ಕೌನ್ಸಿಲ್‌ ಬ್ಲಫ್ಸ್‌ (ಅಮೆರಿಕ): ಕಾಮನ್ ವೆಲ್ತ್ ಗೇಮ್ಸ್ ಚಾಂಪಿಯನ್ ಆಟಗಾರ ಭಾರತದ ಲಕ್ಷ್ಯ ಸೇನ್(Lakshya Sen) ಮತ್ತು ಅವಳಿ ಒಲಿಂಪಿಕ್ ಪದಕ ವಿಜೇತೆ ಪಿ.ವಿ. ಸಿಂಧು(PV Sindhu) ಇಲ್ಲಿ ನಡೆಯುತ್ತಿರುವ ಯುಎಸ್ ಓಪನ್ ಸೂಪರ್ 300 ಬ್ಯಾಡ್ಮಿಂಟನ್(US Open 2023) ಟೂರ್ನಿಯ ಗೆಲುವಿನ ಶುಭಾರಂಭ ಕಂಡಿದ್ದಾರೆ. ಆದರೆ ಸಾಯಿ ಪ್ರಣೀತ್‌ ಸೋಲು ಕಂಡು ಟೂರ್ನಿಯಿಂದ ಹೊರಬಿದ್ದರು.
ಗುರುವಾರ ಆರಂಭಗೊಂಡ ಈ ಟೂರ್ನಿಯ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಕಳೆದ ವಾರವಷ್ಟೇ ಕೆನಡಾ ಓಪನ್ ಸೂಪರ್ 500 ಬ್ಯಾಡ್ಮಿಂಟನ್ ಕಿರೀಟ ಗೆದ್ದ ಭಾರತದ ಲಕ್ಷ್ಯ ಸೇನ್ ಫಿನ್ಲೆಂಡ್‌ನ ಕಲ್ಲ ಕಲ್ಜೋನೆನ್ ಅವರನ್ನು 21-8, 21-16ರಿಂದ ಹಿಮ್ಮೆಟ್ಟಿಸಿ ಅಧಿಕಾರಯುತ ಗೆಲುವು ಸಾಧಿಸಿದರು. ಈ ಹೋರಾಟ ಕೇವಲ 30 ನಿಮಿಷಕ್ಕೆ ಅಂತ್ಯ ಕಂಡಿತು. ಕೆನಡಾ ಓಪನ್ನಲ್ಲಿ ಲಕ್ಷ್ಯ ಸೇನ್ ಅವರು ಆಲ್ ಇಂಗ್ಲೆಂಡ್ ಚಾಂಪಿಯನ್, ಚೀನಾದ ಲಿ ಶಿ ಫೆಂಗ್ ಅವರನ್ನು 21-18, 22-20 ನೇರ ಗೇಮ್ ಗಳಿಂದ ಮಣಿಸಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದರು.
ಮಹಿಳಾ ಸಿಂಗಲ್ಸ್ನಲ್ಲಿ ಸಿಂಧು ಭಾರತೀಯ ಮೂಲದ ಅಮೆರಿಕನ್ ಆಟಗಾರ್ತಿ ದಿಶಾ ಗುಪ್ತಾ ವಿರುದ್ಧ 21-15, 21-10 ನೇರ ಗೇಮ್ಗಳಿಂದ ಗೆದ್ದು ದ್ವಿತೀಯ ಸುತ್ತು ಪ್ರವೇಶಿಸಿದರು. ಅರ್ಹತಾ ಸುತ್ತು ದಾಟಿ ಬಂದ ಭಾರತದ ಎಸ್‌.ಶಂಕರ್‌ ಸುಬ್ರಮಣಿಯನ್ ಮೊದಲ ಸುತ್ತಿನಲ್ಲಿ ಐರ್ಲೆಂಡ್‌ನ ನ್ಹಾಟ್‌ ಯಂಗುಯೆನ್ ಅವರನ್ನು 21-11, 21-16 ರಿಂದ ಸೋಲಿಸಿದರು.
ದಿನದ ಮತ್ತೊಂದು ಪುರುಷರ ಸಿಂಗಲ್ಸ್ ವಿಭಾಗದ ಸ್ಪರ್ಧೆಯಲ್ಲಿ ಸಾಯಿ ಪ್ರಣೀತ್‌ ಅವರು ತೀವ್ರ ಹೋರಾಟ ನಡೆಸಿದರೂ ಚೀನಾದ ಲೀ ಶಿ ಫೆಂಗ್ ಎದುರು ಸೋಲನುಭವಿಸಿದರು. ಸೋಲಿನ ಅಂತರ 16-21, 21-14, 21-19.
ಇದನ್ನೂ ಓದಿ Lakshya Sen: ಭಾರತದ ಲಕ್ಷ್ಯ ಸೇನ್, ಕೆನಡಾ ಓಪನ್ ಬ್ಯಾಡ್ಮಿಂಟನ್ ಟೂರ್ನಿ ಚಾಂಪಿಯನ್
ಪುರುಷರ ಡಬಲ್ಸ್‌ನಲ್ಲಿ ಕೃಷ್ಣಪ್ರಸಾದ್ ಗರಗ ಮತ್ತು ವಿಷ್ಣುವರ್ಧನ್ ಗೌಡ ಪಂಜಾಲ ಮೊದಲ ಸುತ್ತಿನಲ್ಲೇ ಹೊರಬಿದ್ದರು. ಭಾರತದ ಆಟಗಾರರು 14-21, 14-21ರಲ್ಲಿ ಚೀನಾ ತೈಪೆಯ ಲಿನ್‌ ಯು ಚಿಯಾ ಮತ್ತು ಸು ಲಿ ವೀ ಜೋಡಿ ಎದುರು ಪರಾಭವಗೊಂಡರು.