ಬೆಂಗಳೂರು: ಚೇಸಿಂಗ್ ಮಾಸ್ಟರ್ ಖ್ಯಾತಿಯ ವಿರಾಟ್ ಕೊಹ್ಲಿ(Virat Kohli) ಅವರು ಸೋಮವಾರ ಚಿನ್ನಸ್ವಾಮಿಯಲ್ಲಿ ನಡೆದ ಐಪಿಎಲ್ನ(IPL 2024) ಪಂಜಾಬ್(RCB vs PBKS) ವಿರುದ್ಧದ ಪಂದ್ಯದಲ್ಲಿ ಅರ್ಧಶತಕ ಬಾರಿಸುವ ಮೂಲಕ ಟಿ20ಯಲ್ಲಿ(Virat Kohli t20 records) ಹಲವು ದಾಖಲೆಗಳನ್ನು ತಮ್ಮ ಹೆಸರಿಗೆ ಬರೆದಿದ್ದಾರೆ. ಶೂನ್ಯಕ್ಕೆ ಔಟಾಗಬೇಕಿದ್ದ ಕೊಹ್ಲಿ ಅವರು ಬೇರ್ಸ್ಟೋ ಅವರಿಂದ ಜೀವದಾನ ಪಡೆದು ಅಮೋಘ ಬ್ಯಾಟಿಂಗ್ ನಡೆಸಿ ಗಮನಸೆಳೆದರು. ಅವರು ನಿರ್ಮಿಸಿದ ದಾಖಲೆ ಪಟ್ಟಿ ಹೀಗಿದೆ.
ಧವನ್ ದಾಖಲೆ ಹಿಂದಿಕ್ಕಿದ ಕೊಹ್ಲಿ
ವಿರಾಟ್ ಕೊಹ್ಲಿ ಅವರು ಅರ್ಧಶತಕ ಬಾರಿಸುವ ಮೂಲಕ ಐಪಿಎಲ್‌ನಲ್ಲಿ 51ನೇ ಅರ್ಧಶತಕ ಪೂರ್ತಿಗೊಳಿಸಿದರು. ಈ ಮೂಲಕ 50 ಫಿಫ್ಟಿ ಸಿಡಿಸಿರುವ ಶಿಖರ್‌ ಧವನ್ ಅವರ ದಾಖಲೆಯನ್ನು ಹಿಂದಿಕ್ಕಿದರು. ಅಚ್ಚರಿ ಎಂದರೆ ಧವನ್ ದಾಖಲೆ ಮುರಿದದ್ದು ಕೂಡ ಅವರ ತಂಡದ ವಿರುದ್ಧ ಆಡುವ ಮೂಲಕವೇ. 61 ಅರ್ಧಶತಕ ಬಾರಿಸಿರುವ ಡೇವಿಡ್ ವಾರ್ನರ್ ಅಗ್ರಸ್ಥಾನದಲ್ಲಿದ್ದಾರೆ. ಭಾರತೀಯ ಆಟಗಾರರ ಪಟ್ಟಿಯಲ್ಲಿ ಕೊಹ್ಲಿಗೆ ಅಗ್ರಸ್ಥಾನ.
🧿🧿🧿🧿
— Royal Challengers Bengaluru (@RCBTweets) March 25, 2024
pic.twitter.com/uIrhV1KS0a
ಟಿ20ಯಲ್ಲಿ 100ನೇ 50+ ಸ್ಕೋರ್
ಈ ಪಂದ್ಯದಲ್ಲಿ ಒಟ್ಟಾರೆ 77 ರನ್ ಸಿಡಿಸಿದ ಕೊಹ್ಲಿ ಟ20 ಕ್ರಿಕೆಟ್ನಲ್ಲಿ 100ನೇ 50+ ಸ್ಕೋರ್ ಬಾರಿಸಿದ ದಾಖಲೆ ಬರೆದರು. ಜತೆಗೆ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಮತ್ತು ವಿಶ್ವದ 3ನೇ ಬ್ಯಾಟರ್‌ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಕೊಹ್ಲಿ ಈ ಸಾಧನೆಯನ್ನು 377 ಪಂದ್ಯಗಳಲ್ಲಿ ಪೂರ್ಣಗೊಳಿಸಿದರು. ವೆಸ್ಟ್ಇಂಡೀಸ್‌ನ ಮಾಜಿ ಆಟಗಾರ ಕ್ರಿಸ್‌ ಗೇಲ್‌ 110, ಡೇವಿಡ್ ವಾರ್ನರ್ 109 ಬಾರಿ ಟಿ20 ಕ್ರಿಕೆಟ್ನಲ್ಲಿ 50+ ರನ್ ಗಳಿಸಿದ್ದಾರೆ. ಕ್ರಮವಾಗಿ ಮೊದಲೆರಡು ಸ್ಥಾನದಲ್ಲಿ ಕಾಣಿಸಿಕೊಂಡಿದ್ದಾರೆ. ವಾರ್ನರ್ ದಾಖಲೆ ಮುರಿಯಲು ಕೊಹ್ಲಿಗೆ ಇನ್ನು ಹತ್ತು 50+ ಸ್ಕೋರ್ ಅಗತ್ಯವಿದೆ. ಸದ್ಯ ಐಪಿಎಲ್ ಆಡುತ್ತಿರುವ ವಾರ್ನರ್ ಕೂಡ ಮುಂದಿನ ಪಂದ್ಯಗಳಲ್ಲಿ 50+ ರನ್ ಬಾರಿಸಿದರೆ ಆಗ ಕೊಹ್ಲಿಗೆ ಇನ್ನಷ್ಟು 50+ ಸ್ಕೋರ್ನ ಅಗತ್ಯ ಬೀಳಬಹುದು. 81 ಬಾರಿ ಈ ಸಾಧನೆ ಮಾಡಿರುವ ರೋಹಿತ್ ಶರ್ಮಾ ಭಾರತೀಯರ ಆಟಗಾರರ ಪೈಕಿ 2ನೇ ಸ್ಥಾನದಲ್ಲಿದ್ದಾರೆ.
ಇದನ್ನೂ ಓದಿ Virat Kohli: ಮತ್ತೆ ಹಳೇ ಚಾಳಿ ಮುಂದುವರಿಸಿದ ಕೊಹ್ಲಿ; ಎದುರಾಳಿ ಆಟಗಾರನಿಗೆ ನಿಂದನೆ
First home game of the season ✅
— Royal Challengers Bengaluru (@RCBTweets) March 25, 2024
First fifty of the season ✅
51st fifty in IPL#PlayBold #ನಮ್ಮRCB #IPL2024 #RCBvPBKS @imVkohli pic.twitter.com/FqHevUNJUt
ಚಿನ್ನಸ್ವಾಮಿಯಲ್ಲಿ 25ನೇ ಅರ್ಧಶತಕ
2008ರಿಂದ ಆರ್ಸಿಬಿ ಏಕೈಕ ತಂಡದ ಪರ ಆಡುತ್ತಿರುವ ವಿರಾಟ್ ಕೊಹ್ಲಿ ಅವರು ನಿನ್ನೆ ನಡೆದ ಪಂದ್ಯದಲ್ಲಿ ಅರ್ಧಶತಕ ಬಾರಿಸುವ ಮೂಲಕ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಐಪಿಎಲ್‌ನಲ್ಲಿ 25ನೇ ಅರ್ಧಶತಕ ಪೂರ್ತಿಗೊಳಿಸಿದರು. ಇದು ಕ್ರೀಡಾಂಗಣವೊಂದರಲ್ಲಿ ಆಟಗಾರ ಬಾರಿಸಿದ ಗರಿಷ್ಠ ಅರ್ಧಶತಕದ ದಾಖಲೆಯೂ ಹೌದು. ಡೇವಿಡ್ ವಾರ್ನರ್ ಅವರು ಹೈದರಾಬಾದ್‌ನಲ್ಲಿ 18, ಆರ್ಸಿಬಿ ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್‌ ಚಿನ್ನಸ್ವಾಮಿಯಲ್ಲಿ 16, ರೋಹಿತ್ ಶರ್ಮಾ ಮುಂಬೈಯ ವಾಂಖೇಡೆಯಲ್ಲಿ 15 ಬಾರಿ ಈ ಸಾಧನೆ ಮಾಡಿದ್ದಾರೆ.
ಕ್ಯಾಚ್ ದಾಖಲೆ
ಬ್ಯಾಟಿಂಗ್ ಮಾತ್ರವಲ್ಲದೆ ಫೀಲ್ಡಿಂಗ್ ವಿಭಾಗದಲ್ಲಿಯೂ ಕೊಹ್ಲಿ ದಾಖಲೆ ಬರೆದರು. ಪಂದ್ಯದಲ್ಲಿ 2 ಕ್ಯಾಚ್ ಹಿಡಿಯುವ ಮೂಲಕ ಟಿ20 ಕ್ರಿಕೆಟ್ನಲ್ಲಿ ಅತ್ಯಧಿಕ ಕ್ಯಾಚ್ ಪಡೆದ ಭಾರತೀಯ ಆಟಗಾರ ಎನಿಸಿಕೊಂಡರು. ಟಿ20 ಕ್ರಿಕೆಟ್ನಲ್ಲಿ 173 ನೇ ಕ್ಯಾಚ್ ಹಿಡಿದು ಸುರೇಶ್ ರೈನಾ ದಾಖಲೆಯನ್ನು ಹಿಂದಿಕ್ಕಿದರು. ರೈನಾ 172 ಕ್ಯಾಚ್‌ಗಳನ್ನು ಪಡೆದಿದ್ದಾರೆ. ರೋಹಿತ್ ಶರ್ಮ ಅವರು ಸದ್ಯ 167 ಕ್ಯಾಚ್ ಹಿಡಿದು ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. 146 ಕ್ಯಾಚ್ ಪಡೆದ ಮನೀಷ್ ಪಾಂಡೆ ನಾಲ್ಕನೇ ಸ್ಥಾನ, 136 ಕ್ಯಾಚ್ ಪಡೆದ ಸೂರ್ಯಕುಮಾರ್ ಯಾದವ್ 5ನೇ ಸ್ಥಾನದಲ್ಲಿದ್ದಾರೆ.