ್ನಿ 62, ಲಾರ್ಕನ್‌ ಟಕ್ಕರ್ 34; ಮಾರ್ಕ್‌ ವುಡ್‌ 34ಕ್ಕೆ 3, ಲಿಯಾಮ್‌ ಲಿವಿಂಗ್ಸ್ಟನ್ 17ಕ್ಕೆ 3)
ಇಂಗ್ಲೆಂಡ್: 14.3 ಓವರ್‌ಗಳಿಗೆ 105-5 (ಡೇವಿಡ್ ಮಲಾನ್ 35, ಮೊಯೀನ್‌ ಅಲಿ 25*; ಜೋಶ್‌ ಲಿಟ್ಲ್‌ 16ಕ್ಕೆ 2, ಫಿಯಾನ್‌ ಹ್ಯಾಂಡ್‌ 17ಕ್ಕೆ 1) ಪಂದ್ಯಶ್ರೇಷ್ಠ: ಆಂಡ್ರೆ ಬಾಲ್ಬಿರ್ನಿ
ಇದನ್ನೂ ಓದಿ | T20 World Cup | ಹಾರ್ದಿಕ್ ಪಾಂಡ್ಯಗೆ ಗಾಯ, ಮುಂದಿನ ಪಂದ್ಯಕ್ಕೆ ಅನುಮಾನ?