ಮುಂಬಯಿ: ಮಹಿಳೆಯರ ಟಿ20 ವಿಶ್ವ ಕಪ್ನಲ್ಲಿ (T20 World Cup) ಭಾರತ ತಂಡ ನಿರಾಸೆ ಎದುರಿಸಿದೆ. ಸೆಮಿಫೈನಲ್ ಪಂದ್ಯದಲ್ಲಿ ಆಸ್ಡ್ರೇಲಿಯಾ ವಿರುದ್ದ ಸೋಲುವ ಮೂಲಕ ನಿರ್ಗಮಿಸಿದೆ. ಈ ಸೋಲು ಭಾರತದ ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳಿಗೆ ಬೇಸರವನ್ನುಂಟು ಮಾಡಿದೆ. ಅತ್ತ ಕ್ರಿಕೆಟ್ ತಂಡದ ಆಟಗಾರ್ತಿಯರಿಗೂ ಸೋಲಿನ ಬಿಸಿ ತಟ್ಟಿದೆ. ಹಲವರು ತಂಡದ ಪ್ರದರ್ಶನದ ಬಗ್ಗೆ ಟೀಕೆಗಳನ್ನು ವ್ಯಕ್ತಪಡಿಸಿದ್ದರೆ ಇನ್ನಷ್ಟು ಮಂದಿ ಸಹಾನುಭೂತಿ ವ್ಯಕ್ತಪಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿಯ ಟ್ವೀಟ್ ಮಾಡಿರುವ ನಾಯಕಿ ಹರ್ಮನ್ಪ್ರೀತ್ ಕೌರ್, ಮುಂದಿನ ಬಾರಿ ಗೆದ್ದೇ ಗೆಲ್ಲುತ್ತೇವೆ ಎಂಬ ಭರವಸೆ ವ್ಯಕ್ತಪಡಿಸಿದ್ದಾರೆ.
ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ಆಸ್ಟ್ರೇಲಿಯಾ ತಂಡ 172 ರನ್ ಪೇರಿಸಿತ್ತು. ದೊಡ್ಡ ಮೊತ್ತವನ್ನು ಬೆನ್ನಟ್ಟುವ ಹಾದಿಯಲ್ಲಿ ಭಾರತ ತಂಡ ಎಡವಿತ್ತು. ಅದರಲ್ಲೂ 34 ಎಸೆತಗಳಲ್ಲಿ 52 ರನ್ ಬಾರಿಸಿದ್ದ ನಾಯಕಿ ಹರ್ಮನ್ಪ್ರೀತ್ ಕೌರ್ ರನ್ಔಟ್ ಆಗಿದ್ದೇ ತಂಡದ ಸೋಲಿಗೆ ಕಾರಣ ಎನ್ನಲಾಗುತ್ತಿದೆ. ಅದೇ ರೀತಿ ಭಾರತ ತಂಡ ಮತ್ತೊಂದು ಬಾರಿ ಒತ್ತಡ ಎದುರಿಸಲು ವಿಫಲವಾಯಿತು ಎನ್ನಲಾಗುತ್ತಿದೆ.
ಸೋಲಿನ ಬಳಿಕ ನಾಯಕಿ ಹರ್ಮನ್ಪ್ರೀತ್ ಕೌರ್ ಬೇಸರದಿಂದ ಕಣ್ಣಿರು ಹಾಕಿದ್ದರು. ಮಾಜಿ ನಾಯಕಿ ಅಂಜುಮ್ ಚೋಪ್ರಾ ಹರ್ಮನ್ಪ್ರೀತ್ಗೆ ಸಮಾಧಾನ ಕೂಡ ಹೇಳಿದ್ದರು. ಇದೀಗ ಅವರು ಟ್ವೀಟ್ ಮೂಲಕ ಕ್ರಿಕೆಟ್ ಅಭಿಮಾನಿಗಳಲ್ಲಿ ಹೊಸ ಭರವಸೆ ಮೂಡಿಸಿದ್ದಾರೆ.
ಏನಿದೆ ಹರ್ಮನ್ ಟ್ವೀಟ್?
ನಮ್ಮನ್ನು ಬೆಂಬಲಿಸಿದ ವಿಶ್ವಾದ್ಯಂತದ ಕ್ರಿಕೆಟ್ ಅಭಿಮಾನಿಗಳಿಗೆ ಧನ್ಯವಾದಗಳು. ನಮ್ಮ ಮೇಲೆ ಇಟ್ಟಿರುವ ಭರವಸೆಗೂ ಕೃತಜ್ಱತೆ. ಕ್ರಿಕೆಟ್ ಅಭಿಮಾನಿಯಾಗಿ ನಮ್ಮ ತಂಡದ ಸೋಲು ನಿಮಗೆಷ್ಟು ನಿರಾಸೆ ಮೂಡಿಸಿರಬಹುದು ಎಂಬುದು ನನಗೆ ಗೊತ್ತು. ನಾವು ಹೊಸ ಹುರುಪಿನೊಂದಿಗೆ ಹಿಂದಿರುಗುತ್ತೇವೆ ಹಾಗೂ ಅಲ್ಲಿ ಉತ್ತಮ ಪ್ರದರ್ಶನ ನೀಡುತ್ತೇವೆ ಎಂದು ಹರ್ಮನ್ಪ್ರೀತ್ ಕೌರ್ ಬರೆದುಕೊಂಡಿದ್ದಾರೆ.