ಮುಂಬಯಿ: ಫುಟ್ಬಾಲ್ ವಿಶ್ವಕಪ್, ಮಹಿಳೆಯರ ಪ್ರೀಮಿಯರ್ ಲೀಗ್ ಸೇರಿದಂತೆ ಜಾಗತಿಕ ಕ್ರೀಡಾಕೂಟಗಳನ್ನು ಉಚಿತವಾಗಿ ವೀಕ್ಷಿಸಲು ಅವಕಾಶ ಕೊಟ್ಟ ಜಿಯೊ ಸಿನಿಮಾ ಇದೇ ಹಾದಿಯಲ್ಲಿ ಮತ್ತೊಂದು ಹೆಜ್ಜೆಯನ್ನಿಟ್ಟಿದೆ. ವಿಶ್ವದ ಅತ್ಯಂತ ಥ್ರಿಲ್ಲಿಂಗ್ ಹಾಗೂ ಜನಪ್ರಿಯ ಕ್ರೀಡೆಯಾಗಿರುವ ಮೋಟಾರ್ಸೈಕಲ್ ರೇಸ್ ಮೊಟೊ ಜಿಪಿಯನ್ನೂ (Moto GP) ಭಾರತದಲ್ಲಿ ಉಚಿತವಾಗಿ ಪ್ರಸಾರ ಮಾಡಲು ನಿರ್ಧರಿಸಿದೆ. ವಯಾಕಾಮ್ 18 ಸಂಸ್ಥೆಯ ಮೂಲಕ ನೇರ ಪ್ರಸಾರದ ಹಕ್ಕನ್ನು ತನ್ನದಾಗಿಸಿಕೊಂಡಿದ್ದು, ವರ್ಷವಿಡೀ ಜಗತ್ತಿನ ನಾನಾ ಕಡೆ ನಡೆಯುವ ಮೋಟೊ ಜಿಪಿ ರೇಸ್ ಅನ್ನು ಉಚಿತವಾಗಿ ಭಾರತದ ಗ್ರಾಹಕರು ವೀಕ್ಷಿಸಬಹುದಾಗಿದೆ. ಈ ರೇಸ್ನಲ್ಲಿ ವಿಶ್ವದ ಚಾಂಪಿಯನ್ ರೇಸರ್ಗಳು ಪಾಲ್ಗೊಳ್ಳಲಿದ್ದಾರೆ. ಅದಕ್ಕಿಂತ ಹೆಚ್ಚಾಗಿ ಇದೇ ಮೊದಲ ಬಾರಿ ಈ ರೇಸ್ ಭಾರತದಲ್ಲೂ ಆಯೋಜನೆಗೊಂಡಿದ್ದು ಸೆಪ್ಟೆಂಬರ್ನಲ್ಲಿ ನಡೆಯಲಿದೆ.
ಮೋಟೋ ಜಿಪಿ ವಿಶ್ವ ಚಾಂಪಿಯನ್ಷಿಪ್ನಲ್ಲಿ ವಿಶ್ವದರ್ಜೆಯ, ಉನ್ನತ ನಿರ್ವಹಣೆಯ, ಪ್ರಪಂಚದ ಅತ್ಯುತ್ತಮ ಮೋಟಾರ್ ಸೈಕಲ್ ತಯಾರಿಕಾ ಕಂಪನಿಗಳು ಅತಿವೇಗದ ಪ್ರೋಟೋಟೈಪ್ ಮೋಟಾರ್ ಸೈಕಲ್ಗಳೊಂದಿಗೆ ಭಾಗಿಯಾಗುತ್ತಾರೆ. 2023ರ ಮೋಟೋ ಜಿಪಿ ಋತು ಅತ್ಯಧಿಕ ಸಿರೀಸ್ಗಳ ದಿನಾಂಕವನ್ನು ಒಳಗೊಂಡಿದ್ದು, 18 ದೇಶಗಳಲ್ಲಿ ಒಟ್ಟು 21 ರೇಸ್ಗಳು ನಡೆಯಲಿವೆ. ಇದರಲ್ಲಿ ಭಾರತದಲ್ಲಿ ನಡೆಯುವ 14ನೇ ಸುತ್ತಿನ ರೇಸ್ ಕೂಡ ಒಳಗೊಂಡಿರುತ್ತದೆ. ಈ ಮೂಲಕ ಮೋಟೋ ಜಿಪಿ ಭಾರತದಲ್ಲಿ ಪದಾರ್ಪಣೆಯನ್ನೂ ಮಾಡಲಿದೆ.
‘ಮೋಟೋ ಜಿಪಿ ವಿಶ್ವದಲ್ಲೇ ಅತ್ಯಂತ ಥ್ರಿಲ್ಲಿಂಗ್ ರೇಸಿಂಗ್ ಸ್ಪರ್ಧೆಯಾಗಿರುತ್ತದೆ. ಸೆಪ್ಟೆಂಬರ್ನಲ್ಲಿ ಇದರ ಸರಣಿಯು ಭಾರತದಲ್ಲೂ ಪದಾರ್ಪಣೆ ಮಾಡುತ್ತಿರುವುದರಿಂದ ಭಾರತದ ಬೈಕ್ ರೇಸ್ ಪ್ರೇಮಿಗಳಿಗೆ ಹಬ್ಬದ ವಾತಾವರಣ ಇರಲಿದೆ.
ವಯಾಕಾಮ್18 ಸ್ಪೋರ್ಟ್ಸ್ನ ಸ್ಟ್ರಾಟಜಿ ಮತ್ತು ಪಾಲುದಾರಿಕೆಗಳ ಮುಖ್ಯಸ್ಥ ಹರ್ಷ್ ಶ್ರೀವಾಸ್ತವ ಭಾರತದಲ್ಲಿ ಉಚಿತ ಪ್ರಸಾರದ ಕುರಿತು ಮಾತನಾಡಿ , ವಿಶ್ವದ ಅತ್ಯುತ್ತಮ ಮೋಟಾರ್ಸೈಕಲ್ ರೇಸಿಂಗ್ ಶೋವನ್ನು ಭಾರತದಲ್ಲಿ ಕ್ರೀಡಾಭಿಮಾನಿಗಳಿಗೆ ಒದಗಿಸಿಕೊಡಲು ನಮಗೆ ಹೆಮ್ಮೆ ಎನಿಸುತ್ತಿದೆ. ಈ ಮೂಲಕ ಜಿಯೊ ತನ್ನ ಅಭಿಮಾನಿ ಬಳಗವನ್ನು ವಿಸ್ತರಿಸಲಿದೆ ಎಂದು ಹೇಳಿದ್ದಾರೆ.
ಭಾರತವು ಮೋಟಾರ್ಸೈಕಲ್ ಉದ್ಯಮಕ್ಕೆ ಪ್ರಮುಖ ಮಾರುಕಟ್ಟೆಯಾಗಿದೆ. ಇದೇ ವೇಳೆ ದ್ವಿಚಕ್ರ ವಾಹನಗಳ ಅತ್ಯುತ್ಕೃಷ್ಟ ರೇಸ್ ಮೋಟೋ ಜಿಪಿಯೂ ಭಾರತಕ್ಕೆ ಕಾಲಿಡುತ್ತಿದೆ. ಈ ಕ್ರೀಡೆಯನ್ನು ಭಾರತದ ಮೂಲೆಮೂಲೆಗೆ ತಲುಪಿಸುವ ಕೆಲಸವನ್ನು ವಯಾಕಾಮ್ 18 ಮಾಡಲಿದೆ ಎಂದು ಡೋರ್ನಾ ಸಿಇಒ ಕ್ಯಾರ್ಮೆಲೊ ಎಜ್ಪೆಲೆಟಾ ಹೇಳಿದ್ದಾರೆ.
ಇದನ್ನೂ ಓದಿ : FORMULA 1 RACE: ಎಫ್-1 ಗ್ರ್ಯಾನ್ ಪ್ರಿ ರೇಸ್ಗೆ ಸಜ್ಜಾದ ಸೌದಿ ಅರೇಬಿಯಾ
‘ಅತ್ಯಂತ ರೋಮಾಂಚನಕಾರಿ ಕ್ರೀಡೆಯಾದ ಮೋಟೋ ಜಿಪಿಯನ್ನು ಭಾರತದಲ್ಲಿ ಪ್ರಸಾರ ಮಾಡಲು ವಯಾಕಾಮ್18 ಅತ್ಯಂತ ಸಮರ್ಥ ಪಾಲುದಾರ ಎಂಬ ವಿಶ್ವಾಸ ನಮಗಿದೆ. ಟಿವಿ ಮತ್ತು ಒಟಿಟಿ ಫ್ಲ್ಯಾಟ್ಫಾರ್ಮ್ಗಳ ಮೂಲಕ ಅವರು ಅತ್ಯಂತ ವ್ಯಾಪಕ ವ್ಯಾಪ್ತಿ ಹೊಂದಿದ್ದಾರೆ ಎಂದು ಭಾರತದ ರೇಸ್ನ ಪ್ರವರ್ತಕರಾಗಿರುವ ಫೇರ್ಸ್ಟ್ರೀಟ್ ಸ್ಪೋರ್ಟ್ಸ್ ಸಿಒಒ ಪುಷ್ಕರ್ ನಾಥ್ ಶ್ರೀವಾಸ್ತವ ಅಭಿಪ್ರಾಯಪಟ್ಟಿದ್ದಾರೆ.
ಜಿಯೊ ಪ್ರಸಾರ ಮಾಡುವ ಕ್ರೀಡಾಕೂಟಗಳು
ವಯಾಕಾಮ್18 ಸ್ಪೋರ್ಟ್ಸ್ ತನ್ನ ವಿಶ್ವದರ್ಜೆಯ ಹಲವು ಕ್ರೀಡಾಕೂಟಗಳನ್ನು ಪ್ರಸಾರ ಮಾಡುತ್ತಿವೆ. ಅವುಗಳು ಇಂತಿವೆ. ಟಾಟಾ ಐಪಿಎಲ್, ಟಾಟಾ ಡಬ್ಲ್ಯುಪಿಎಲ್, ಡೈಮಂಡ್ ಲೀಗ್, ಫಿಫಾ ವಿಶ್ವಕಪ್ ಕತಾರ್-2022, ಎನ್ಬಿಎ, ಲಾ ಲೀಗಾ, ಸೆರೀ ಎ, ಲೀಗ್1 ಮತ್ತು ಆಯ್ದ ಬಿಡಬ್ಲ್ಯುಎಫ್ ಟೂರ್ನಿಗಳ ಪ್ರಸಾರ ಹಕ್ಕು ಹೊಂದಿರುತ್ತದೆ.
2023ರ ಮೋಟೊ ಜಿಪಿ ರೇಸ್ ವೇಳಾಪಟ್ಟಿ
- 2023ರ ಮೋಟೋ ಜಿಪಿ ಕ್ಯಾಲೆಂಡರ್ ಇಲ್ಲಿದೆ
- ಮಾರ್ಚ್ 24-26 ಗ್ರ್ಯಾಂಡ್ ಪ್ರೀಮಿಯೊ ಡಿ ಪೋರ್ಚುಗಲ್
- ಮಾರ್ಚ್ 31-ಏಪ್ರಿಲ್ 2 ಗ್ರ್ಯಾನ್ ಪ್ರೀಮಿಯೊ ಡಿ ಲಾ ರಿಪಬ್ಲಿಕಾ ಅರ್ಜೆಂಟೀನಾ
- ಏಪ್ರಿಲ್ 14-16 ಗ್ರ್ಯಾನ್ ಪ್ರಿ ಆಫ್ ದಿ ಅಮೆರಿಕಾಸ್
- ಏಪ್ರಿಲ್ 28-30 ಗ್ರ್ಯಾನ್ ಪ್ರೀಮಿಯೊ ಡಿ ಇಸ್ಪಾನಾ
- ಮೇ 12-14 ಗ್ರ್ಯಾನ್ ಪ್ರಿ ಡಿ ಫ್ರಾನ್ಸ್
- ಜೂನ್ 09-11 ಗ್ರ್ಯಾನ್ ಪ್ರಿಮಿಯೊ ಡಿ ಇಟಲಿಯಾ
- ಜೂನ್ 16-18 ಗ್ರ್ಯಾನ್ ಪ್ರಿ ಡಾಯಾಚ್ಲೆಂಡ್
- ಜೂನ್ 23-25 ಟಿಟಿ ಅಸೆನ್, ನೆದರ್ಲೆಂಡ್
- ಜುಲೈ 7-9 ಗ್ರ್ಯಾನ್ ಪ್ರಿ ಆಫ್ ಕಜಕಸ್ತಾನ
- ಆಗಸ್ಟ್ 4-6 ಬ್ರಿಟಿಷ್ ಗ್ರ್ಯಾನ್ ಪ್ರಿ
- ಆಗಸ್ಟ್ 4-6 ಬ್ರಿಟಿಷ್ ಗ್ರ್ಯಾನ್ ಪ್ರಿ
- ಆಗಸ್ಟ್ 18-20 ಗ್ರ್ಯಾನ್ ಪ್ರಿ ವೊನ್ ಒಸ್ಟೆರಿಚ್, ಆಸ್ಟ್ರಿಯಾ
- ಸೆಪ್ಟೆಂಬರ್ 1-3 ಗ್ರ್ಯಾನ್ ಪ್ರೀಮಿ ಡಿ ಕ್ಯಾಟಲುನ್ಯಾ
- ಸೆಪ್ಟೆಂಬರ್ 8-10 ಗ್ರ್ಯಾನ್ ಪ್ರಿಮಿಯೊ ಡಿ ಸ್ಯಾನ್ ಮರಿನೊ, ಇಟಲಿ
- ಸೆಪ್ಟೆಂಬರ್ 22-24 ಗ್ರ್ಯಾನ್ ಪ್ರಿ ಆಫ್ ಇಂಡಿಯಾ
- ಸೆಪ್ಟೆಂಬರ್ 29-ಅಕ್ಟೋಬರ್ 1 ಗ್ರ್ಯಾನ್ ಪ್ರಿ ಆಫ್ ಜಪಾನ್
- ಅಕ್ಟೋಬರ್ 13-15 ಗ್ರ್ಯಾನ್ ಪ್ರಿ ಆಫ್ ಇಂಡೋನೇಷ್ಯಾ
- ಅಕ್ಟೋಬರ್ 20-22 ಆಸ್ಟ್ರೇಲಿಯನ್ ಮೋಟಾರ್ಸೈಕಲ್ ಗ್ರ್ಯಾನ್ ಪ್ರಿ
- ಅಕ್ಟೋಬರ್ 27-29 ಥಾಯ್ಲೆಂಡ್ ಗ್ರ್ಯಾನ್ ಪ್ರಿ
- ನವೆಂಬರ್ 10-12 ಗ್ರ್ಯಾನ್ ಪ್ರಿಆಫ್ ಮಲೇಷ್ಯಾ
- ನವೆಂಬರ್ 17-19 ಗ್ರ್ಯಾನ್ ಪ್ರಿ ಆಫ್ ಕತಾರ್
- ನವೆಂಬರ್ 24-26 ಗ್ರ್ಯಾನ್ ಪ್ರೀಮಿಯೊ ಡಿ ವಲೆನ್ಸಿಯಾ