ಮುಂಬಯಿ: ಜನಪ್ರಿಯ ಕ್ರೀಡಾ ಉಡುಪು ತಯಾರಕ ಕಂಪನಿಯಾಗಿರುವ ಅಡಿಡಾಸ್ ಸಹಯೋಗದೊಂದಿಗೆ ಬಿಸಿಸಿಐ ಎಲ್ಲಾ ಮೂರು ಮಾದರಿಯ ಕ್ರಿಕೆಟ್ಗೆ ಟೀಮ್ ಇಂಡಿಯಾ ಜೆರ್ಸಿಗಳನ್ನು ಅನಾವರಣಗೊಳಿಸಿದೆ. ಪುರುಷರ ಮತ್ತು ಮಹಿಳಾ ರಾಷ್ಟ್ರೀಯ ತಂಡಗಳ ಕಿಟ್ ಪ್ರಾಯೋಜಕರಾಗಿ ಐದು ವರ್ಷಗಳ ಒಪ್ಪಂದವನ್ನು ಅಡಿಡಾಸ್ ಜತೆ ಬಿಸಿಸಿಐ ಮಾಡಿಕೊಂಡಿದೆ. ಹೀಗಾಗಿ 2028ರವರೆಗೆ ಭಾರತೀಯ ಕ್ರಿಕೆಟ್ ತಂಡದ ಆಟಗಾರರು ಅಡಿಡಾಸ್ ವಿನ್ಯಾಸ ಮಾಡಿರುವ ಜೆರ್ಸಿಯಲ್ಲಿ ಕಂಗೊಳಿಸಲಿದ್ದಾರೆ.
ಭಾರತೀಯ ಕ್ರಿಕೆಟ್ ತಂಡದ ಆಟಗಾರರ ಹೊಸ ಜೆರ್ಸಿಯ ಹೆಗಲ ಮೇಲೆ ಅಡಿಡಾಸ್ನ ಲೋಗೊವಾಗಿರುವ ಮೂರು ಪಟ್ಟಿಗಳು ಕಾಣುವಂತೆ ಇಡಲಾಗಿದೆ. ಅದುವೆ ಕಿಟ್ನ ಹೈಲೈಟ್ ಎನಿಸಿದೆ. ಇದೀಗ ಆ ಜೆರ್ಸಿಗಳ ಬೆಲೆಗಳನ್ನು ಅಧಿಕೃತವಾಗಿ ತಮ್ಮ ವೆಬ್ಸೈಟ್ನಲ್ಲಿ ಪ್ರಕಟಿಸಿದೆ ಅಡಿಡಾಸ್. ಡಿಸೈನರ್ ಅಕ್ವಿಬ್ ವಾನಿ ಈ ಜೆರ್ಸಿಗಳ ವಿನ್ಯಾಸ ಮಾಡಿದ್ದಾರೆ.
The jersey that makes you feel just one thing, Impossible Is Nothing!#OwnYourStripes #adidasXBCCI #adidasTeamIndiaJersey #ImpossibleIsNothing pic.twitter.com/vhahx4q1bV
— BCCI (@BCCI) June 3, 2023
ಗುರುವಾರ (ಜೂನ್ 1ರಂದು) ಬಿಸಿಸಿಐ ಮತ್ತು ಕ್ರೀಡಾ ಉಡುಪು ತಯಾರಕರು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣಗಳ ಮೂಲಕ ಮುಂಬೈನ ವಾಂಖೆಡೆ ಕ್ರೀಡಾಂಗಣವನ್ನು ಹಿನ್ನೆಯಾಗಿಟ್ಟುಕೊಂಡು ವಿಡಿಯೊ ಬಿಡುಗಡೆ ಮಾಡಿತ್ತು. ಆ ಮೂಲಕ ಹೊಸ ಜೆರ್ಸಿಯನ್ನು ಪರಿಚಯ ಮಾಡಿತ್ತು. ಅದೇ ರೀತಿ ಪುರುಷರ ಮತ್ತು ಮಹಿಳೆಯರ ರಾಷ್ಟ್ರೀಯ ತಂಡಗಳ ಆಟಗಾರರು ಕಿಟ್ಗಳ ಧರಿಸಿ ಪೋಸ್ ಕೊಡುವ ಮೂಲಕ ಕಿಟ್ಗಳನ್ನು ಪರಿಚಯಿಸಿದ್ದರು.
ಎಲ್ಲಿ ಖರೀದಿಸಬೇಕು?
ಹೊಸ ಕಿಟ್ ಖರೀದಿಸಲು ಅಭಿಮಾನಿಗಳು ಅಧಿಕೃತ ಅಡಿಡಾಸ್ ಅಪ್ಲಿಕೇಶನ್ ಮತ್ತು ವೆಬ್ಸೈಟ್ಗೆ ಪ್ರವೇಶ ಮಾಡಬೇಕಾಗುತ್ತದೆ. ಆದಾಗ್ಯೂ, ಮಾರಾಟವು ಜೂನ್ 4ರ ಭಾನುವಾರ ರಾತ್ರಿ 10 ಗಂಟೆಯ ಬಳಿಕ ಆರಂಭವಾಗಲಿದೆ. ಹೀಗಾಗಿ ಕ್ರಿಕೆಟ್ ಅಭಿಮಾನಿಗಳು ಹೊಸ ಜೆರ್ಸಿ ಖರೀದಿ ಮಾಡಲು ಕಾತರರಾಗಿ ಕಾಯುತ್ತಿದ್ದಾರೆ. ಜರ್ಸಿಗಳನ್ನು ದೇಶಾದ್ಯಂತ ಆಯ್ದ ಅಡಿಡಾಸ್ ಮಳಿಗೆಗಳಲ್ಲಿ ಮಾರಾಟ ಮಾಡುವುದಾಗಿ ಕಂಪನಿ ತಿಳಿಸಿದೆ.
ಇದನ್ನೂ ಓದಿ: Team India : ಭಾರತ ತಂಡದ ಹೊಸ ಜೆರ್ಸಿಯ ರೇಟ್ ಕೇಳಿ ಬೆಚ್ಚಿದ ಅಭಿಮಾನಿಗಳು, ಡೂಪ್ಲಿಕೇಟ್ ಬೆಸ್ಟ್ ಎಂದ ನೆಟ್ಟಿಗರು!
ಮೂರು ಮಾದರಿಯ ಕ್ರಿಕೆಟ್ನ ಕಿಟ್ ಬೆಲೆ 4,999 ರೂಪಾಯಿ. ಅಡಿಡಾಸ್ ಏಕದಿನ ಪಂದ್ಯಗಳಿಗೆ ಫ್ಯಾನ್ ಜೆರ್ಸಿ ಮತ್ತು ಪ್ರತಿರೂಪ ಜೆರ್ಸಿಯನ್ನು ಬಿಡುಗಡೆ ಮಾಡಿದೆ. ಇದರ ಬೆಲೆ ಕ್ರಮವಾಗಿ 2,999 ಮತ್ತು 999 ರೂಪಾಯಿ. ಪ್ಯಾಂಟ್ಗೆ 4,599 ರೂಪಾಯಿ ನಿಗದಿ ಮಾಡಲಾಗಿದೆ.
ಆನ್ಲೈನ್ನಲ್ಲಿ ಹೊಸ ಕಿಟ್ ಖರೀದಿ ಮಾಡಲು ಈ ರೀತಿ ಮಾಡಿ.
- ಅಧಿಕೃತ ವೆಬ್ಸೈಟ್ ಅಥವಾ ಅಡಿಡಾಸ್ ಅಪ್ಲಿಕೇಶನ್ಗೆ ಹೋಗಿ
- ಮೇಲಿನ ಟ್ಯಾಬ್ನಲ್ಲಿ ಕಲೆಕ್ಷನ್ ವಿಭಾಗಕ್ಕೆ ಕ್ಲಿಕ್ ಮಾಡಿ. ‘ಅಡಿಡಾಸ್ ಎಕ್ಸ್ ಬಿಸಿಸಿಐ ಲೋಗೋ’ ಕ್ಲಿಕ್ ಮಾಡಿ.
- ಪುರುಷರ ಮತ್ತು ಮಹಿಳೆಯರ ಟಿ ಶರ್ಟ್ ಆಯ್ಕೆಯನ್ನು (ಟಿ 20 ಐ, ಏಕದಿನ, ಟೆಸ್ಟ್) ಆರಿಸಿ.
- ನಿಮ್ಮ ವಿಳಾಸವನ್ನು ಭರ್ತಿ ಮಾಡಿ ಮತ್ತು ಪಾವತಿ ಮಾಡಿ.
- ದೃಢೀಕರಣಕ್ಕಾಗಿ ಅಧಿಕೃತ ಸಂದೇಶ / ಮೇಲ್ ಕಳುಹಿಸಲಾಗುತ್ತದೆ.