ಕೊಚ್ಚಿ : ಕೇರಳದ ಕೊಚ್ಚಿಯಲ್ಲಿ ಡಿಸೆಂಬರ್ 23ರಂದು ನಡೆದ ಐಪಿಎಲ್ ಆಟಗಾರರ ಹರಾಜು ಪ್ರಕ್ರಿಯೆಗೆ ಭರ್ಜರಿ ಪ್ರತಿಕ್ರಿಯೆ ಲಭಿಸಿದೆ. ಸ್ಯಾಮ್ ಕರ್ರನ್ (18.5 ಕೋಟಿ ರೂಪಾಯಿ), ಕ್ಯಾಮೆರಾನ್ ಗ್ರೀನ್ (17.5 ಕೋಟಿ ರೂಪಾಯಿ) ಹಾಗೂ ಬೆನ್ಸ್ಟೋಕ್ಸ್ (16.5) ಕೋಟಿ ರೂಪಾಯಿ ದೊಡ್ಡ ಮೊತ್ತದ ಥೈಲಿಯನ್ನು ಪಡೆದುಕೊಂಡಿದ್ದಾರೆ. ಇವೆಲ್ಲದರ ನಡುವೆ ಪಾಕಿಸ್ತಾನದ ಕ್ರಿಕೆಟಿಗರೊಬ್ಬರು ಸದ್ದಿಲ್ಲದೇ ಐಪಿಎಲ್ ರಂಗಕ್ಕೆ ಪ್ರವೇಶ ಗಿಟ್ಟಿಸಿಕೊಂಡಿದ್ದಾರೆ. ಪಾಕಿಸ್ತಾನ ಆಟಗಾರರಿಗೆ ಐಪಿಎಲ್ಗೆ ಎಂಟ್ರಿ ಇಲ್ಲದಿರುವಾಗ ಅವರು ಹೇಗೆ ಬರಲು ಸಾಧ್ಯ ಎಂಬುದು ಪ್ರಶ್ನೆ. ಆದರೂ ಬಂದಿದ್ದು ಹೇಗೆ?
ಐಪಿಎಲ್ ಹರಾಜಿನಲ್ಲಿ ಪಾಲ್ಗೊಂಡು ಅವಕಾಶ ಗಿಟ್ಟಿಸಿಕೊಂಡಿರುವ ಪಾಕ್ ಆಟಗಾರ ಮತ್ಯಾರೂ ಅಲ್ಲ. ಪಂಜಾಜ್ ಕಿಂಗ್ಸ್ ಬಳಗಕ್ಕೆ 50 ಲಕ್ಷ ರೂಪಾಯಿ ಮೂಲ ಬೆಲೆಗೆ ಆಯ್ಕೆಯಾಗಿರುವ ಸಿಕಂದರ್ ರಾಜಾ. ಬಿಸಿಸಿಸಿಐ ಮತ್ತು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಹಾವು- ಮುಂಗುಸಿ ರೀತಿಯಲ್ಲಿ ಕಚ್ಚಾಡುವಾಗ ರಾಜಾ ಐಪಿಎಲ್ಗೆ ಬಂದಿದ್ದು ಸೋಜಿಗದ ಸಂಗತಿಯಾಗಿದ್ದರೂ ಅದು ಸತ್ಯ. ಹೇಗೆಂದರೆ, ಸಿಕಂದರ್ ರಾಜಾ ಅವರು ಪಾಕಿಸ್ತಾನ ಮೂಲದ ಕ್ರಿಕೆಟಿಗರಾಗಿದ್ದರೂ ಅವರು ಆಡುತ್ತಿರುವುದು ಜಿಂಬಾಬ್ವೆ ಕ್ರಿಕೆಟ್ ತಂಡಕ್ಕೆ. ಅಲ್ಲದೆ ಜಿಂಬಾಬ್ವೆ ತಂಡದ ಸ್ಟಾರ್ ಆಲ್ರೌಂಡರ್ ಹಾಗೂ ನಾಯಕ ಕೂಡ. ಹೀಗಾಗಿ ಅವರು ಹರಾಜಿನಲ್ಲಿ ತಮ್ಮ ಹೆಸರನ್ನು ಸೇರ್ಪಡೆಗೊಳಿಸಿದ್ದರು. ಇದರ ಮೂಲಕ ಬಾರಿ ಜಿಂಬಾಬ್ವೆ ಆಟಗಾರನೂ ಅವಕಾಶ ಪಡೆದಂತಾಗಿದೆ.
ಇನ್ನೂ ನಮೀಬಿಯಾ ತಂಡದ ವೇಗದ ಬೌಲರ್ ಡೇವಿಡ್ ವೈಸ್ ಕೂಡ ಐಪಿಎಲ್ ಹರಾಜಿನಲ್ಲಿ ಪಾಲ್ಗೊಂಡು 1 ಕೋಟಿ ರೂಪಾಯಿ ಪಡೆಯಲು ಶಕ್ತರಾಗಿದ್ದಾರೆ. ಈ ಮೂಲಕ ಇದೇ ಮೊದಲ ಬಾರಿ ನಮೀಬಿಯಾ ಆಟಗಾರರೊಬ್ಬರು ಐಪಿಎಲ್ನಲ್ಲಿ ಅವಕಾಶ ಪಡೆದಂತಾಗಿದೆ.
ಐರ್ಲೆಂಡ್ನ ಆಟಗಾರನ ಎಂಟ್ರಿ
ಇನ್ನೂ ಐರ್ಲೆಂಡ್ನ ವೇಗಿ ಜೋಶುವಾ ಲಿಟಲ್ ಕೂಡ ಈ ಬಾರಿ ಐಪಿಎಲ್ ಹರಾಜಿನ ಮೂಲಕ ಗುಜರಾತ್ ಜಯಂಟ್ಸ್ ತಂಡ ಸೇರಿಕೊಂಡಿದ್ದಾರೆ. ಅವರಿಗೆ ಗುಜರಾತ್ ಜಯಂಟ್ಸ್ ತಂಡ 4.4 ಕೋಟಿ ರೂಪಾಯಿ ನೀಡಿದೆ. ಅವರು ಮೂಲ ಬೆಲೆ 50 ಲಕ್ಷ ರೂಪಾಯಿಗಳಾಗಿತ್ತು. ಈ ಮೂಲಕ ಐರ್ಲೆಂಡ್ ಆಟಗಾರರೊಬ್ಬರೂ ಐಪಿಎಲ್ಗೆ ಎಂಟ್ರಿ ಗಿಟ್ಟಿಸಿಕೊಂಡರು.
ಇದನ್ನೂ ಓದಿ | IPL Auction | ಐಪಿಎಲ್ನಲ್ಲಿ ಈ ಬಾರಿ ಗರಿಷ್ಠ ಪ್ರಮಾಣದ ನಷ್ಟ ಅನುಭವಿಸಿದ ಆಟಗಾರರು ಯಾರು? ಇಲ್ಲಿದೆ ವಿವರ