ಪೋರ್ಟ್‌ ಆಫ್ ಸ್ಪೇನ್‌: ವೆಸ್ಟ್ ಇಂಡೀಸ್ ವಿರುದ್ಧದ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಸೋತ ಭಾರತ ಬ್ಯಾಟಿಂಗ್ ಆಹ್ವಾನ ಪಡೆದಿದೆ. ಈ ಪಂದ್ಯದಲ್ಲಿ ಕಿಂಗ್ ಖ್ಯಾತಿಯ ವಿರಾಟ್ ಕೊಹ್ಲಿ(Virat Kohli) ಆಡಲಿಳಿಯುವ ಮೂಲಕ ತಮ್ಮ 500ನೇ(Virat Kohli 500th match) ಅಂತಾರಾಷ್ಟ್ರೀಯ ಪಂದ್ಯವನ್ನು ಪೂರ್ತಿಗೊಳಿಸಿದ್ದಾರೆ. ಈ ಸಾಧನೆ ಮಾಡಿದ ನಾಲ್ಕನೇ ಭಾರತೀಯ ಆಟಗಾರ ಹಾಗೂ ವಿಶ್ವದ 10ನೇ ಆಟಗಾರ ಎಂಬ ಹಿರಿಮೆಗೆ ಪಾತ್ರರಾದರು.
ಪೋರ್ಟ್‌ ಆಫ್ ಸ್ಪೇನ್‌ನ ಕ್ವೀನ್ಸ್‌ ಪಾರ್ಕ್‌ ಓವಲ್‌ನಲ್ಲಿ ಗುರುವಾರ ಆರಂಭವಾದ ಈ ಪಂದ್ಯದಲ್ಲಿ ಕಣಕ್ಕಿಳಿಯುವುದರೊಂದಿಗೆ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 500 ಪಂದ್ಯಗಳನ್ನಾಡಿದ ಎಲೈಟ್ ಪಟ್ಟಿಗೆ ಸೇರ್ಪಡೆಗೊಂಡರು. ಇದಕ್ಕೂ ಮುನ್ನ ಟೀಮ್ ಇಂಡಿಯಾ ಪರ ಈ ಸಾಧನೆ ಮಾಡಿದ್ದು ಕೇವಲ ಮೂವರು ಆಟಗಾರರು ಮಾತ್ರ. ಭಾರತ ಪರ ಈ ಸಾಧನೆ ಮಾಡಿದ ಮೊದಲ ಆಟಗಾರನೆಂದರೆ ಸಚಿನ್ ತೆಂಡೂಲ್ಕರ್(sachin tendulkar). ಅವರು 664 ಪಂದ್ಯಗಳನ್ನು ಆಡಿದ್ದಾರೆ. ಮಹೇಂದ್ರ ಸಿಂಗ್ ಧೋನಿ(ms dhoni) ದ್ವಿತೀಯ ಸ್ಥಾನದಲ್ಲಿದ್ದು ಅವರು 538 ಪಂದ್ಯ ಆಡಿದ್ದಾರೆ. ಮೂರನೇ ಸ್ಥಾನದಲ್ಲಿ ಪ್ರಸ್ತುತ ಭಾರತ ತಂಡದ ಕೋಚ್ ಆಗಿರುವ ರಾಹುಲ್ ದ್ರಾವಿಡ್ ಕಾಣಿಸಿಕೊಂಡಿದ್ದಾರೆ. ದ್ರಾವಿಡ್ 509 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ.
ಇದನ್ನೂ ಓದಿ Virat Kohli : ವಿಂಡೀಸ್ ವಿರುದ್ಧದ 2ನೇ ಟೆಸ್ಟ್ನಲ್ಲಿ ಕೊಹ್ಲಿ ದಾಖಲಿಸಬಹುದಾದ 4 ರೆಕಾರ್ಡ್ಗಳ ವಿವರ ಇಲ್ಲಿದೆ
100ನೇ ಪಂದ್ಯ
ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ನೂರನೇ ಟೆಸ್ಟ್ ಪಂದ್ಯ ಇದಾಗಿದೆ. ವಿಂಡೀಸ್ನ ಕೆಲ ಮಾಜಿ ದಿಗ್ಗಜ ಆಟಗಾರರು ಈ ಐತಿಹಾಸಿಕ ಟೆಸ್ಟ್ ಪಂದ್ಯಕ್ಕೆ ಸಾಕ್ಷಿಯಾಗಿ ಎರಡೂ ತಂಡಗಳ ಆಟಗಾರರನ್ನು ವಿಶೇಷವಾಗಿ ಸ್ವಾಗತಿಸಿದರು. ಉಭಯ ತಂಡಗಳ ಮಧ್ಯೆ ಮೊದಲ ಟೆಸ್ಟ್ ಮುಖಾಮುಖಿ ನಡೆದದ್ದು 1948-49ರಲ್ಲಿ. ಐದು ಪಂದ್ಯಗಳ ಸರಣಿ ಇದಾಗಿತ್ತು. ಈ ಸರಣಿಯನ್ನು ವಿಂಡೀಸ್ 1-0 ಅಂತರದಿಂದ ಗೆದ್ದು ಬೀಗಿತ್ತು. ಈ ಸರಣಿಗೆ ಭಾರತ ಆತಿಥ್ಯ ವಹಿಸಿಕೊಂಡಿತ್ತು. ಭಾರತ ತಂಡ ವಿಂಡೀಸ್ ವಿರುದ್ಧ ಮೊತ್ತ ಮೊದಲ ಟೆಸ್ಟ್ ಸರಣಿ ಗೆದ್ದಿದ್ದು 1970ರಲ್ಲಿ, ವಿಂಡೀಸ್ ನೆಲದಲ್ಲೇ ಭಾರತ ಮೊದಲ ಗೆಲುವು ದಾಖಲಿಸಿತ್ತು. ಇದು ಕೂಡ 5 ಪಂದ್ಯಗಳ ಸರಣಿ ಆಗಿತ್ತು. ಭಾರತ 1-0 ಅಂತರದಿಂದ ಮೇಲುಗೈ ಸಾಧಿಸಿತ್ತು.
Captain Rohit Sharma is presented with a plaque to commemorate the 100th Test between India and West Indies.#WIvIND pic.twitter.com/99pnoRUK8S
— BCCI (@BCCI) July 20, 2023
ವಿರಾಟ್ ಕೊಹ್ಲಿ ಅನೇಕ ಆಟಗಾರರಿಗೆ ನಿಜವಾದ ಸ್ಫೂರ್ತಿ
ವಿರಾಟ್ ಕೊಹ್ಲಿ ಅವರು 500ನೇ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಕಣಕ್ಕಿಳಿಯುವ ಮುನ್ನ ಕೋಚ್ ದ್ರಾವಿಡ್ ಅವರು ಕೊಹ್ಲಿ ಕ್ರಿಕೆಟ್ ಜರ್ನಿ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿ, ವಿರಾಟ್ ಕೊಹ್ಲಿ ಅನೇಕ ಆಟಗಾರರಿಗೆ ನಿಜವಾದ ಸ್ಫೂರ್ತಿ’ ಎಂದರು.
“ವಿರಾಟ್ ಅನೇಕ ಆಟಗಾರರಿಗೆ ನಿಜವಾದ ಸ್ಫೂರ್ತಿ. ತಂಡದಲ್ಲಿ ಮತ್ತು ಅನೇಕ ಆಟಗಾರರು ಅವರನ್ನು ಗೌರವದಿಂದ ನೋಡುತ್ತಾರೆ ಮತ್ತು ಅವರಂತೆ ಕ್ರಿಕೆಟ್ ಆಡಲು ಬಯಸುತ್ತಾರೆ. ನಿಸ್ಸಂಶಯವಾಗಿ, ಅವರ ದಾಖಲೆಗಳೇ ಅವರ ಬಗ್ಗೆ ಮಾತನಾಡುತ್ತವೆ. ತೆರೆಮರೆಯಲ್ಲಿ ಅವರು ಮಾಡುವ ಶ್ರಮ ಮತ್ತು ಕೆಲಸಗಳು ಅದ್ಭುತ. ಇನ್ನೂ ಕೂಡ ಅವರು ಭಾರತ ಪರ ಪಂದ್ಯವನ್ನಾಡಲಿ ಎಂದು ದ್ರಾವಿಡ್ ಕೊಹ್ಲಿ ಹಾರೈಸಿದರು.